လက်ရှိဘဏ္ဍာနှစ်တွင် ယခင်နှစ်ထက် ကုန်သွယ်မှု ဒေါ်လာလေးဘီလျံကျော် ပိုမိုဆောင်ရွက်နိုင်ခဲ့သဖြင့် ယခုနှစ် ကုန်သွယ်မှုလျာထားချက် ပြည့်မီရန် ဒေါ်လာသန်း ၁၆၀ ကျော်သာ လိုအပ်

၂၃. ၂. ၂၀၂၃
Written by Ye Kyaw

လက်ရှိဘဏ္ဍာနှစ် ၁၀ လကျော်တွင် ယခင်နှစ်ထက် ကုန်သွယ်မှုပမာဏ ဒေါ်လာလေးဘီလျံကျော် ပိုမိုဆောင်ရွက်နိုင်ခဲ့သဖြင့် ယခုနှစ်အတွက် ကုန်သွယ်ရေးမျှော်မှန်းချက်ပြည့်မီရန် ဒေါ်လာသန်း ၁၆၀ ကျော်သာလိုအပ်တော့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

၂၀၂၂-၂၀၂၃ ဘဏ္ဍာရေးနှစ်တွင် ၂၀၂၂ ခုနှစ်၏ ဧပြီ ၁ ရက်မှ ၂၀၂၃ ခုနှစ် ဖေဖော်ဝါရီ ၁၀ ရက်အထိ မြန်မာနိုင်ငံ၏ ပြည်ပကုန်သွယ်မှုပမာဏ ဒေါ်လာ ၂၉ ဒသမ ၃၃၅ ဘီလျံရှိပြီး ယခင်နှစ်ကာလတူထက် ဒေါ်လာ ၄ ဒသမ ၁၂၅ ဘီလျံအထိ ပိုမိုဆောင်ရွက်ထားနိုင်ခဲ့ခြင်းဖြစ်သည်။

လက်ရှိဘဏ္ဍာရေးနှစ်အတွက် ပြည်ပကုန်သွယ်မှုလျာထားချက် ဒေါ်လာ ၂၉ ဒသမ ၅ ဘီလျံရရှိရန် ခန့်မှန်းထားကြောင်း ၂၀၂၂-၂၀၂၃ ဘဏ္ဍာရေးနှစ် အရအသုံးခန့်မှန်းခြေ ငွေစာရင်းဆိုင်ရာအချက်အလက်တွင် ဖော်ပြထားသည်။ လက်ရှိဘဏ္ဍာနှစ် ၁၀ လ ကျော်တွင် ကုန်သွယ်မှုပမာဏ ဒေါ်လာ ၂၉ ဒသမ ၃၅၅ ဘီလျံအထိ ရရှိထားသဖြင့် လျာထားချက်ပြည့်မီရန် ဒေါ်လာ ၁၆၄ ဒသမ ၁၃၆ သန်းသာ လိုအပ်တော့သည်။

အဆိုပါကာလအတွင်း ပို့ကုန်တင်ပို့မှုမှ ဒေါ်လာ ၁၄ ဘီလျံကျော်ရရှိထားပြီး ယခင်နှစ်ထက် ဒေါ်လာ ၁ ဒသမ ၅ ဘီလျံကျော်ပိုမိုတင်ပို့ထားနိုင်ခဲ့ပြီး သွင်းကုန်တင်သွင်းမှု ‌ဒေါ်လာ ၁၅ ဘီလျံနီးပါးရှိပြီး ယခင်နှစ်ကာလတူထက် ၂ ဒသမ ၆ ဘီလျံနီးပါး ပိုမိုတင်သွင်းထားခြင်းဖြစ်သည်။

မြန်မာနိုင်ငံအနေဖြင့် ပို့ကုန်တင်ပို့မှုတွင် လယ်ယာထွက်ပစ္စည်း၊ တိရစ္ဆာန်ထွက်ပစ္စည်း၊ ရေထွက်ကုန်၊ သတ္တုတွင်းထွက်၊ သစ်တောထွက်ပစ္စည်း၊ စက်မှုကုန်ချော (CMP)နှင့် အခြားပို့ကုန်များကို အဓိကတင်ပို့လျက်ရှိပြီး သွင်းကုန်တင်သွင်းမှုတွင် ရင်းနှီးမြှုပ်နှံမှုပစ္စည်း၊ လုပ်ငန်းသုံးကုန်ကြမ်းပစ္စည်း၊ CMP လုပ်ငန်းများအတွက် ကုန်ကြမ်းပစ္စည်း စသည်တို့ကို အဓိကတင်သွင်းနေခြင်းဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။