MT News
Written by Nay Moe
အပြည်ပြည်ဆိုင်ရာ ငွေကြေးစုံစမ်းထောက်လှမ်းရေးတပ်ဖွဲ့ (FATF) ၏ အရေးယူခံရမှုမှာ အီရန်နှင့် မြောက်ကိုရီးယားကဲ့သို့ တန်းတူမဟုတ်ကြောင်းနှင့် ငွေကြေးစျေးကွက်မသမာမှုများလုပ်ဆောင်ပါက အရေးယူမည်ဖြစ်ကြောင်း မြန်မာနိုင်ငံတော်ဗဟိုဘဏ်က ထုတ်ပြန် သည်။
ဗဟိုဘဏ်၏ ထုတ်ပြန်ချက်အရ FATF ၏ မျက်နှာစုံညီအစည်းအဝေးကို အောက်တိုဘာ ၂၀ ရက်နှင့် ၂၁ ရက်တို့တွင် FATF ရုံးစိုက်ရာ ပြင်သစ်နိုင်ငံ၊ ပဲရစ်မြို့၌ ကျင်းပခဲ့သည်။ အဆိုပါ အစည်းအဝေးများသို့ မြန်မာကိုယ်စားလှယ်အဖွဲ့ ပါဝင်တက်ရောက်ခဲ့ပြီး နိုင်ငံတကာငွေကြေးရန်ပုံငွေအဖွဲ့၊ ကမ္ဘာလုံးဆိုင်ရာကွန်ရက်အဖွဲ့ဝင် ၁၀၆ ဦးနှင့် လေ့လာသူအဖွဲ့အစည်းများကို ကိုယ်စားပြုသော ကိုယ်စားလှယ်များ၊ ကုလသမဂ္ဂ၊ ကမ္ဘာ့ဘဏ်၊ INTERPOL နှင့် Egmont Group of Financial Intelligence Units တို့မှ ကိုယ်စားလှယ်များ တက်ရောက်ကြသည်။ မြန်မာနိုင်ငံနှင့်ပတ်သက်သော အချက်အလက်များကို FATF ဥက္ကဋ္ဌ T. Raja Kumar က ပြောဆိုခဲ့သည်။
FATF ဥက္ကဋ္ဌ၏ ပြောဆိုချက်အရ မြန်မာနိုင်ငံအား တိုးမြှင့်စောင့်ကြည့်ခွင့်ရှိသည့် နိုင်ငံနှင့် ဒေသများစာရင်း (Jurisdictions under increased monitoring) မှ စိစစ်ဆောင်ရွက်မှုများပြုလုပ်ရန် တောင်းဆိုခြင်းခံရသည့် အန္တရာယ် မြင့်မားမှုရှိသောနိုင်ငံနှင့် ဒေသများစာရင်း (High-Risk Jurisdictions subject to a Call for Action) သို့ ပြောင်းရွှေ့ထည့်သွင်းခြင်းခံရသော်လည်း လက်ရှိ Black List တွင် ရှိပြီးဖြစ်သည့် မြောက်ကိုရီးယားနိုင်ငံနှင့် အီရန်နိုင်ငံတို့ကဲ့သို့ FATF မှ အဖွဲ့ဝင်နိုင်ငံများနှင့် အခြားနိုင်ငံများမှ တိုးမြှင့်အရေးယူဆောင်ရွက်မှုများပြုလုပ်ရန် တောင်းဆိုခြင်းခံရသည့် နိုင်ငံနှင့်ဒေသများစာရင်း (Jurisdictions subject to a FATF call on its members and other jurisdictions to apply countermeasures) သို့ထည့်သွင်း၍ တန်းတူအရေးယူဆောင်ရွက်ခြင်းခံရမည့်အဆင့်မျိုး မဟုတ်ကြောင်းအသိပေးအပ်သည်ဟု ဗဟိုဘဏ်က ရှင်းပြသည်။
ထို့ပြင် မြန်မာနိုင်ငံအပါအဝင် ကမ္ဘာပေါ်ရှိ နိုင်ငံနှင့်ဒေသအားလုံးသည် FATF မှ ထုတ်ပြန်သည့် အကြံပြုချက် ၄၀ (40 Recommendations) ကို လိုက်နာဆောင်ရွက်ကြရသည်။ ယင်းအကြံပြုချက် ၄၀ တွင် ငွေကြေးခဝါချမှု တိုက်ဖျက်ရေး(Anti Money Laundering-AML)၊ အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေး (Countering the Financing