မိုခါမုန်တိုင်းကြောင့် ထိခိုက်ပျက်စီးခဲ့သည့် စစ်တွေမြို့သို့ တန်ချိန် ၁,၀၀၀ ကျော်ရှိ စားနပ်ရိက္ခာ၊ ဆောက်လုပ်ရေး၊ ဆက်သွယ်ရေးနှင့် ဆေးဝါးပစ္စည်းများ မေလ ၁၅ ရက်မှစ၍ စစ်ရေယာဥ်များဖြင့် စတင် ပို့ဆောင်

◾️ယနေ့တွင်လည်း တန်ချိန် ၁၀၀၀ ကျော်ရှိ ထောက်ပံ့ရေးပစ္စည်းများတင်ဆောင်၍ စစ်တွေသို့ စစ်ရေယာဥ်များ ထွက်ခွာ

၁၆. ၅. ၂၀၂၃
Written by Nyein Kyaw

အလွန့်အလွန်အားကောင်းသော ဆိုင်ကလုန်းမုန်တိုင်းမိုခါ ဖြတ်သန်းတိုက်ခတ်မှုကြောင့် ထိခိုက်ပျက်စီးခဲ့သည့် ရခိုင်ပြည်နယ်၊ စစ်တွေမြို့ရှိ မုန်တိုင်းဒဏ်သင့် ပြည်သူများအတွက် တန်ချိန် ၁,၀၅၀ ခန့်ရှိ စားနပ်ရိက္ခာများ၊ ဆောက်လုပ်ရေးပစ္စည်းများ၊ ဆက်သွယ်ရေးပစ္စည်းများနှင့် ဆေးဝါးပစ္စည်းများကို မေလ ၁၅ ရက်မှစတင်၍ စစ်ရေယာဥ်များဖြင့် ပို့ဆောင်လျက်ရှိကြောင်း နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့မှ ထုတ်ပြန်ထားသည်။

အလွန့်အလွန်အားကောင်းသော ဆိုင်ကလုန်းမုန်တိုင်း မိုခါ(MOCHA) ဖြတ်သန်းတိုက်ခတ်မှုကြောင့် ထိခိုက်ပျက်စီးဆုံးရှုံးမှုများဖြစ်ပေါ်ခဲ့သော ရခိုင်ပြည်နယ်၊ စစ်တွေမြို့ရှိ မုန်တိုင်းဒဏ်သင့်ပြည်သူများအား လိုအပ်သောပစ္စည်းများ ကူညီထောက်ပံ့မှုများ ပေးနိုင်ရန် စစ်ရေယာဥ် (၅၅၄)သည် တပ်မတော်(ရေ)မှ ကြက်ဥ ၅,၀၀၀ လုံး၊ ကြက်သား ၅၀၀ ပိဿာခန့်၊ ခေါက်ဆွဲခြောက် ၁၀၀ ဖာနှင့် တစ်လီတာရေသန့် ၆၀၀ ကတ်တို့အား တင်ဆောင်၍ ကူညီကယ်ဆယ်ရေးဆောင်ရွက်မည့် အဖွဲ့များနှင့်အတူ မေ ၁၅ ရက် နံနက် ၉ နာရီခွဲအချိန်တွင် အမှတ် (၆) ရေတပ်ဆိပ်ခံတံတား (ကျောက်ဖြူ)မှ ထွက်ခွာခဲ့ရာ အမှတ် (၁၄) ရေတပ်ဆိပ်ခံတံတား (စစ်တွေမြို့)သို့ ညနေ ၃ နာရီခွဲတွင် ရောက်ရှိခဲ့ပြီး သယ်ဆောင်လာသောသည့် ကြက်ဥ၊ ကြက်သား၊ ခေါက်ဆွဲခြောက်နှင့် ရေသန့်ဘူးများအား မုန်တိုင်းဒဏ်သင့်ပြည်သူများထံသို့ ပေးဝေခဲ့ပြီး ရသေ့တောင်ရှိ မုန်တိုင်းဒဏ်သင့် ပြည်သူများအတွက် ထောက်ပံ့‌ရေးပစ္စည်းများ ဆက်လက်ပို့ဆောင်သွားမည်ဖြစ်သည်။

