“လရောင်မွှေးတဲ့ ည” ဇာတ်ကားမှာ အပြင်ကအတိုင်း ကောင်လေးကို အမ်းမယ့် ခင်ရတီသင်း

၁၅. ၂. ၂၀၂၃
Written By Thandar

အွန်လိုင်းမှာ ပရိသတ်အားပေးမူရရှိလာပြီး သရုပ်ဆောင်ဖြစ်လာတဲ့ ခင်ရတီသင်း Horror Comedy ဇာတ်လမ်းဖြစ်တဲ့ ” လရောင်မွှေးတဲ့ ည” ဇာတ်ကားမှာ အပြင်ကအမူအကျင့်အတိုင်း ကောင်လေးကိုအမ်းသွားမဲ့ ကာရိုက်တာက သရုပ်ဆောင်မယ်လို့ ဖွင့်ဟလာပါတယ်။

“ညီမ ဒီဇာတ်ကားမှာ ယွန်းဝတီဆိုတဲ့ ခပ်ချေချေ ကောင်မလေးနေရာက သရုပ်ဆောင်မှာပါ။ ဒီကားက ဟာသပုံစံက ပထမဦးဆုံးရိုက်မှာမို့ ခက်ခဲလိမ့်မယ်လို့ ထင်ပါတယ်။ ညီမက ဒီဇာတ်ကားမှာ ကောင်လေးကို အမ်း မှာပါ။ အပြင်က ကာရိုက်တာနဲ့အတူတူပါပဲ။ ကောင်လေးက ညီမဆီက ချူစားတာပေါ့။ အပြင်မှာလည်း ဒီလိုပဲ။ ညီမက ကောင်လေးကို သနားပြီးချစ်မိသွားပြီးတော့ အကုန်ဖြည့်ဆည်းပေးတဲ့သူပေါ့”လို့ သရုပ်ဆောင် ခင်ရတီသင်းက ပြောပါတယ်။

သူမပါဝင်သရုပ်ဆောင်ခဲ့တဲ့ ညီမလေးတစ်ယောက် ကောက်ရထားသည်၊ ချစ်ဆေးနဲ့ မနုဿမိုး စတဲ့ ဇာတ်လမ်းတွဲတွေ ထုတ်လွှင့်ပြသခဲ့ပြီး လက်ရှိ မီးမီးမွှေးနဲ့ စိတ်ကြိုးစေရာ တစ်ကားရိုက်ထားသလို အခုလည်း ဇာတ်လမ်းတွဲလေးတွေ ဆက်တိုက်ရိုက်လာနေရတယ်လို့ သိရပါတယ်။

“ညီမက အရင် Influencer ဆိုတော့လေ သရုပ်ဆောင်ပိုင်းမှာ အဆက်အသွယ်တွေ သိပ်မရတော့ အနုပညာလမ်းကြောင်းပေါ် ရောက်ဖို့ တော်တော်လေး ကြာခဲ့ပါတယ်။ အခုလို ထုတ်လုပ်ရေးတွေက သရုပ်ဆောင်သစ်တွေ ကမ်းလှမ်းလာတဲ့အတွက် အခွင့်အလမ်းသစ်တွေ ရလာတယ်လို့လည်း မြင်ပါတယ်။ အနုပညာ အလုပ်မှာမှ မဟုတ်ပါဘူး။ ဘယ်အလုပ်မှာ မဆို ကိုယ်မကြိုးစားရင် ကျန်ခဲ့မယ်”လို့ သူမက ဆက်လက်ပြောပါတယ်။