၂၀. ၄. ၂၀၂၃
Written by Pan Ei
တောင်ကိုရီးယား နာမည်ကြီး အမျိုးသားအဆိုတော်အဖွဲ့ ASTRO ရဲ့ အဖွဲ့ဝင်တစ်ဦးဖြစ်ပြီး F4 ဇာတ်လမ်းတွဲထဲက ကလေးဘဝ သရုပ်ဆောင်တစ်ဦးဖြစ်တဲ့ အဆိုတော်၊ မင်းသား Moonbin ကို ဆိုးလ်မြို့ ဂန်နမ်း ခရိုင်မှာရှိတဲ့ သူ့ရဲ့နေအိမ်မှာ သေဆုံးလျက်ရှိနေတာကို ဧပြီလ ၁၉ ရက် ည ၈ နာရီဝန်းကျင်ခန့်က မန်နေဂျာဖြစ်သူမှ တွေ့ရှိခဲ့ကာ ရဲကိုချက်ချင်းဖုန်းဆက်အကြောင်းကြားခဲ့တယ်လို့ သိရပါတယ်။
ရဲတပ်ဖွဲ့က “Moonbin ဟာ ကိုယ့်ကိုကိုယ် အဆုံးစီရင်တယ်”လို့ ယူဆထားပြီး “သေဆုံးရတဲ့အကြောင်းရင်းကို တိတိကျကျဆုံးဖြတ်နိုင်ဖို့ လောလောဆယ်မှာတော့ အလောင်းခွဲစိတ်မှုပြုလုပ်နိုင်ခြေကို ကျွန်တော်တို့ ဆွေးနွေးနေပါတယ်။” လို့ ပြောကြားခဲ့ပါတယ်။
Astro ရဲ့ အေဂျင်စီဖြစ်တဲ့ Fantagio ကလည်း Moonbin ကွယ်လွန်သည်မှာ မှန်ကန်ကြောင်းအတည်ပြုခဲ့ပြီး “ဝမ်းနည်းကြေကွဲဖွယ်သတင်းကို ဖော်ပြလိုက်ရတဲ့အတွက် အရင်ဆုံးတောင်းပန်ချင်ပါတယ်။ ဧပြီလ ၁၉ ရက်နေ့မှာ ASTRO အဖွဲ့ဝင် Moonbin ဟာ ရုတ်တရက် ကျွန်တော်တို့အနားက စွန့်ခွာသွားခဲ့ပြီး ကောင်းကင်ယံမှာ ကြယ်လေးတစ်ပွင့်ဖြစ်သွားခဲ့ပါပြီ။ ချစ်လှစွာသော သား၊ မောင်နှမနဲ့ ခွဲခွာခဲ့ရတဲ့ ကျန်ရစ်သူမိသားစုရဲ့ ဝမ်းနည်းပူဆွေးမှုကို နှိုင်းယှဉ်လို့မရနိုင်ပေမဲ့ သူနဲ့ အချိန်အတော်ကြာ အတူလက်တွဲခဲ့တဲ့ အဖွဲ့ဝင်တွေနဲ့အတူ Fantagio မှ ဝန်ထမ်းတွေကလည်း ကြီးမားတဲ့ ဝမ်းနည်းပူဆွေးမှုတွေကြား ကွယ်လွန်သူအတွက် လေးလေးနက်နက် ဆုတောင်းပေးနေပါတယ်။” လို့ ထုတ်ပြန်ခဲ့ပါတယ်။
ကွယ်လွန်ချိန်မှာ အသက် ၂၅ နှစ်သာရှိသေးတဲ့ Moonbin ဟာ ၂၀၁၆ ခုနှစ်က စတင်ပွဲဦးထွက်ခဲ့တဲ့ ASTRO အဖွဲ့ရဲ့ အဖွဲ့ဝင်တစ်ဦးဖြစ်ပြီး အမျိုးသမီးကေပေါ့ပ် အဆိုတော်အဖွဲ့ Billlie ရဲ့ အဖွဲ့ဝင် Moon Sua ရဲ့ တစ်ဦးတည်းသော အစ်ကိုလည်း ဖြစ်ပါတယ်။ နာမည်ကြီး F4 ဇာတ်လမ်းတွဲထဲမှာ အိုးမင်းသားလေးလို့လူသိများတဲ့ ဆိုရီဂျောင်ရဲ့ ငယ်ဘဝ သရုပ်ဆောင်ခဲ့တဲ့ ကလေးသရုပ်ဆောင်လည်း ဖြစ်ခဲ့ပြီး ၂၀၁၉ ခုနှစ်က ထွက်ရှိခဲ့တဲ့ At Eighteen ဇာတ်လမ်းတွဲနဲ့လည်း မြန်မာပရိတ်သတ်တွေရဲ့ အားပေးမှုကို အရယူထားနိုင်သူတစ်ဦးလည်း ဖြစ်ပါတယ်။
Moonbin ရဲ့ ဈာပနကိုတော့ ကျန်ရစ်သူမိသားစုရဲ့ဆန္ဒနဲ့အညီ မိသားစု၊ ရင်းနှီးတဲ့ မိတ်ဆွေတွေ၊ အေဂျင်စီမှ လုပ်ဖော်ကိုင်ဖက်တွေနဲ့သာ တတ်နိုင်သမျှ တိတ်တိတ်ဆိတ်ဆိတ် ကျင်းပသွားမှာဖြစ်တယ်လို့ အေဂျင်စီက ထုတ်ပြန်ခဲ့ပါတယ်။
Ref; Soompi
