ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့သည့်သံသယဖြစ်ဖွယ်ငွေစာရင်းများကို ဘဏ်များက စာရင်းပိတ်သိမ်းနေပြီး နိုင်ငံ့ဘဏ္ဍာအဖြစ် အပ်နှံနေ

၁၇. ၁၀. ၂၀၂၂

Written by Tha Doe

ပုဂ္ဂလိကဘဏ်များအနေဖြင့် သံသယဖြစ်ဖွယ်ငွေစာရင်းများကို ပိတ်သိမ်းနေပြီး နိုင််ငံ့ဘဏ္ဍာအဖြစ် အပ်နှံနေသည်ဟု မြန်မာနိုင်ငံဘဏ်များအသင်းက ယနေ့တွင် ကြေညာချက်ထုတ်ပြန်ထားသည်။

မြန်မာနိုင်ငံဘဏ်များအသင်း/ အသင်းဝင်ဘဏ်များအနေဖြင့် မြန်မာနိုင်ငံတော်ဗဟိုဘဏ်(CBM) မှတစ်ဆင့် ငွေကြေးဆိုင်ရာ စုံစမ်းထောက်လှမ်းရေးအဖွဲ့(FIU) မှတောင်းခံလာသည့် ငွေကြေးခဝါချမှု/အကြမ်းဖက်မှုကို ငွေကြေးထောက်ပံ့မှုနှင့် စပ်လျဉ်း၍ သံသယဖြစ်ဖွယ် ဘဏ်နှင့် ဆက်သွယ်ဆောင်ရွက်သူများနှင့် ပတ်သက်သော သတင်းအချက် အလက်များအား အချိန်နှင့်တစ်ပြေးညီ တင်ပြပေးပို့ရသည်။ အဆိုပါသတင်းပေးပို့ချက်များနှင့်စပ်လျဉ်း၍ Law Enforcement အဖွဲ့များနှင့် မြန်မာနိုင်ငံတော်ဗဟိုဘဏ်တို့မှ ထပ်မံတောင်းခံလာသည့် သတင်းအချက်အလက်များကို ထပ်မံပေးပို့ခြင်း၊ FIU နှင့် CBM တို့မှ ညွှန်ကြားချက်များအတိုင်း သံသယဖြစ်ဖွယ်ဘဏ်နှင့် ဆက်သွယ် ဆောင်ရွက်သူများ၏ ငွေစာရင်းများအား ယာယီငွေသွင်း/ ငွေထုတ် တားမြစ်ခြင်း၊ အပြီးတိုင် ငွေစာရင်း ပိတ်သိမ်းခြင်းများကို တိကျစွာ လိုက်နာဆောင်ရွက်ထားသည်။

ထို့ပြင် တရားရုံး၏ ဆုံးဖြတ်ချက်အရ နိုင်ငံ့ဘဏ္ဍာအဖြစ် သိမ်းဆည်းရန်ကိစ္စရပ်များကိုလည်း ညွှန်ကြားချက် အတိုင်း စာရင်းပိတ်သိမ်းဆည်း၍ နိုင်ငံတော်သို့အပ်နှံခြင်းများကိုလည်း ဆောင်ရွက်နေသည်ဟု သိရသည်။

ထိုသို့ စာရင်းပိတ်သိမ်းခြင်းဆိုင်ရာလုပ်ဆောင်ချက်များမှာ ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေး (AML/CFT) ဆိုင်ရာ လိုက်နာဆောင်ရွက်ရမည့်ကိစ္စရပ်များကို အထူးအလေးပေး ကြပ်မတ်ထိန်းကျောင်းဆောင်ရွက်ရာတွင် AML/CFT ဆိုင်ရာ သတင်းပို့အဖွဲ့အစည်းအဖြစ် သတ်မှတ်ခံထားရသည့် ဘဏ်များအနေဖြင့် မြန်မာနိုင်ငံတော်ဗဟိုဘဏ်မှ ထုတ်ပြန်ထားသည့် စည်းမျဉ်း၊ စည်းကမ်းများ၊ ငွေကြေးဆိုင်ရာ စုံစမ်းထောက်လှမ်းရေး အဖွဲ့ (Financial Intelligence Unit – FIU) မှ ထုတ်ပြန်ထားသည့် အမိန့်၊ ညွှန်ကြားချက်များအား တိကျစွာလိုက်နာကြရန် တာဝန်ရှိ၍ဖြစ်သည်။

