၁၃. ၆. ၂၀၂၃
Written by Nay Aung
မြန်မာနိုင်ငံသည် ကမ္ဘာ့နိုင်ငံများအနက် တရားမဝင်ငွေကြေးစီးဆင်းမှု Illicit Financial Flows (IFFs)နိုင်ငံများထဲတွင် ပါဝင်လျက်ရှိနေကြောင်း ကုလသမဂ္ဂအဖွဲ့စည်းတစ်ခုဖြစ်သော ကုန်သွယ်ရေးနှင့် ဖွံ့ဖြိုးရေးအဖွဲ့ UNCTAD ၏ ထုတ်ပြန်ချက်များအရ သိရသည်။
အဆိုပါ အဖွဲ့သည် ကမ္ဘာတဝှမ်းရှိ ဖွံ့ဖြိုးဆဲနိုင်ငံများ၏ ကုန်သွယ်မှုအကျိုးစီးပွားကို ရည်ရွယ်ဖွဲ့စည်းထားသော အဖွဲ့ဖြစ်ပြီးကမ္ဘာနိုင်ငံများအနက် တရားမဝင်ငွေကြေးစီးဆင်းမှု အများဆုံးနိုင်ငံစာရင်းကို ပြီးခဲ့သော ရက်ပိုင်းတွင် သတင်းထုတ်ပြန်ခဲ့ရာ မြန်မာနိုင်ငံပါဝင်လာခဲ့ခြင်းဖြစ်သည်။
UNCTAD ၏ ထုတ်ပြန်ချက်တွင်ဖော်ပြထားချက်အရ တရားမဝင်ငွေကြေးစီးဆင်းမှုအများဆုံးနိုင်ငံများထဲတွင် အာဖန်ဂန်နစ္စတန်၊ ဘင်္ဂလားဒေ့ရှ်၊ ကိုလံဘီယာ ၊အီကွေဒေါ၊ မော်လ်ဒိုက်၊ မက္ကဆီကို၊ မြန်မာ၊ နီပေါ၊ ပီရူးနိုင်ငံတို့ ပါဝင်လျက်ရှိနေကြောင်း သိရသည်။
တရားမဝင်ငွေကြေးစီးဆင်းမှု(IFFs) အဖြစ်သတ်မှတ်ရာတွင် မူးယစ်ဆေးဝါးရောင်းချမှုမှရရှိသောငွေများ၊ လူကုန်ကူးမှုများမှရရှိသောငွေများ၊ ရွှေ့ပြောင်းအလုပ်သမားများကို မှောင်ခိုကူးခြင်းမှ ရရှိသောငွေများကို တွက်ချက်ခြင်းဖြစ်ကြောင်း သိရသည်။
UNCTAD အဖွဲ့သည် အဆိုပါတရားမဝင်ငွေကြေး စီဆင်းမှု အများဆုံး နိုင်ငံများစာရင်းကို ထုတ်ပြန်ရာတွင် ကုလသမဂ္ဂ မူးယစ်နှင့်ရာဇဝတ်မှုဆိုင်ရာရုံး (UNODC) ၏ ကူညီထောက်ပံ့မှုများကို ရယူခဲ့ကြောင်း သိရသည်။
မြန်မာနိုင်ငံသည် ၂၀၁၈ ခုနှစ်မှ ၂၀၂၂ ခုနှစ်အတွင်း ပြည်ပနိုင်ငံများသို့ ဘိန်းတင်ပို့မှုများမှ အမေရိကန်ဒေါ်လာ ၅၀၈ သန်းနှင့် အမေရိကန်ဒေါ်လာ ၁၃၄၇သန်းအကြား ရရှိခဲ့ကြောင်း UNCTAD က ဖော်ပြထားသည်။
ဘင်္ဂလားဒေရှ့်နိုင်ငံသည် ၂၀၁၇ ခုနှစ်မှ ၂၀၂၁ ခုနှစ်အတွင်း စိတ်ကြွဆေးပြား၊ ဟီးရိုးအင်း၊ Synthetic Opioids အစရှိသော မူးယစ်ဆေးဝါးကုန်ကူးရာမှ အမေရိကန်ဒေါ်လာ ၄၈၁ သန်း ရရှိခဲ့ကြောင်း သိရသည်။ ထို့အပြင် အာဖန်ဂန်နစ္စတန်နိုင်ငံသည် ပြည်ပနိုင်ငံများသို့ ဘိန်းတင်ပို့ရာ ၂၀၁၈ ခုနှစ်မှ ၂၀၂၁ ခုနှစ်အတွင်း အမေရိကန်ဒေါ်လာ သန်း ၁၃၀၀ မှ အမေရိကန်ဒေါ်လာ ၂၂၃၃ သန်းအကြား ရရှိခဲ့ကြောင်း UNCTAD အဖွဲ့က ဆိုသည်။
မြန်မာနိုင်ငံသည် အာရှတိုက်အတွင်းရှိ နိုင်ငံများအနက် တရားမဝင်ငွေကြေးစီးဆင်းမှု အများဆုံးနိုင်ငံများထဲတွင် ပါဝင်လျက်ရှိနေကြောင်း UNCTAD အဖွဲ့၏ ထုတ်ပြန်ချက်များအရ သိရသည်။
Ref-UNCTAD
