အချိန်ခရီးသွား၊ အချစ်ဒရမ်မာ၊ ဟာသဇာတ်လမ်းလေးတွေကို ကြည့်ရှုရမယ့် Destiny Love: The Movie

 

Destiny Love ထဲမှာ နာမည်ကြီးသရုပ်ဆောင်တွေ ဖြစ်ကြပြီး မြန်မာပရိသတ်တွေနဲ့ ရင်းနှီးပြီးသားဖြစ်တဲ့ မင်းသား Thanavat Vatthanaputi ၊ ပရိသတ်အချစ်တော် မင်းသမီး Bella နဲ့ အဆိုတော် မင်းသားချော မင်းသား Paris တို့က အဓိက ဇာတ်ဆောင်တွေအနေနဲ့ ပါဝင်သရုပ်ဆောင်ထားကြပါတယ်။

 

ဒီဇာတ်ကားကို ဒါရိုက်တာ Adisorn Tresirikasem က ရိုက်ကူးဖန်တီးပေးထားတာဖြစ်ပြီး သမိုင်းနောက်ခံဇာတ်လမ်းတွေနဲ့အတူ အချစ်ဟာသရုပ်ရှင် ဇာတ်လမ်းအမျိုးအစားပဲဖြစ်ပါတယ်။

 

ဒီဇာတ်ကားထဲမှာတော့ အယုဒ္ဓယခေတ်မှာ စတင်တွေ့ဆုံခဲ့ကြပြီး ပျော်ရွှင်စွာနေထိုင်ခဲ့ကြတဲ့ ချစ်သူနှစ်ဦးဟာ သေဆုံးခြင်းတွေနဲ့အတူ ခွဲခွာခဲ့ကြရပြီး ရတနာကိုစင်ခေတ်မှာတော့ အပြုံးချိုတဲ့ လက်မှုပညာရှင်တစ်ယောက်ဖြစ်တဲ့ ဘော့ပ်နဲ့ ချောမောလှပလွန်းတဲ့ အမျိုးသမီးလေးတစ်ဦးဖြစ်တဲ့ ဂယ်ဆွန်တို့အနေနဲ့ အတူတူပြန်လည်မွေးဖွားလာခဲ့ကာ ဆုံစည်းခဲ့ကြပါတယ်။

 

ဘော့ပ်ဟာ နှစ်ပေါင်းကြာရှည်စွာ မက်ခဲ့ရတဲ့ အိမ်မက်ထဲက မိန်းကလေးနဲ့တူတဲ့ ဂယ်ဆွန်ကို အတိတ်ဘဝကချစ်ခဲ့ဖူးတဲ့ မိန်းကလေးဆိုပြီး ယုံကြည်ထားကာ ဂယ်ဆွန်ကတော့ အတိတ်ရေစက်တွေကို မယုံကြည်ခဲ့သလို အနာဂတ်ကနေ အချိန်ခရီးသွားပြီး ရောက်ရှိလာတဲ့ မေထပ်ဆိုတဲ့ လူငယ်လေးနဲ့ ဆုံလာကြတဲ့အခါမှာတော့ ဘော့ပ်ပြောတာတွေအတိုင်း ဂယ်ဆွန်ကယုံကြည်လာမလား အချိန်ခရီးသွားတာတွေနဲ့ ပတ်သက်ပြီးရော ဘာတွေဆက်ဖြစ်လာမလဲဆိုတာတွေကိုမတ်လ ၁ ရက်နေ့မှာ Netflix ကနေ ထုတ်လွှင့်တော့မယ့် Love Destiny: The Movie ဆိုတဲ့ ရုပ်ရှင်ကို MT News ပရိသတ်တွေအတွက် တင်ဆက်ပေးလိုက်ပါတယ်။