၆. ၆. ၂၀၂၃
Photo Naing Thuta
ဗန်းမော်ဆရာတော်၏ ရုပ်ကလပ်တော်အား ယနေ့ ဇွန်လ ၆ ရက်တွင် ချမ်းမြသာစည်လေဆိပ်ဟောင်းအတွင်း မီးပူဇော်သွားမည်ဖြစ်ပြီး မီးပူဇော်ရန် ပင့်ဆောင်ရာ လမ်းများတစ်လျှောက် လမ်းဘေးဝဲယာမှ ဖူးမြော်ကြည်ညိုသူ များပြားခဲ့သည်။
နိုင်ငံတော်သံဃမဟာနာယကအဖွဲ့ဥက္ကဋ္ဌ၊ မန္တလေးတိုင်းဒေသကြီး မဟာအောင်မြေမြို့နယ်၊ မဟာနွယ်စဉ်ရပ်ကွက်၊ ဗန်းမော်ကျောင်းတိုက်ကြီး၏ ပဓာနနာယကဆရာတော် အဘိဓဇမဟာရဌဂုရု၊ အဘိဓဇအဂ္ဂမဟာသဒ္ဓမ္မဇောတိက ဘဒ္ဒန္တကုမာရာဘိဝံသ မဟာထေရ်မြတ်ကြီး သက်တော်(၉၄)နှစ်၊ သိက္ခာတော်(၇၄)ဝါသည် မြန်မာသက္ကရာဇ် ၁၃၈၅ ခုနှစ်၊ နယုန်လဆန်း ၇ ရက်၊ ၂ဝ၂၃ ခုနှစ်၊ မေလ ၂၅ ရက်၊ (ကြာသပတေးနေ့)၊ ည ၁၁ နာရီ ၁၁ မိနစ်တွင် ဘဝနတ်ထံ ပျံလွန်တော်မူခဲ့သည်။
ဆရာတော်ဘုရားကြီး၏ ဥတုဇရုပ်ကလာပ်တော် အန္တိမအဂ္ဂိဈာပနပူဇာသဘင် အခမ်းအနားကို နိုင်ငံတော်အဆင့်နှင့်လျော်ညီစွာ ၁၃၈၅ ခုနှစ်၊ နယုန်လပြည့်ကျော် ၄ ရက်၊ ၂၀၂၃ ခုနှစ်၊ ဇွန်လ ၆ ရက်၊ အင်္ဂါနေ့ နေ့လည် ၂ နာရီတွင် ဗန်းမော်ကျောင်းတိုက်ရှိ ယာယီစံကျောင်းတော်မှ လောင်တိုက်တော်တည်ရှိရာ ချမ်းမြသာစည်လေဆိပ်ဟောင်းသို့ ၃၉ လမ်းမှ ၇၃ လမ်းအတိုင်း၊ ၇၃ လမ်းမှ ၃၈ လမ်းအတိုင်း၊ ၃၈ လမ်းမှ ၇၈ လမ်းအတိုင်း၊ ၇၈ လမ်းမှ ချမ်းမြသာစည်လေဆိပ်ဟောင်းသို့ ပင့်ဆောင်သွားရာ လမ်းများတစ်လျှောက်တွင်လည်း လမ်းဘေးဝဲယာမှ နောက်ဆုံးဂါရဝ ဖူးမြော်ကြည်ညိုကြသူ များပြားခဲ့သည်။
