MT News
Written by Min Mahar
ပခုက္ကူမြို့နယ်တွင် ဖေဖော်ဝါရီ ၂၅ ရက် ညဉ့်နက်ပိုင်းက အမျိုးသားတစ်ဦးအား PDF အဖွဲ့ဝင် ၁၅ ဦးခန့်က ဖမ်းဆီးခေါ်ဆောင်သွားပြီး သတ်ဖြတ်ခဲ့ကာ အလောင်းအား ဖေဖော်ဝါရီ ၂၆ ရက် မနက်မှ ပြန်တွေ့ခဲ့ကြောင်း ဒေသခံများထံမှ သိရသည်။
ဖြစ်စဉ်မှာ မကွေးတိုင်းဒေသကြီး၊ ပခုက္ကူမြို့နယ်၊ ကြီးရွာကျေးရွာတွင်နေထိုင်သည့် အသက် ၄၂ နှစ်အရွယ်ကွမ်းရောင်းဝယ်ရေးလုပ်ကိုင်သူနေအိမ်အား ဖေဖော်ဝါရီ ၂၅ ရက် ည ၁၁ နာရီ ၄၅ မိနစ်ခန့်က PDF အဖွဲ့မှ ၁၅ ဦးခန့်ရောက်ရှိလာပြီး အဆိုပါအမျိုးသားအားဖမ်းဆီးခေါ်ဆောင်သွားခဲ့သည်။ ထို့ကြောင့် ဖေဖော်ဝါရီ ၂၆ ရက် မနက်ပိုင်းတွင် မိသားစုဝင်များမှ လိုက်လံရှာဖွေခဲ့ရာ ကြီးရွာကျေးရွာ၏ အနောက်ဘက်ရှိ ကြီးရွာကျေးရွာနှင့် မြောက်လူးကန်ကျေးရွာသွားသည့်ကန်ဘောင်ပေါ်၌ ၎င်းအား သတ်ဖြတ်ထားသည်ကို တွေ့ရှိခဲ့ရကြောင်း သိရသည်။
ယင်းအမျိုးသားသည် ယာနားထင်ကိုထိုးသွင်းခံရသည့်ဒဏ်ရာ ၁ ချက်၊ ယာဘက်နားထင်ကို ကျည်ဖောက်ဝင်သားသည့်ဒဏ်ရာ ၁ ချက် (ဦးခေါင်းပွင့်ထွက်)၊ ဝဲဘက်လက်ခုံကို ဖောက်ဝင်ဒဏ်ရာ ၂ ချက်၊ ယာဘက်လက်ခုံဖောက်ဝင်ဒဏ်ရာ ၁ ချက်နှင့် ယာလက်မောင်းဖောက်ဝင်ဒဏ်ရာ ၃ ချက်တို့ အသီးသီးရရှိကာ သေဆုံးနေသောအလောင်းအားတွေ့ရှိရသည့်အတွက် ကျေးရွာရှိ နာရေးကူညီမှုအသင်းကားဖြင့် ဖေဖော်ဝါရီ ၂၆ ရက် နံနက် ၁၀ နာရီ ၄၅ မိနစ်တွင် ပခုက္ကူမြို့ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း အသတ်ခံရသည့် မိသားစုဝင်တစ်ဦးပြောပြချက်အရ သိရသည်။
အခင်းဖြစ်နေရာမှ M-22 ကျည် (7.62) ကျည်ခွံ(၈)ခု၊ ကျည်ဖူး (၂)ခု ၊ ကျည်(၁)တောင့်တို့အား သက်ဆိုင်ရာအဖွဲ့များမှ သိမ်းဆည်းခဲ့ကာ ကျေးရွာအနီးသို့ လိုက်လံစုံစမ်းမှုများပြုလုပ်ခဲ့ကြကြောင်း ရဲတပ်ဖွဲ့နှင့် နီးစပ်သည့်အသိုင်းအဝိုင်းထံမှ သိရသည်။
