၄. ၄. ၂၀၂၃
Written By Thandar
လက်ရှိ လူငယ်ပရိသတ်တွေကြားမှာ ရေပန်းစားနေတဲ့ အမျိုးသမီး DJ တီးခတ်သူ DJ Violet (ခ) ထွေးမွန်ကို ကချင်ပြည်နယ် မြစ်ကြီးနားလေဆိပ်မှာ ဖမ်းဆီးထိန်းသိမ်းလိုက်တယ်လို့ သိရပါတယ်။
ဒီသတင်းနဲ့ ပတ်သက်ပြီး DJ Violet က ရုပ်ရှင်သရုပ်ဆောင် နေမျိုးအောင်ရဲ့ ချွေးမဖြစ်တယ်လို့လည်း လူမူကွန်ရက်စာမျက်နှာတွေထက်မှာ သတင်းတွေပျံ့နှံ့နေတာလည်း ဖြစ်ပါတယ်။
သူမဟာ ဧပြီလ ၃ရက်နေ့က ကချင်ပြည်နယ် မြစ်ကြီးနားလေဆိပ်အရောက်မှာ တာဝန်ရှိသူတွေ စစ်ဆေးခံရပြီး ဖမ်းဆီးထိန်းသိမ်းခံရတာဖြစ်ပေမဲ့ DJ Violet ကို ဘယ်အတွက်ကြောင့် ဖမ်းဆီးခံရလဲဆိုတဲ့ အကြောင်းအရင်း အသေးစိတ်ကို သေချာ မသိရှိရသေးသလို MT News သတင်းဌာနကလည်း ဆက်လက်စုံစမ်းနေပါတယ်။
DJ Violet (ခ) ထွေးမွန်က ရုပ်ရှင်သရုပ်ဆောင် နေမျိုးအောင်ရဲ့ သားဖြစ်သူ မင်းထိုက်ရဲ့ ဇနီးလည်း ဖြစ်ပါတယ်။ သူမက မြစ်ကြီးနားမြို့ရှိ 813 Club မှာ ဧပြီလ ၂ ရက်နေ့နဲ့ ၃ ရက်နေ့တွေ DJ တီးခတ်မှာဖြစ်သလို ဧပြီလ ၃ ရက်နေ့က မန္တလေးမြို့ကနေ မြစ်ကြီးနားကို သွားမယ်လို့လည်း DJ Violet ရဲ့ Facebook ကနေ တရားဝင်ပရိသတ်ကို အသိပေးခဲ့တာဖြစ်ပါတယ်။
