MT News
Written By Thandar
Galaxy Star 2017 ကနေ ပရိသတ်အားပေးမှုရရှိလာတဲ့ Winner ဆုရှင် တေးသံရှင်နေမင်းအိမ်က မေ ၁၄ ရက်မှာ ထွက်ရှိခဲ့တဲ့ အချစ်သီချင်း ပုံစံ “ကျဉ်းထဲကြပ်ထဲ”တေးသီချင်းက ပရိသတ်တွေလည်း ရင်ဘတ်ချင်းထိလိမ့်မယ်လို့ ထင်ပါတယ်လို့ MT News ကို ပြောပါတယ်။
“ဒီသီချင်းလေးက Rock သီချင်းလေးပါပဲ။ ချစ်သူ နှစ်ယောက်ကြားထဲမှာရှိနေတဲ့ ခံစားချက်လေး ကျဥ်းထဲကြပ်ထဲကိုရောက်နေတယ်။ ခံစားချက်အမှန် နင်သိဖို့ ရင်ဘတ်ချင်းနီးကပ်ဖို့ သိပ်အရေးကြီးလို့ မျှော်လင့်ချက် အဖြူအမည်း မသဲကွဲတဲ့ အခြေအနေထဲမှာ ငါ နာကျင်နေတာ မင်းမသိပါဆိုတဲ့ အချစ်သီချင်းလေးပါ။ ဒီ သီချင်းခေါင်းစဥ်ကတော့ ကိုထုံကြီးရေးထားတဲ့အတိုင်းလေးပဲ သဘောကျတယ်။ သူရေးပေးထားတဲ့ စာသား ပုံစံလေးလည်း ကြိုက်တယ်။ အရမ်းသဘောကျလို့ ဆိုဖြစ်တာပါ။ ပရိသတ်တွေလည်း ရင်ဘတ်ချင်းထိလိမ့်မယ်လို့ ထင်ပါတယ်” လို့ နေမင်းအိမ်က MT News ကို ပြောပါတယ်။
တေးရေးထုံကြီးရေးသားပေးထားတဲ့ “ကျဉ်းထဲကြပ်ထဲ သီချင်းက Rock Music အမျိုးအစားဖြစ်ပြီး Lyric Video ပုံစံရိုက်ကူးတင်ဆက်ပေးသွားမယ်လို့ ဆိုပါတယ်။ ဒီသီချင်းကို Legacy Music Network ၊ YouTube Channel တွေမှာ မေလ ၁၄ ရက်မှာ တင်ပေးသွားမှာဖြစ်ပါတယ်။ ဒါ့အပြင် Tay Than Tar Application ကလည်း ကိုယ်ပိုင်သံစဥ်သီချင်းသစ်တွေ ထွက်ရှိဖို့ စီစဥ်နေတယ်လို့ သိရပါတယ်။
“လူပျောက်ကြော်ငြာက 1 million အထိ ပရိသတ်အားပေးမှုရခဲ့ပေမယ့် ဒီသီချင်းကတော့ Own Tune မို့လို့ ပရိသတ် အားပေးမှုကို မပြောတတ်သေးပါဘူး။ အရင် လူပျောက်ကြော်ငြာက M United Entertainment စီစဥ်ပေးလို့ ပြန်ဆိုဖြစ်တာပါ။ ဒီ Own Tune သီချင်းဖြစ်လို့ အသစ်တွေကို မျှော်နေသူတွေအတွက် အဆင်ပြေမယ့် သီချင်းလို့မျှော်လင့်ပါတယ်။ ခေတ်အခြေအနေအရ Album ထွက်ဖို့က အဆင်မပြေလောက်လို့ သီချင်းတစ်ပုဒ်ဆီပဲ ထပ်ထွက်ဖြစ်ဖို့ရှိပါတယ်”လို့ သူကဆက်ပြောပါတယ်။
