သာဇင်ကျေးရွာသူကျေးရွာသားခုနစ်ဦးကို သတင်းပေးဟုခေါ်ဆိုသတ်ဖြတ်ခံခဲ့ရသည့် ကျေးရွာမြေပုံညွှန်း
MT News
Written by Min Mahar
စစ်ကိုင်းတိုင်း၊ စစ်ကိုင်းခရိုင်၊ စစ်ကိုင်းမြို့နယ် သာဇင်ကျေးရွာမှ ရွာသူရွာသားခုနစ်ဦးအား သတင်းပေးဟု စွပ်စွဲကာ PDF အဖွဲ့က ဖမ်းဆီးခေါ်ဆောင်သွားပြီး သတ်ဖြတ်မှု အောက်တိုဘာ ၁၉ ရက်နေ့က ဖြစ်ပွားခဲ့ကြောင်း သိရသည်။
ဖြစ်စဉ်မှာ အောက်တိုဘာ ၁၉ ရက် ည ၉ နာရီဝန်းကျင်ခန့်တွင် စစ်ကိုင်းမြို့နယ်၊ သာဇင်ကျေးရွာမှ ရွာသူရွာသား ၇ ဦးသည် ၎င်းတို့၏ နေအိမ် အသီးသီးတွင်ရှိနေစဉ် PDF အဖွဲ့မှ အင်အား ၂၀ ဦးခန့်က နေအိမ်များသို့ ရောက်ရှိလာပြီး အမျိုးသား ၄ ဦး ၊ အမျိုးသမီး ၃ ဦးတို့အား ခေါ်ဆောင်သွားကြောင်းနှင့် ၎င်းတို့ ၇ ဦးကို သာဇင်ကျေးရွာ၏ တောင်ဘက် ၂ မိုင်ခန့်အကွာ တောင်တောအုပ်(ဒေသအခေါ်)ထဲ၌ သေဆုံးနေသည့်အလောင်းများအား အောက်တိုဘာ၂၀ ရက် မနက် ၇ နာရီခန့်တွင် ရွာသားများကတွေ့ရှိခဲ့ကြောင်း ဒေသခံတစ်ဦး၏ ပြောဆိုချက်အရ သိရသည်။
“မနေ့ညက ဖမ်းသွားပြီး မနက်ကျမှ အလောင်းတွေကို တောထဲကပြန်တွေ့တာ။ သူတို့ကို တပ်သတင်းပေးဆိုပြီး ဖမ်းသွားကြတာ။ ဖမ်းပြီးသတ်ခံရတဲ့ ၇ ဦးက အမျိုးတွေချည်းပဲ။ PDF အဖွဲ့က အယောက် ၂၀ လောက်ပါမယ်။ အများကြီးပဲ”ဟု သာဇင်ကျေးရွာဘက်မှ ဒေသခံတစ်ဦးက ပြောသည်။
၎င်းတို့၏ အလောင်းများအား ကျေးရွာသူ/သားများမှ ကျေးရွာ ဓလေ့ထုံးစံအရ မီးသင်္ဂြိုလ်သွားမည်ဖြစ်ကြောင်းနှင့် လုံခြုံရေးတပ်ဖွဲ့ဝင်များအနေဖြင့် လာရောက်စစ်ဆေးခြင်းများ မပြုလုပ်ကြသေးကြောင်း သိရသည်။
စစ်ကိုင်း မြို့နယ် အတွင်း၌ ၂၀၂၁ ခုနှစ် ဖေဖော်ဝါရီ ၁ ရက်မှ ယနေ့အချိန်ထိ PDF များ၏ လုပ်ကြံသတ်ဖြတ်မှုကြောင့် ပြည်ခိုင်ဖြိုးပါတီဝင်နှင့် ဝန်းရံသူ ၅ ဦး သေဆုံး၊ ၁ ဦးဒဏ်ရာရ၊ အုပ်ချုပ်ရေးမှူး ၂ ဦး(သေဆုံး)၊ ၄ ဦး (ဒဏ်ရာရ)၊ ရပ်/ ကျေးအုပ်ချုပ်ရေးအဖွဲ့ဝင် ၃ ဦး (သေဆုံး)၊ ၃ ဦး (ဒဏ်ရာရ)၊ လုံခြုံရေး တပ်ဖွဲ့ဝင် ၁ ဦး(သေဆုံး)၊ လုံခြုံရေးတပ်ဖွဲ့ဝင် ၇ ဦး (ဒဏ်ရာရ)၊ သတင်းပေး( ဒလန်)ဟု စွပ်စွဲ၍ သတ်ဖြတ်ခံသည့်အရပ်သားယခုအပါအဝင် ၄၈ ဦး (သေဆုံး)၊ ဒဏ်ရာ ရရှိသူ ၁၅ ဦး၊ စုစုပေါင်း ၅၈ ဦး (သေဆုံး)၍ ၃၁ ဦး ဒဏ်ရာ ရရှိပြီးဖြစ်ကြောင်း သိရသည်။
