သင်္ကြန်အကြတ်နှင့် အတက် နှစ်ရက်တွင် အရက်သေစာသောက်စားပြီး ရွှေလီမြစ်အတွင်း ရေဆင်းကူးရာမှ ရေနစ်သူ လူငယ် ၂ ဦးအနက် တစ်ဦးသာ ရုပ်အလောင်းပြန်တွေ့

MT News
Written by Hey Mar

ဧပြီလ ၁၅ ရက် သင်္ကြန်အကြတ်နေ့နှင့် ဧပြီလ ၁၆ ရက် သင်္ကြန်အတက်နေ့ ၂ ရက်အတွင်း မြန်မာ-တရုတ်နှစ်နိုင်ငံနယ်စပ်ရှိ ရွှေလီမြစ်အတွင်းရေဆင်းကူးကြသော လူငယ်များ ရေနစ်သည့်ဖြစ်စဥ်ဖြစ်ပွားခဲ့ပြီး ၁ ဦးကို ရုပ်အလောင်းပြန်တွေ့ကာ တစ်ဦးပျောက်ဆုံးနေဆဲဖြစ်ကြောင်း ရှမ်းမြောက် အခြေစိုက် နှလုံးလှ ပရဟိတလူမှုကူညီကယ်ဆယ်ရေးအသင်းမှ သိရသည်။

“အကြတ်နေ့က ဖြစ်စဥ်ဆို ပထမတစ်ယောက်နစ်တာ ရှာမတွေ့သေးဘူး။ နောက်ထပ်တစ်ယောက်ရေနစ်တယ်ဆိုပြီး သတင်းပို့လို့ ထပ်ရှာရတယ်။ အဲဒါနဲ့ လူစုခွဲပြီး အလုပ်လုပ်ခဲ့ကြတယ်။ ညနေပိုင်းလေးနာရီအထိ ကြိုးစားရှာပေမဲ့​လည်း ရှာမတွေ့ခဲ့ပါဘူး။ မြစ်က ရေအရမ်းကြီးမနစ်တော့ပါဘူး။ နေရာတော်တော်များများ တချို့နေရာလေးတွေတော့ လူတစ်ရပ်မကနစ်ပါသေးတယ်။ အဲဒီနေ့ပဲ တတိယမြောက်နောက်တစ်ယောက်ထပ်နစ်လို့လိုက်ကယ်ကြတာ အသက်ရှင်လျက်ကယ်ဆယ်နိင်ခဲ့ပါတယ်”ဟု အဆိုပါအသင်း တာဝန်ရှိသူက ပြောသည်။

ရွှေလီမြစ်အတွင်း သင်္ကြန်ကာလ အရက်သေစာသောက်စားပျော်မြူးကြပြီး မြစ်ထဲ ရေဆင်းကူးရာမှ ယခုကဲ့သို့ ရေနစ်သေဆုံးမှုမျိုး နှစ်တိုင်းကြုံတွေ့ရလေ့ရှိကြောင်းလည်း သိရသည်။ သင်္ကြန်အတက်နေ့တွင်မူ ယမန်နေ့က ရေနစ်သူ၂ ဦးအနက် တစ်ဦးပြန်တွေ့ပြီဖြစ်ကာ တစ်ဦးမှာ ပျောက်ဆုံးနေဆဲဖြစ်ကြောင်း သိရသည်။