၅. ၆. ၂၀၂၃
Written by Nay Moe
မုံရွာမြို့ပြ ပြောက်ကျားတပ်ဖွဲ့များ၏ ခေါင်းဆောင် ဗိုလ်ဒဿစစ်ကူပေးရန်လာစဉ် လခရစစ်ကြောင်းနှင့်တိုးမိပြီး ပစ်ခတ်ခံရ၍ ဦးခေါင်းကျည်ထိ သေဆုံးခဲ့သည်။
“အလောင်းပြန်ရတယ်။ မနေ့က ချက်ခြင်းသင်္ဂြိုဟ်လိုက်တယ်။ ကျည်ထိတာက ပေါင်တစ်ချက်၊ ခေါင်းတစ်ချက်”ဟု ဒေသတွင်း PDF တပ်ဖွဲ့ဝင်တစ်ဦးက ဆိုသည်။
ဖြစ်စဉ်မှာ မုံရွာ UG တပ်ပေါင်းစုအဖွဲ့ခေါင်းဆောင် ဗိုလ်ဒဿသည် ဇွန်လ ၃ ရက် နေ့လည် ၂ နာရီခန့်က နဂါးတွင်းရွာဘက်တွင်ဖြစ်ပွားနေသော တိုက်ပွဲအချို့အတွက် စစ်ကူပေးရန် တစ်ဦးတည်းလက်နက်များဖြင့် ထွက်လာစဉ် နဂါးတွင်းရွာအနီးတွင် ကျည်နှစ်ချက်ထိမှန်ကာ ဦးခေါင်းပွင့်ထွက်ဒဏ်ရာဖြင့် ပွဲချင်းပြီးသေဆုံးခဲ့ပြီး ဗိုလ်ဒဿထံမှ ယူနီဖောင်းများ၊ သေနတ်နှင့် ကျည်များ သိမ်းယူခဲ့သော်လည်း အလောင်းချန်ခဲ့သောကြောင့် “ဒဿ Monywa PDF ပြောက်ကျားတပ်ဖွဲ့” အဖွဲ့ဝင်များက အလောင်းကောက်ကာ ဇွန်လ ၄ ရက် နံနက် ၈ နာရီခွဲတွင် အားချင်းမိုးကာဖြင့်ပတ်ကာ မြေမြှုပ် သင်္ဂြိုလ်လိုက်ရသည်ဟု သိရသည်။
“အခွင့်အရေးပေးချိန်မှာ ပြန်ပြီး အုတ်ဂူတည်ပေးဖို့ ဆုံးဖြတ်ထားတယ်” ဟု မုံရွာ PDF တစ်ဦးက ဆိုသည်။
