၁၆. ၆. ၂၀၂၃
Written By Thandar
Rapper အဆိုတော်လေး ပြုံးမြသွယ်ရဲ့ မိန်းကလေးဘက်ကနေ တစ်ဖက်သတ်သဘောကျတဲ့ ကောင်လေးအတွက် ရေးစပ်သီဆိုထားတဲ့ ‘YOU’ Music Video ထွက်ရှိမယ်လို့ MT News ကို ပြောပါတယ်။
သူမရဲ့ သီချင်းကို ကိုယ်တိုင်ရေး ကိုယ်တိုင် တီးခတ်ဖန်တီးထားပြီး ဇွန်လ ၁၈ ရက်မှာ Pyonn Mya Thwe / Poppy Pyonn YouTube Channel https://youtube.com/@pyonnmyathwepoppypyonn902 က တင်ဆက်ပေးမှာဖြစ်ပါတယ်။
“ညီမကိုယ်တိုင်ရေးတာဆိုတော့ မိန်းကလေး Point of View ကနေ သဘောကျတဲ့ပုံစံ ရေးဖြစ်တယ်။ စိတ်ကူးယဥ်ပြီးတော့ သီချင်းလေး ရေးဖြစ်တာပါ။ မိန်းကလေးဘက်ကနေ တစ်ဖက်သတ်သဘောကျနေတဲ့ ပုံစံမျိုးလေး ဖော်ကျူးထားပါတယ်။ မိန်းကလေးတွေ ခံစားချက်တူတဲ့သူတွေ နားထောင်ရင် သဘောကျလိမ့်မယ် ထင်ပါတယ်။ ပရိသတ်တွေရဲ့ ခံစားချက်တွေတိုက်ဆိုင်တဲ့ YOU သီချင်းလေးဖြစ်ရင် ကျေနပ်ပါတယ်”လို့ တေးသံရှင် ပြုံးမြသွယ်က MT News ကို ပြောပါတယ်။
အဆိုပါ Pop Pap Music အမျိုးအစားဖြစ်တဲ့ You သီချင်းကို ဒါရိုက်တာ JCZ က သရုပ်ဆောင်တွေဖြစ်တဲ့ အာပူကြူး ၊ ပြုံးမြသွယ်နဲ့ ခေးခေး တို့က ပါဝင်သရုပ်ဆောင်ထားကြပါတယ်။ သူမဟာ ကိုယ်တိုင်ရေး ကိုယ်ပိုင်သံစဥ် Single Song ၁၀ ပုဒ်နီးပါး ထွက်ရှိထားသူလည်း ဖြစ်ပါတယ်။ တစ်ကိုယ်တော် သီချင်းခွေထုတ် ဖြစ်ရင်တော့ Single Song ထွက်ရှိထားတဲ့ သီချင်းတွေ ထည့်သွင်းသွားမယ်လို့ သိရပါတယ်။ ပြုံးမြသွယ်ကတော့ လက်ရှိ အမေရိကားနိုင်ငံမှာ Berklee College of Music တက္ကသိုလ် ပထမနှစ်တက်ခဲ့ပြီး ဖြစ်ပါတယ်။
“ဒီသီချင်းလေး ပြည်ပမှာ ကျောင်းတက်ထဲက ရေးထားတဲ့ သီချင်းလေးပါ။ ဒီရောက်မှ တီးလုံးတွေလည်း ကိုယ်တိုင်တီးထားတယ်။ ပြန်ဆိုထားတာမို့ အရင် သီချင်းတွေထက် ပိုအားစိုက်ပြီး ဖန်တီးထားပါတယ်။ ကိုယ်တိုင် တီးခတ်ထားတာပါ။ ညီမရဲ့ ကျောင်းက သူငယ်ချင်းတစ်ယောက်က ဂစ်တာ Solo အပုဒ်တွေ တီးပေးတယ်။ သီချင်းလေးကို အားရကျေနပ်မိတယ်”လို့ သူမက ဆက်ပြောပါတယ်။
