၂၄. ၂. ၂၀၂၃
Written By Thandar
ပရိသတ်တွေနဲ့ အနည်းငယ်အလှမ်းဝေးသလိုဖြစ်ခဲ့တဲ့ သရုပ်ဆောင်မေတိုးခိုင်ကတော့“ရန်ကုန်ညများ” Rangoon Nights ဇာတ်လမ်းတွဲမှာ ဖခင်ကားအက်ဆီးဒင့် ဖြစ်တဲ့အချိန်မှာ ငွေရှာဖို့ကြိုးစားရင်း လောကဓံတွေ ကြံ့ကြံ့ခံရတဲ့ ကောင်မလေး ကြည်ဖြူနေရာက သရုပ်ဆောင်ထားတယ်လို့ ဆိုပါတယ်။
ဒီလျှို့ဝှက်သည်းဖိုဇာတ်လမ်းကို Mahar Application ကနေ ဖေဖော်ဝါရီ ၂၆ ရက်မှာ စတင်ထုတ်လွှင့်မှာဖြစ်ပြီးတော့ “ရန်ကုန်ညများ” ဇာတ်ကားကို ဒါရိုက်တာ စိုင်းဉာဏ်လင်းဆက်က ကိုယ်တိုင် ဇာတ်လမ်း၊ ဇာတ်ညွှန်း ရေးဖွဲ့ကာ ရိုက်ကူးထားတယ်လို့ သိရပါတယ်။
“ဒီဇာတ်လမ်းလေးက စိတ်လှုပ်ရှားစရာကောင်းသလို ဝမ်းနည်းစရာလည်းကောင်းတဲ့ဇာတ်လေးပါ။ ဒီဇာတ်ကားထဲမှာ အဖေတစ်ခု သမီးတစ်ခုနေရင်း အဖေကားအက်ဆီးဒင့် ဖြစ်တဲ့အချိန်မှာ ငွေရှာဖို့ကြိုးစားရင်း လောကဓံတွေခံရတဲ့ ကောင်မလေး ကြည်ဖြူပေါ့။ ကိုယ်တိုင်က ကြည်ဖြူဖြစ်အောင် အများကြီး စိတ်နှစ်ပြီး ကြိုးစားထားပါတယ်။ ဒီဇာတ်ကောင်က တစ်ခါမှသရုပ်မဆောင်ဖူးတဲ့ ကာရိုက်တာ အသစ်လည်းဖြစ်နေသလို ဒီဇာတ်လမ်းလေးကိုလည်း အရမ်း သဘောကျတဲ့အတွက် အကောင်းဆုံးဖြစ်အောင် သေချာပြင်ဆင်ပြီး ကြိုးစားသရုပ်ဆောင်ထားပါတယ်။ ဒီ ဇာတ်ကားမှာ ပါဝင်ကြသူအားလုံးကလည်း ဒီဇာတ်ကားအပေါ် သေချာ စိတ်နှစ်ပြီး ကြိုးစားထားကြတယ်။ မဟာမှာ ပြသတဲ့အခါမှာလည်း ညီမဖန်တီးထားတဲ့ ဇာတ်ကားကို ကြည့်ရှု ဝေဖန် အားပေးကြပါဦး”လို့ သရုပ်ဆောင် မေတိုးခိုင်က ပြောပါတယ်။
ဒီဇာတ်လမ်းတွဲကိုတော့ သရုပ်ဆောင်ဖြစ်ကြတဲ့ ညီနန္ဒ ၊ မေတိုးခိုင်၊ သွန်းသက်ထူးစံ၊ နေထွဋ်၊ မျိုးစန္ဒီကျော်၊ စွမ်းထက်၊ ဦးဘဂျမ်း၊ ဦးထွန်း၊ ဘိုမင်းခန့်၊ မေဘရမီ စတဲ့ အနုပညာရှင်တွေ ပါဝင်သရုပ်ဆောင်ထားကြတာလည်း ဖြစ်ပါတယ်။
ရန်ကုန်ညများ ဇာတ်လမ်းတွဲကို မတ်လ ၃ ရက်မှစတင်ပြီး Fortune TV ရုပ်သံလိုင်းမှာလည်း အပတ်စဉ် တနင်္လာနေ့ ကနေ သောကြာနေ့အထိ ည ၈ နာရီတွင် ထုတ်လွှင့်ပြသသွားမယ်လို့ သိရပါတယ်။
