၁၃. ၅. ၂၀၂၃
Written by Pan Ei
၃၂ ကြိမ်မြောက် ကမ္ဘောဒီးယားဆီးဂိမ်းစ်ရဲ့ Mobile Legends Bang Bang (MLBB) ရဲ့ အုပ်စုပွဲစဉ် ဒုတိယနေ့ရဲ့ ပထမပွဲစဉ်အနေနဲ့ အုပ်စု (B) ရဲ့ ထိပ်ဆုံးနှစ်သင်းဖြစ်တဲ့ အိမ်ရှင်ကမ္ဘောဒီးယားအသင်းနဲ့ မြန်မာကိုယ်စားပြုအသင်း Falcon Esports တို့ ယှဉ်ပြိုင်ခဲ့ရာမှာတော့ မြန်မာအသင်းက အနိုင်ပွဲကို ထပ်မံပြီး အရယူသွားပြီပဲ ဖြစ်ပါတယ်။
စင်ကာပူ MPL ကို သုံးနှစ်တိုင်တိုင် ရယူနိုင်ခဲ့တဲ့ စင်ကာပူလက်ရွေးစင်အသင်းနဲ့ MLBB လောကမှာ အစဉ်အလာကြီးတဲ့ အင်ဒိုနီးရှားအသင်းတို့ကို အိမ်ပြန်ပို့ပေးနိုင်ခဲ့တဲ့ မြန်မာအသင်းအနေနဲ့ အခုလည်း အိမ်ရှင်ကမ္ဘောဒီးယားအသင်းကို အနိုင်ယူနိုင်ခဲ့ပြီး ရှုံးပွဲမရှိ ရလဒ် ၃ မှတ်နဲ့အတူ အုပ်စုပထမနေရာကနေ ဆီမီးဖိုင်နယ်ကို တက်လှမ်းနိုင်ခဲ့ပြီပဲ ဖြစ်ပါတယ်။
ကမ္ဘောဒီးယားအသင်းနဲ့ မြန်မာအသင်းတို့ နှစ်သင်းစလုံးဟာ အုပ်စုတက်ပြီးသားဖြစ်ကြတဲ့အပြင် ရလဒ်၂ မှတ်တူ၊ လက်ရည်တူနေခဲ့ကြပြီး အခုပွဲမှာလည်း ပွဲချိန် ၂၃ မိနစ်ကျော်တဲ့အထိ အစွမ်းကုန်ယှဉ်ပြိုင်ခဲ့ကြတာပဲ ဖြစ်ပါတယ်။
ဒီနေ့ ညနေမှာတော့ ဆီးမီးဖိုင်နယ်ပွဲစဉ်တွေကို ယှဉ်ပြိုင်သွားကြမှာဖြစ်လို့ မြန်မာအသင်းရဲ့ ပွဲစဉ်တွေကို စောင့်မျှော်ကြည့်ရှုကြရဦးမှာပါ။
အုပ်စု (A) ကလည်း ဘယ်နိုင်ငံကိုယ်စားပြုအသင်းတွေက ဆီမီးဖိုင်နယ်ကိုတက်လာပြီး မြန်မာအသင်းအနေနဲ့လည်း ဘယ်အသင်းနဲ့ ဆီမီးဖိုင်နယ်မှာ ထိပ်တိုက်ယှဉ်ပြိုင်သွားရမလဲဆိုတာကို ရင်ခုန်စွာနဲ့ စောင့်မျှော်ကြည့်ရှုကြရဦးမှာပဲ ဖြစ်ပါတယ်။
