၆. ၂. ၂၀၂၃
Written By Thandar
ဟဲဗီးဒရာမာဇာတ်လမ်း“မဟူရာပုလဲ” ရုပ်သံဇာတ်လမ်းတွဲမှာတော့ အိမ်ထောင်ရေး ကံမကောင်းတဲ့ အပူသည် ဇာတ်ရုပ်နဲ့ မြင်တွေ့ရမှာပါလို့ သရုပ်ဆောင် မေမီကိုကိုက ပြောပါတယ်။
ဒီဇာတ်လမ်းတွဲကို ဒီနေ့ ဖေဖော်ဝါရီ ၆ ရက် ည ၇ နာရီက စတင်ပြီး အပတ်စဉ် တနင်္လာနေ့ကနေ သောကြာ နေ့အထိ MRTV-4 ရုပ်သံလိုင်းမှာ ထုတ်လွှင့်ပြသပေးမှာဖြစ်ပါတယ်။
“ဒီဇာတ်လမ်းတွဲက ဖခင်မေတ္တာ၊ မိခင်မေတ္တာကို ဖော်ညွှန်းထားတယ်။ ကိုယ်က မိခင်မေတ္တာကို ဖော်ပြတဲ့ မိန်းမတစ်ယောက်နေရာက ပါဝင်သရုပ်ဆောင်ထားပါတယ်။ မေမီက အိမ်ထောင်ရှင် အိမ်ထောင်ရေး ကံမကောင်းတဲ့ အပူသည်ဇာတ်ရုပ်နဲ့ မြင်တွေ့ရမှာပါ။ အိမ်ထောင်ရေး ပြဿနာပေါင်းစုံလေးတွေ ဖော်ညွှန်းထားတယ်။ ပရိသတ်တွေ အသည်းတယားယားနဲ့ အားမလို အားမရဖြစ်ရဦးမယ့် ဇာတ်လမ်းတွဲလေးပါ”လို့ သရုပ်ဆောင်မေမီကိုကိုက ပြောပါတယ်။
မိဘမေတ္တာကို အပြည့်အဝမခံစားခဲ့ရတဲ့ သားသမီးတွေ အသက်အရွယ်ကြီးလာတဲ့အခါ ဖြတ်သန်းရာဘဝတစ်လျှောက်မှာဘယ်လို စိတ်ဒဏ်ရာတွေ ကြုံတွေ့ခံစားရမယ်ဆိုတာကို ရေးဖွဲ့ပုံဖော်ထားတဲ့ဇာတ်လမ်းဖြစ်ပါတယ်။
ဒီဇာတ်လမ်းတွဲကို ဇာတ်လမ်းလမင်းမောင်မောင်(ပြင်ဦးလွင်) ၊ ဇာတ်ညွှန်း ညီအောင်ညီ နဲ့ စုလင်းလတ်တို့က ရေးသားပြီး ဒါရိုက်တာ ကျော်စိုးသူက ရိုက်ကူးထားသလို သရုပ်ဆောင်တွေအဖြစ် အောင်ရေချမ်း ၊ မေမီကိုကို ၊ ဟိန်းရတု ၊ နက်ရှိင်းကို ၊ နှင်း ၊ အိစိကွေး ၊ ဂျူးစံသာ ၊ စောလပြည့်ဝန်း ၊ မာန်ဟိန်း၊ ငြိမ်းချမ်း ၊ ဆုဝတီ ၊ ဝိုင်းရွှေရည်၊ မေနန္ဒာကျော် ၊ ကောင်းမြတ် ၊ အံ့မင်းညို ၊ မင်းသူ ၊ ခင်မိုမိုအေး ၊ သန်းသန်းစိုး စတဲ့ အနုပညာရှင်တွေ ပါ၀င်သရုပ်ဆောင်ထားကြပါတယ်။
“ဒီကားက ဇာတ်အိမ်ခိုင်မာတဲ့ ကားလေးပါ။ မေမီကိုယ်တိုင်က မိဘနေရာက သရုပ်ဆောင်ထားတယ်။ သားအတွက် ပူလောင်ရတဲ့ အမေပေါ့။ ဒီကားမှာ တော်တော်ငိုထားရတဲ့ ဇာတ်ဝင်ခန်းတွေပါပါတယ်။ မျက်နှာတွေ ယောင်ကိုင်းတဲ့အထိ တစ်လလုံးကို ငိုရတဲ့ဆင်းန်တွေပါတယ်။ ကိုယ်ကမိဘ ဇာတ်ရုပ်ပီပြင်အောင် ဒီကားမှာတော်တော်လေးလည်း ကြိုးစားထားပါတယ်”လို့ သူမကဆက်ပြောပါတယ်။
“မဟူရာပုလဲ” ရုပ်သံဇာတ်လမ်းတွဲကိုဟာ ကိုဗစ်ကာလ ၂၀၂၀ ပြည့်နှစ်ကတည်းက စတင်ရိုက်ကူးထားတဲ့ ကားလေးဖြစ်တယ်လို့လည်း သိရပါတယ်။
