MT News
Written by Pan Ei
ကမ္ဘောဒီးယားနိုင်ငံက အိမ်ရှင်အဖြစ်လက်ခံကျင်းပနေတဲ့ ၃၂ ကြိမ်မြောက်ဆီးဂိမ်းစ်ပွဲရဲ့ Mobile Legends Bang Bang (MLBB) ရဲ့ တတိယနေရာလုပွဲမှာ အိမ်ရှင် ကမ္ဘောဒီးယားအသင်းနဲ့ မြန်မာ MLBB ကိုယ်စားပြုအသင်း Falcon Esports တို့ ယှဉ်ပြိုင်ခဲ့ရာမှာ မြန်မာအသင်းက အနိုင်ရရှိခဲ့ပြီး ကြေးတံဆိပ်ကို ဆွတ်ခူးနိုင်ခဲ့ပြီပဲ ဖြစ်ပါတယ်။
မေလ ၁၂ရက်ကနေ ၁၄ ရက်နေ့အထိ ကျင်းပခဲ့တဲ့ ဆီးဂိမ်းစ် MLBB ပွဲစဉ်တွေတစ်လျှောက်မှာ တစ်ပွဲသာရှုံးနိမ့်ခဲ့တဲ့ မြန်မာအသင်းအနေနဲ့ ကြေးဆုကို သိမ်းပိုက်နိုင်ခဲ့တဲ့အပြင် ဒီဆုဟာလည်း မြန်မာအသင်းအနေနဲ့ ဆီးဂိမ်းစ် MLBB သမိုင်းတစ်လျှောက်မှာ ပထမဆုံးအကြိမ်အဖြစ် ရရှိခဲ့တဲ့ ဆုလည်းဖြစ်ပါတယ်။
ဒီနေ့ပွဲစဉ်မှာ Best of 3 ယှဉ်ပြိုင်ကစားခဲ့ရာမှာတော့ မြန်မာအသင်း ကစားသမားတွေရဲ့ ကြိုးစားမှုတွေနဲ့အတူ ပထမနိုင်ပွဲနှစ်ပွဲကို ဆက်တိုက်အရယူခဲ့တာပါ။
ဖိုင်နယ်ပွဲစဉ်မှာတော့ ဆီမီးဖိုင်နယ်ပထမပွဲစဉ်မှာ အနိုင်ရရှိခဲ့တဲ့ မလေးရှားအသင်းနဲ့ ဒုတိယပွဲစဉ်မှာ အနိုင်ရရှိခဲ့တဲ့ ဖိလစ်ပိုင်အသင်းတို့က မကြာမီမှာ ဆက်လက်ယှဉ်ပြိုင်သွားကြမှာပါပဲ ဖြစ်ပါတယ်။
မြန်မာ့လက်ရွေးစင်အနေနဲ့ ကြိုးစားယှဉ်ပြိုင်ခဲ့တဲ့ Falcon Esports ဟာ ကြေးဆုနဲ့သာ ကျေနပ်ခဲ့ရပေမဲ့လည်း ပရိသတ်တွေကတော့ အားပေးဂုဏ်ပြုလျက်ရှိနေကြပါတယ်။