အလားတူ စစ်ရေယာဥ်(မုတ္တမ)သည် ကာကွယ်ရေးဦးစီးချုပ်ရုံး(ကြည်း)မှ ၅ ဦးစာ ရိက္ခာထုတ် ၆,၀၀၀ ထုတ် (၆၀ တန်ခန့်)၊ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှ ဆန်အိတ် ၁၂,၀၀၀ အိတ် (၆၀၀ တန်)၊ တာပေါ်လင်လိတ် ၁,၀၀၀ လိတ် (၃၇ တန်)၊ နိုင်ငံတော်စီမံအုပ်ရေးကောင်စီဥက္ကဋ္ဌရုံးမှ ဆန် ၅ ပြည်ဝင်အိတ် ၁၀,၀၀၀ အိတ် (၁၀၅ တန်ခန့်)၊ မြန်မာ့စီးပွားရေးဦးပိုင်အများနှင့်သက်ဆိုင်သော ကုမ္ပဏီလီမိတက်မှ ဆောက်လုပ်ရေးလုပ်ငန်းသုံးပစ္စည်းများဖြစ်သည့် အိမ်ရိုက်သံ ၃၅ တန်၊ သွပ် ၄၀,၀၀၀ ချပ် (၁၆၀ တန်)၊ ပို့ဆောင်ရေးနှင့် ဆက်သွယ်ရေးဝန်ကြီးဌာနမှ MPT Mobile ကား တစ်စီး (၅ တန်)၊ ဆက်သွယ်ရေးတာဝါတိုင်နှင့် ဆက်စပ်ပစ္စည်း ၁၇ တန်၊ စုစုပေါင်း ၁,၀၁၉ တန်ခန့်အား ဗိုလ်အောင်ကျော်ဆိပ်ကမ်းတွင်လည်းကောင်း၊ စစ်ရေယာဥ် (မဟာဗန္ဓုလ)သည် ကာကွယ်ရေးဦးစီးချုပ်ရုံး(ရေ)မှ ခေါက်ဆွဲခြောက် ၁၁၃ ဖာ၊ ဓာတ်ဆားထုတ် ၈,၈၀၀ ထုတ်၊ ကြက်ဥ ၅,၀၀၀ လုံး၊ ရေသန့်နှင့် အသား/ငါးများ၊ ငါးပိ ၁၀၀ ပိဿာ၊ ငါးခြောက် ၈,၀၀၀ပိဿာ၊ ရန်ကုန်တိုင်းစစ်ဌာနချုပ်မှ ကြက်ဥ ၁၀,၀၀၀ လုံး၊ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှ ဆန်အိတ် ၅၀၀ အိတ် (၂၅ တန်)၊ စုစုပေါင်း ၂၈ ဒသမ ၂ တန်ခန့်အား အမှတ် ၉၄) ရေတပ်ဆိပ်ခံတံတားတွင်လည်းကောင်းတင်ဆောင်လျက်ရှိပြီး ကူညီကယ်ဆယ်ရေးဆောင်ရွက်မည့် အဖွဲ့များအား တင်ဆောင်၍ မေ ၁၆ ရက်တွင် ရခိုင်ပြည်နယ်၊ စစ်တွေမြို့သို့ ပို့ဆောင်ရန် ထွက်ခွာသွားမည်ဖြစ်သည်။

အဆိုပါတပ်မတော်(ရေ)မှ စစ်ရေယာဥ်များပေါ်သို့ ကူညီကယ်ဆယ်ရေးပစ္စည်းများ ထောက်ပံ့ပစ္စည်းများ တင်ဆောင်နေမှုများကို မေ ၁၆ ရက်တွင် ရန်ကုန်တိုင်းစစ်ဌာနချုပ်တိုင်းမှူး ဗိုလ်ချုပ်ဇော်ဟိန်းနှင့် တာဝန်ရှိသူများက သွား‌ရောက်ကြည့်ရှုစစ်ဆေးခဲ့သည်။

ထို့အတူ တပ်မတော်(ရေ)မှ စစ်ရေယာဥ်များဖြင့် မုန်တိုင်းဒဏ်သင့်ပြည်သူများအတွက် လိုအပ်သော ကူညီထောက်ပံ့ရေးပစ္စည်းများတင်ဆောင်၍ ရခိုင်ပြည်နယ်ရှိ မုန်တိုင်းဒဏ်သင့်မြို့နှင့် ကျေးရွာများသို့ ဆက်လက်ပို့ဆောင်နိုင်ရေး စီစဥ်ဆောက်ရွက်လျက်ရှိကြောင်း သိရသည်။