၃၀. ၆. ၂၀၂၃
Written by Pan Ei
ပုရွက်ဆိတ်တွေအတွက် လက်ကိုင်အိတ်လို့တောင် ထင်ရမယ့် နာမည်ကြီးဇိမ်ခံအမှတ်တံဆိပ် Louis Vuitton အမှတ်တံဆိပ်နဲ့ အိတ်လေးဟာ ပင်လယ်ဆားပွင့်တစ်ပွင့်ထက်တောင် သေးငယ်ပြီး အဏုမြူမှန်ပြောင်းနဲ့ကြည့်မှသာ မြင်တွေ့နိုင်မှာပါ။
အဆိုပါ အိတ်လေးဟာ အရွယ်အစားကသာ သေးငယ်လွန်းလှပေမဲ့ လေလံတင်ရောင်းချခဲ့ရာမှာတော့ အမေရိကန်ဒေါ်လာ ၆၃,၀၀၀ (မြန်မာငွေနဲ့ဆိုရင်တော့ သိန်း ၂ထောင်နီးပါး) ရရှိခဲ့ပါတယ်။
အနံ သုည ဒသမ ၃ လက်မအောက်သာရှိတဲ့ နီယွန်အစိမ်းရောင်အိတ်ကို Louis Vuitton ရဲ့ကျော်ကြားတဲ့ OnTheGo လက်ကိုင်အိတ်ပုံစံကို တုပကာထုတ်ထားတာဖြစ်ပြီး LV အမှတ်အသားလည်း ပါဝင်ပါတယ်။
အဆိုပါအိတ်ကို နယူးယောက်အခြေစိုက် အနုပညာကုမ္ပဏီ MSCHF က ၂၀၂၁ ခုနှစ်မှာ 3D နည်းပညာအသုံးပြုကာ တီထွင်ပြုလုပ်ခဲ့တာဖြစ်ပြီး အိတ်ကို အွန်လိုင်းက လေလံတင်ရောင်းချတဲ့ Joopiter ကနေ ရောင်းချခဲ့ရမှာတော့ သေးငယ်လွန်းတဲ့အိတ်အတွက် များပြားလှတဲ့ပမာဏ အမေရိကန်ဒေါ်လာ ၆ သောင်းကျော်ကို ရရှိခဲ့တာပါ။
MSCHF ရဲ့ အဆိုပါ အိတ်အကြောင်းကို အင်စတာဂရမ်မှာ တင်ခဲ့တဲ့ပို့စ်မှာ ကျီစယ်ကြတဲ့တုံ့ပြန်မှုအချို့ကို ရရှိခဲ့ပြီး အင်တာနက်အသုံးပြုသူတချို့က “နောက်ဆုံးတော့ ငါ့ပိုက်ဆံတွေအကုန်ထည့်နိုင်မယ့် အိတ်ကိုတွေ့ပြီ။”၊ ” အိတ်က အဏုမြူမှန်ပြောင်းနဲ့ ကြည့်မှမြင်ရတာမလို့ ပိုက်ဆံကိုလည်း မိုက်ခရိုဒေါ်လာနဲ့ ပေးချေလို့ရမလား” လို့ စသဖြင့် နောက်ပြောင်မှတ်ချက်ပြုခဲ့ကြပါတယ်။
Ref; CNA
