သက်သာသောဈေးနှုန်းဖြင့် အသင်းအဖွဲ့များ ရောင်းပေးသည့်ဆန်ကို ပြည်သူများ ဝယ်ယူနေမှုကို တွေ့ရစဉ် (ဓာတ်ပုံ-မြန်မာနိုင်ငံဆန်၊ စပါးကုန်သည်များအသင်း)
MT News
၈. ၅. ၂၀၂၃
ဘင်္ဂလားပင်လယ်အော်တွင် လက်ရှိဖြစ်ပေါ်နေသည့် မိုချာမုန်တိုင်းနှင့် ပတ်သက်ပြီး ဆန်စပါးလုပ်ငန်းလုပ်ကိုင်သူများ သတိပြုရန်နှင့် ဆန်စပါးဖူလုံမှု အပြည့်အဝ ရှိသဖြင့် စိုးရိမ်မှုမပြုရန်အပြင် စိုးရိမ်ပူပန်မှုဖြင့် ဝယ်ယူစုဆောင်းမှုများ မပြုလုပ်ပါရန်နှင့် လိုအပ်သော ပမာဏကိုသာ ဝယ်ယူပြီး ပစ္စည်းမှန်၊ စျေးနှုန်းမှန် ဝယ်ယူရရှိရန် အခက်အခဲရှိပါက ဆန်စပါးအသင်းချုပ်၊ ညီနောင်အသင်းများ၊ ကုန်စည်ဒိုင်များနှင့် ဆက်သွယ်နိုင်ကြောင်း မြန်မာနိုင်ငံဆန်စပါးအသင်းချုပ်က အသိပေးထားသည်။
ဘင်္ဂလားပင်လယ်အော်တွင် လတ်တလော ဖြစ်ပေါ်နေသော လေဖိအားနည်းရပ်ဝန်းမှ အားကောင်းသော ဆိုင်ကလုန်းမုန်တိုင်းအဖြစ် ပြောင်းလဲနိုင်ကြောင်းနှင့် သဘာဝဘေးအန္တရာယ် ကြိုတင်ပြင်ဆင်မှုများ ဆောင်ရွက်ထားသင့်ကြောင်း ပြည်တွင်း/ ပြည်ပ မိုးလေဝသ ကျွမ်းကျင်အဖွဲ့အစည်းများက ခန့်မှန်း ပြောဆိုနေသည်။ မြန်မာနိုင်ငံဆန်စပါးအသင်းချုပ် အနေဖြင့် အရန်ရိက္ခာ ဆန်စပါး စုဆောင်းထားရှိမှုများ၊ လိုအပ်သော စီစဉ်မှုများကို ကြိုတင်ညှိနှိုင်း ပြင်ဆင်ထားကြောင်း သိရသည်။
လက်ရှိ ဆန်စပါးလုပ်ငန်းလုပ်ကိုင်သူများအနေဖြင့် မိမိတို့၏ ဆန်စပါးများကို အမိုးအကာများအောက်နှင့် သဘာဝဘေးအန္တရာယ်မှ ကင်းလွတ်နိုင်မည့် နေရာများတွင် သိုလှောင်မှုကို စနစ်တကျ ကြိုတင် စီစဉ်ဆောင်ရွက်ထားရန်၊ သိုလှောင်ရုံအတွင်း အောက်ခြေတွင် ရေကြီးမှု၊ ရေဝင်ရောက်မှုများ ဖြစ်ပေါ်လေ့ရှိသဖြင့် အောက်ခြေ
မြှင့်ထားရန်၊ Dunnage, Pallet ခုံများဖြင့် လည်းကောင်း၊ အခြားသင့်တော်သော နည်းလမ်းများဖြင့် လည်းကောင်း ကြိုတင်စီစဉ်ထားပါရန်လည်း ဆန်အသင်းချုပ်က သတိပေးသည်။
ထို့ပြင် နွေစပါး ရိတ်သိမ်းပြီး/ရိတ်သိမ်းဆဲနှင့် ရိတ်သိမ်းရန် ရှိနေသော နေရာများ၊ အထူးသဖြင့် ကမ်းရိုးတန်း အနီးတဝိုက်ဒေသများတွင် နွေစပါး ရိတ်သိမ်းသိုလှောင်မှုများကို ဆန်စက်လုပ်ငန်းရှင်များ၊ ဆန်စပါးကုမ္ပဏီများ အနေဖြင့် ဒေသအုပ်ချုပ်ရေး အဖွဲ့များ၊ စိုက်ပျိုးရေးဦးစီးဌာနတို့ နှင့် ပူးပေါင်းညှိနှိုင်းပြိီး တောင်သူများကို တတ်နိုင်သမျှ ကူညီပေးနိုင်ရန်နှင့် သဘာဝဘေးအန္တရာယ်ကျရောက်မှု ဖြစ်ပေါ်ပါက Emergency Early Response ပြုလုပ်နိုင်ရန် အလို့ငှါ ဆန်လိုအပ်မှု ရှိပါက အသင်းချုပ် ရုံးချုပ်၊ ညီနောင်အသင်းများ၊ ကုန်စည်ဒိုင်များ နှင့် ဆက်သွယ်ညှိနှိုင်း တင်ပြပေးပါရန်လည်း ဆန်အသင်းချုပ် ထုတ်ပြန်ချက်တွင် ဖော်ပြထားသည်။
အလားတူ ဆန်စပါး စုဆောင်းထားမှု နှင့် ဆန်စပါးဖူလုံမှု အပြည့်အဝ ရှိသဖြင့် မိဘပြည်သူများ အနေဖြင့် စိုးရိမ်ပူပန်မှုဖြင့် ဝယ်ယူစုဆောင်းမှုများ မပြုလုပ်ပါရန် နှင့် လိုအပ်သော ပမာဏကိုသာ ဝယ်ယူပါရန်၊ ပစ္စည်းမှန်၊ စျေးနှုန်းမှန် ဝယ်ယူရရှိရန် အခက်အခဲရှိပါက အသင်းချုပ်၊ ညီနောင်အသင်းများ၊ ကုန်စည်ဒိုင်များနှင့် ဆက်သွယ်ပါရန်လည်း မြန်မာနိုင်ငံဆန်စပါးအသင်းချုပ်က ပန်ကြားသည်။