အလားတူ လူအများအပြားကို သေကျေစေသော လက်နက်ပြန့်ပွားမှုကို ငွေကြေး ထောက်ပံ့မှုနှင့် စပ်လျဉ်း၍ ပစ်မှတ်ထားသည့် ငွေကြေးဆိုင်ရာ အရေးယူမှုများ လိုက်နာဆောင်ရွက်နိုင်စေရန်အတွက်လည်း အသင်းဝင်ဘဏ်များမှ လိုက်နာဆောင်ရွက်ရေးအတွက် မြန်မာနိုင်ငံဘဏ်များအသင်းက လုပ်ဆောင်နေသည်ဟု အဆိုပါ ကြေညာချက်တွင်ဖော်ပြထားသည်။

”ငွေကြေးခဝါချမှုနဲ့ အကြမ်းဖက်မှုကို ငွေကြေးထောက်ပံ့တာ တိုက်ဖျက်ဖို့ ပျက်ကွက်တဲ့အတွက် ကမ္ဘာ့ဘဏ္ဍာရေးစောင့်ကြည့်အဖွဲ့ (Financial Action Task Force-FATF) က မြန်မာနိုင်ငံကို အမည်ပျက်စာရင်းမှာ ထည့်သွင်းဖို့ ဆုံးဖြတ်နိုင်တယ်လို့ မီဒီယာတွေက ရေးလာကြတာပေါ့။ အဲဒီ FATF ရဲ့ အရေးယူချက်မှာဆို ဝင်ငွေရလမ်းမပြနိုင်တဲ့ငွေတွေ စီးဆင်းမှုတွေ၊ ဘိန်းတို့ကျောက်စိမ်းတို့ ကုန်ကူးပြီး ငွေမည်းခဝါချတာတို့အပြင် လက်နက်မှောင်ခိုကူးတာ၊ အကြမ်းဖက်တွေကို ငွေကြေးထောက်ပံ့တာ၊ လူအများအပြားကိုသေကြေစေတဲ့ လက်နက်ပြန့်ပွားမှုကို ငွေကြေးထောက်ပံ့တာတွေလည်းပါတယ်။ ဒီတော့ အမည်ပျက်စာရင်းမဝင်ဖို့ အစိုးရက အရေးယူချိန်မှာ သူကအကြမ်းဖက်လို့သတ်မှတ်ထားတဲ့ NUG တို့ PDF တို့ကို လှူနေတယ်ယူဆရတဲ့အကောင့်တွေပါ အပိတ်ခံရတာပေါ့။ လောလောဆယ်အပိတ်ခံရတာကို Complain တက်တာကနေ ပြန်စစ်ဆေးလို့ သူတို့က တကယ် NUG နဲ့ PDF တွေ လှူနေတာလို့ ပေါ်ပေါက်ရင် အကြမ်းဖက်ဥပဒေတွေနဲ့ပါ အရေးယူရတာမျိုး ဆက်ဖြစ်နိုင်တာပေါ့” ဟု ဘဏ်လုပ်ငန်းကျွမ်းကျင်သူတစ်ဦးက MT News ၏ မေးမြန်းမှုကို ဖြေကြားသည်။

FATF တွင် စံချိန်စံညွှန်းနှင့်အညီလုပ်ဆောင်သည့် White Lisi၊ စောင့်ကြည့်နိုင်ငံများစာရင်း (Gray List) နှင့် အမည်ပျက်စာရင်း (Black List) ဆိုကာ အဆင့်သုံးဆင့်ရှိနေပြီး လက်ရှိအမည်ပျက်စာရင်းတွင် မြောက်ကိုရီးယားနှင့် အီရန်တို့သာရှိနေသည်။ FATF ၏ အမည်ပျက်စာရင်းသို့ မြန်မာနိုင်ငံရောက်ရှိသွားပါက နိုင်ငံတကာနှင့် ဆက်သွယ်လုပ်ဆောင်ရသည့် ငွေကြေးစီးဆင်းမှုများ၊ ကုန်သွယ်မှုကဏ္ဍများ၊ နိုင်ငံတကာတွင် ဖွင့်လှစ်ထားသည့် မြန်မာလုပ်ငန်းရှင်များ၏ ဘဏ်အကောင့်ပိတ်သိမ်းခံရမှုများနှင့် ငွေစီးဆင်းမှုဆိုင်ရာ အခက်အခဲအများအပြား ကြုံလာရမည်ဖြစ်၍ တိုင်းပြည်၏ စီးပွားရေးအပေါ်  ကြီးစွာထိခိုက်နိုင်သည့် အခြေအနေဖြစ်ပေါ်လာမည်ဖြစ်သည်။