ကမ္ဘောဒီးယား ဝန်ကြီးချုပ် မေတ္တာရပ်ခံချက်အရ ကမ္ဘောဒီးယား ဘောလုံးအဖွဲ့ချုပ် ဥက္ကဋ္ဌ နုတ်ထွက်ခြင်းမပြုဘဲ ဆက်လက်တာဝန်ထမ်းဆောင်မည်ဟု သိရ

၉. ၅. ၂၀၂၃
Translated by Htwe Ko Tun

ကမ္ဘောဒီးယား ဘောလုံးအဖွဲ့ချုပ် ဥက္ကဋ္ဌ တာဝန်မှ နုတ်ထွက်တော့မည်ဖြစ်ကြောင်း ကြေညာခဲ့သည့် ဆောင်းဆိုခါက ၎င်း၏ဆုံးဖြတ်ချက်အားပြန်လည်စဉ်းစားရန် ကမ္ဘောဒီးယားဝန်ကြီးချုပ်ဟွန်ဆန်က မေတ္တာရပ်ခံခဲ့ပြီးနောက်တွင်မူ ဥက္ကဋ္ဌ တာဝန်အား ဆက်လက်ထမ်းဆောင်သွားမည်ဖြစ်ကြောင်း မေလ ၉ ရက်တွင် ပြောကြားခဲ့သည်။

၃၂ ကြိမ်မြောက် အရှေ့တောင်အာရှအားကစားပြိုင်ပွဲ အမျိုးသားဘောလုံးပွဲအုပ်စုပွဲစဉ်၌ ကမ္ဘောဒီးယား ယူ-၂၂ အသင်းက မြန်မာယူ-၂၂ အသင်းကို မေလ ၇ ရက်၊ တနင်္ဂနွေနေ့က နှစ်ဂိုး ဂိုးမရှိဖြင့် ရှုံးနိမ့်ပြီးပြီးချင်းမှာပင် ကမ္ဘောဒီးယား ယူ-၂၂ အသင်းအဖို့ အကြိုဗိုလ်လုပွဲတက်ရန် မျှော်လင့်ချက်အနည်းငယ်သာ ကျန်ခဲ့ရသည့်အတွက် ၎င်း၏ ကတိအတိုင်း တာဝန်မှနုတ်ထွက်မည်ဟု ကမ္ဘောဒီးယား ဘောလုံးအဖွဲ့ချုပ်ဥက္ကဋ္ဌ ဆောင်းဆိုခါက လူမှုကွန်ရက် Facebook စာမျက်နှာတွင် ကြေညာခဲ့ခြင်းဖြစ်သည်။

ကမ္ဘောဒီးယားလက်နက်ကိုင်တပ်ဖွဲ့များ၏ ဒုတိယတပ်မှူးနှင့် အမျိုးသားဥပဒေထိန်းသိမ်းရေးနှင့် ပြည်တွင်းလုံခြုံရေးတပ်ဖွဲ့၏ တပ်မှူးလည်းဖြစ်သည့် ဗိုလ်ချုပ်ကြီးဆောင်းဆိုခါ က ကမ္ဘောဒီးယားယူ-၂၂ အသင်း အကြိုဗိုလ်ပွဲမရောက်ရှိခဲ့လျှင် ၎င်းအနေဖြင့် ကမ္ဘောဒီးယား ဘောလုံးအဖွဲ့ချုပ်ဥက္ကဋ္ဌ တာဝန်မှနုတ်ထွက်မည်ဟု ကြေညာခဲ့ဖူးသည်။ ထို့ကြောင့် မြန်မာအသင်းကို ရှုံးနိမ့်ချိန် ၎င်းပြုလုပ်ခဲ့သည့်ကတိအတိုင်း ကမ္ဘောဒီးယားဘောလုံးအဖွဲ့ချုပ်ဥက္ကဋ္ဌအဖြစ်မှ နုတ်ထွက်မည်ဟု မေလ ၇ ရက်တွင်ပင် ကြေညာခဲ့သည်။

သို့သော် မေလ ၈ ရက်တွင် ကမ္ဘောဒီးယားဝန်ကြီးချုပ် ဟွန်ဆန်က ဆောင်းဆိုခါထံ အသံသတင်းပို့ချက် တစ်ခုပို့ခဲ့ရာတွင် ဘောလုံးအဖွဲ့ချုပ်ဥက္ကဋ္ဌတာဝန်မှ နုတ်ထွက်ရန်ဆုံးဖြတ်ချက်ကို ပြန်လည်စဉ်းစားစေလိုကြောင်း၊ ကမ္ဘောဒီးယားဘောလုံးလောကတိုးတက်ရန် ခေါင်းဆောင်ခဲ့သူဖြစ်၍ ဤဆုံးဖြတ်ချက်အပေါ် ပြည်သူအများအပြားက စိတ်ပျက်၍ စိတ်မကောင်းဖြစ်နေကြကြောင်း ဖော်ပြခဲ့သည်။

ဝန်ကြီးချုပ်၏ မေတ္တာရပ်ခံချက်နှင့် ဘောလုံးပရိသတ်များ၏ တောင်းဆိုမှုများအရ ၎င်းအနေဖြင့် ကမ္ဘောဒီးယား ဘောလုံးအဖွဲ့ချုပ် ဥက္ကဋ္ဌ တာဝန်ကို ဆက်လက်ထမ်းဆောင်သွားမည်ဟု မေလ ၉ ရက်တွင် ကြေညာခဲ့ခြင်းဖြစ်သည်။

Ref—–Khmer Times