၁၀. ၅. ၂၀၂၃
Written by Naing Thuta
မြင်းခြံမြို့နယ်တွင် အမည်မသိအမျိုးသမီးတစ်ဦး သေနတ်ဒဏ်ရာ ၂ ချက်ဖြင့် သေဆုံးနေသည့်အလောင်း ယမန်နေ့မွန်းလွဲပိုင်းက တွေ့ရှိခဲ့ကြောင်း ဒေသခံများထံမှ သိရသည်။
ဖြစ်စဉ်မှာ မေလ ၉ ရက် မွန်းလွဲ ၂ နာရီခန့်က မန္တလေးတိုင်းဒေသကြီး၊ မြင်းခြံမြို့နယ်၊ သင်ပြွန်းကျေးရွာ၊ မြင်းခြံ-နွားထိုးကြီးသွားကားလမ်းဘေးမှ မြောက်ဘက်သင်ပြွန်းကျေးရွာသို့အဝင် ကျောက်ချောလမ်းတွင် အမည်မသိ အသက် ၅၅ နှစ်ခန့် အမျိုးသမီးတစ်ဦး သေနတ်ဒဏ်ရာ ၂ ချက်ဖြင့် သေဆုံးနေသည့် ရုပ်အလောင်းကို ရွာသားများကတွေ့ရှိ၍ သက်ဆိုင်ရာလုံခြံရေးတပ်ဖွဲ့ဝင်များကို အကြောင်းကြားပြီး လာရောက်စစ်ဆေးမှုများပြုလုပ်ကာ ရုပ်အလောင်းအား မွန်းလွဲ ၃ နာရီခန့်လွင် ဒေသခံလူမှုကူညီရေးအသင်းယာဉ်ဖြင့် မြင်းခြံခရိုင်ပြည်သူ့ဆေးရုံသို့ ပို့ဆောင်ထားရှိခဲ့ကြောင်း သိရသည်။
အဆိုပါအမျိုးသမီးသည် ယာနားထင်ပွင့်ထွက်ဒဏ်ရာ ၁ ချက်၊ ယာမေးအောက်ပွင့်ထွက်ဒဏ်ရာ ၁ ချက်ဖြင့် သေဆုံးနေကြောင်း စစ်ဆေးတွေ့ရှိရပြီး သေဆုံးသူအမည်မသိအမျိုးသမီး၏ အမည်/နေရပ်လိပ်စာများအား သိရှိနိုင်ရေးအတွက် လုံခြုံရေးတပ်ဖွဲ့ဝင်များက ပတ်ဝန်းကျင်ကျေးရွာများဖြစ်သည့် ညောင်ပင်ကျေးရွာ၊ သင်ပြွန်းကျေးရွာ၊ ပျိုးကန်ကျေးရွာ၊ ကန်ဆွယ်ကျေးရွာများသို့ လိုက်လံစုံစမ်းခဲ့သော်လည်း သေဆုံးသူ၏ ကိုယ်ရေးအချက်အလက် စုံစမ်းရရှိမှုမရှိသေးကြောင်း သိရသည်။