of Terrorism-CFT) နှင့် လူအများအပြား သေကျေစေနိုင်သော လက်နက်များပြန့်ပွားစေရန် ငွေကြေးထောက်ပံ့မှုအပေါ် ဘဏ္ဍာရေးအရပစ်မှတ်ထားအရေးယူဆောင်ရွက်ရေး (Targeted Financial Sanction of Proliferation) စသည် တို့နှင့် သက်ဆိုင်သည့် လိုက်နာဆောင်ရွက်ရန်အချက်များဖြစ်သည်။ မြန်မာနိုင်ငံသည် FATF တွင် အဖွဲ့ဝင် နိုင်ငံမဟုတ်သော်လည်း FATF ပုံစံဖွဲ့စည်းထားသည့် ဒေသဆိုင်ရာအဖွဲ့တစ်ခု ဖြစ်သည့် အာရှပစိဖိတ် ဒေသငွေကြေးခဝါချမှုတိုက်ဖျက်ရေးအဖွဲ့ (Asia Pacific Group on Money Laundering-APG) တွင် အဖွဲ့ဝင်နိုင်ငံအဖြစ် ပါဝင်လျက်ရှိသည်။
မြန်မာနိုင်ငံအနေဖြင့် FATF ၏ အကြံပြုချက်များကို လိုက်နာဆောင်ရွက်လျက်ရှိရာ မူလ အကဲဖြတ်စဉ်က အကြံပြုချက် (၄၀) တွင် စံနှုန်းသတ်မှတ်ချက် အချက် (၂၀) ကျော်အားသတ်မှတ် ကာလအတွင်း ပြည့်မီမှုမရှိခဲ့သော်လည်း လက်ရှိအချိန်တွင် စံနှုန်းသတ်မှတ်ချက် (၂၄) ချက်ပြည့်မီ မှုရှိပြီးဖြစ်သည်။
မြန်မာနိုင်ငံသည် အလားတူစာရင်းတွင် ၂၀၁၁ ခုနှစ်၊ ဇွန်လမှ ၂၀၁၆ ခုနှစ်၊ ဖေဖော်ဝါရီလအထိ ရောက်ရှိခဲ့ပြီးပြန်လည်လွတ်မြောက်အောင်ဆောင်ရွက်ခဲ့သည့် ယခင်အတွေ့အကြုံ များအရ ယင်းစာရင်းမှ အလျင်အမြန်ပြန်လည်လွတ်မြောက်စေရန် စီမံဆောင်ရွက်လျက်ရှိရာ လာမည့် တစ်နှစ်အတွင်း ဆောင်ရွက်မည့် Action Plan ချမှတ်ရေးဆွဲပြီးဖြစ်သည်။
မြန်မာနိုင်ငံအနေဖြင့် ပြည်ပနှင့် ငွေကြေးလွှဲပြောင်းမှု ပြုလုပ်ရာတွင် ပြည်ပအဆက်အသွယ်ဘဏ်များက အလေးထားစိစစ်ခြင်းကို တိုးမြှင့်လုပ်ဆောင်ခြင်း (Enhance Due Diligence-EDD) ကိုသာ ကြုံတွေ့ကြရမည်ဖြစ်ရာ သက်ဆိုင်ရာဘဏ်များအနေဖြင့် လက်ရှိဆောင်ရွက်နေကျမေးခွန်းများ မေးမြန်းခြင်းနှင့် ငွေကြေးလွှဲပြောင်းမှုဆိုင်ရာ အထောက်အထားအချက်အလက်များ တောင်းခံခြင်း စသည်ဖြင့် ယခင်အတိုင်း ဆက်လက်ဆောင်ရွက်နိုင်မည်ဖြစ်သည်။ မြန်မာနိုင်ငံအား စိစစ်ဆောင်ရွက်မှုများ ပြုလုပ်ရန်တောင်းဆိုခြင်းခံရသည့် အန္တရာယ်မြင့်မားမှုရှိသော နိုင်ငံနှင့်ဒေသများစာရင်းတွင် ထည့် သွင်းခံရခြင်းသည် မြန်မာနိုင်ငံအတွက် စိုးရိမ်ဖွယ်ရာအခြေအနေမဟုတ်သည့်အတွက် ပြည်သူများ စိုးရိမ်မှုလွန်ကဲခြင်းများထားရှိရန်မလိုအပ်ဘဲ ယင်းသို့ထည့်သွင်းခံရမှုကို အကြောင်းပြု၍ ငွေကြေးဈေးကွက်အတွင်း မသမာမှုများ မပြုလုပ်ရန်နှင့် ဗဟိုဘဏ်၏ စည်းမျဉ်းစည်းကမ်းများနှင့် မကိုက်ညီသည့် ဆောင်ရွက်မှုများတွေ့ရှိရပါက လိုအပ်သလို အရေးယူဆောင်ရွက်မည်ဟု ဗဟိုဘဏ်က ထုတ်ပြန်ထားသည်။
