ဓာတ်ပုံ - ပြည်သာယာလူငယ် လူမှုကူညီရေးအသင်း
၁၇. ၅. ၂၀၂၃
Written by Hey Mar
မန္တလေးတိုင်းဒေသကြီး မိတ္ထီလာမြို့တွင် ညအချိန်ယာဥ်တစ်စီးအားတိုက်ပြီးမောင်းပြေးသည့် မြေသယ်ကား အရှိန်လွန်ကာ ချောက်ထဲပြုတ်ကျသဖြင့် ယာဥ်မောင်းသေဆုံးသည့်ဖြစ်စဥ် မေလ ၁၆ ရက် ညက ဖြစ်ပွားခဲ့ကြောင်း သိရသည်။
ဖြစ်စဥ်မှာ မိတ္ထီလာမြို့နယ် မုန်တိုင်ကျေးရွာအုပ်စု၊ လဲတောကျေးရွာအနီး၊ မိတ္ထီလာ-ကျောက်ပန်းတောင်းကားလမ်းမကြီးတွင် မေလ ၁၆ ရက် ည ၉ နာရီ ၃၀ မိနစ်ခန့်က မြေသယ်ကားတစ်စီး ချောက်အတွင်းကျနေကြောင်း တယ်လီဖုန်းဆက်သွယ် အကြောင်းကြားချက်အရ သက်ဆိုင်ရာအဖွဲ့အစည်းများနှင့် မိတ္ထီလာမြို့နယ်မီးသတ်စခန်းမှ ရှာဖွေကယ်ဆယ်ရေးယာဉ်(၁)စီး၊ သူနာတင်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များဖြင့် ရှာဖွေကယ်ဆယ်ရေးလုပ်ငန်းများ ဆောင်ရွက်ခဲ့ကြောင်း သိရသည်။
အဆိုပါ မြေသယ်ယာဥ်သည် Alphard ယာဥ်ကို ပွတ်တိုက်မိပြီး မောင်းနှင်ပြေးသဖြင့် အဆိုပါယာဥ်နောက်မှ ဖြေရှင်းရန်လိုက်လံတားဆီးကြရာတွင် မုန်တိုင်ရွာအကျော်တံတားနားအရောက် မြေသယ်ယာဥ်မှ Express ကားကို ကျော်တက်စဥ် လမ်းကျဉ်းသဖြင့် ဘီးချော်ကာ ချောက်ထဲကျသွားခြင်းဖြစ်ကြောင်း ပြည်သာယာလူငယ် လူမှုကူညီရေးအသင်းမှတာ၀န်ရှိသူထံမှသိရသည်။
အဆိုပါ ယာဉ်တိမ်းမှောက်မှုကြောင့် ယာဉ်ပေါ်ပါ ၃ ဦးအနက်မှ ယာဥ်မောင်းသူကျား(၁)ဦး (သေဆုံး)ပြီး ကျန် ၂ ဦးမှာထွက်ပြေးခဲ့ကြောင်း သိရသည်။ သေဆုံးရုပ်အလောင်းအား ပြည်သာယာလူမှုကူညီရေးအသင်းမှ မိတ္ထီလာပြည်သူ့ဆေးရုံကြီးသို့ ပို့ဆောင်ပေးခဲ့ရသည်ဟု သိရသည်။
