ကွေ့ကြောကို အရှိန်နှင့်ကွေ့သည့် ကားတစ်စီး လမ်းဘေးသစ်ပင်ဝင်တိုက်ကာ လေပေါ်မြောက်တက်ပြီး အိမ်ပေါ်ပြုတ်ကျမှု သာကေတမြို့နယ်တွင် ဖြစ်ပွား

၁၄. ၄. ၂၀၂၃
Written by Hey Mar

ရန်ကုန်တိုင်းဒေသကြီး သာကေတမြို့နယ် ရှုခင်းသာလမ်းမကြီး MOGE ဝန်းအရှေ့တွင် ယာဥ်တစ်စီးမှ လမ်းဘေးအုတ်တံတိုင်းကိုကျော်ကာ နေအိမ်တစ်လုံးပေါ် အရှိန်လွန်ကျော်တက်ပြုတ်ကျမှုတစ်ခု ယနေ့ ဧပြီလ ၁၄ ရက် မနက် ၁၀ နာရီဝန်းကျင်အချိန်က ဖြစ်ပွားခဲ့ကြောင်း သာကေတမြို့နယ်လူမှုကူညီရေးအဖွဲ့မှ သိရသည်။

ဖြစ်ပွားပုံမှာ အဆိုပါ ကားသည် သန်လျင်ဘက်မှ လာကာ ၅ ကွေ့ဘက်သို့အသွား ကွေ့ကြောကို အရှိန်ဖြင့်ကွေ့ခြင်းကြောင့် ဘေးကသစ်ပင်ကိုတိုက်မိပြီး အုတ်တံတိုင်းကျော်ကာ လေပေါ်မြောက်ပြီးနောက် အိမ်ပေါ်သို့ပြုတ်ကျခြင်းဖြစ်ကြောင်း အသင်းမှတာဝန်ရှိသူက MT News သို့ ပြောသည်။

ယာဥ်ပေါ်တွင် အမျိုးသား၂ ဦးပါရှိပြီး အသက်(၄၀)ဝန်းကျင်ခန့်၊ မစိုးရိမ်ရဒဏ်ရာများရရှိခဲ့ကြောင်း၊ ထိုလူနာအမျိုးသား(၂)ဦးအား မြေပြင်ကုသမှုများကို သာကေတလူမှုကူညီရေးအသင်းမှ လုပ်ဆောင်ပေးခဲ့ကြောင်း သ်ိရသည်။

ဖြစ်စဥ်နှင့်ပတ်သက်၍ သက်ဆိုင်ရာ တာဝန်ရှိသူများမှ လိုအပ်သည်ကိုများကို ဖြေရှင်းဆောင်ရွက်ပေးလျှက်ရှိကြောင်း သိရသည်။