၄. ၂. ၂၀၂၃
Written By Thandar, Haymar
အိန္ဒိယနိုင်ငံ မွန်ဘိုင်းမြို့မှာ ကျင်းပတဲ့ International SCO Film Festival မှာ ထူးချွန်ဂုဏ်ပြုဆုတွေ ဆွတ်ခူးရရှိခဲ့တယ်လို့ ဒါရိုက်တာ ကျော်နှင်းဆီက MT News Entertainmentကို ပြောပါတယ်။
“အခုကတော့ SCO Film Festival မှာ အိန္ဒိယနိုင်ငံမှာ နိုင်ငံပေါင်း ၂၅ နိုင်ငံ ကျင်းပတဲ့ပွဲကြီးမှာ မြန်မာနိုင်ငံက ပထမအကြိမ်ပြသခွင့်ရတဲ့ ပွဲလည်းဖြစ်ပါတယ်။ နောက် Director Focus ရှိတယ်။ နိုင်ငံအလိုက်ပြလို့ရတယ် ပြိုင်လို့လည်း ရပါတယ်။ ကျွန်မတို့နိုင်ငံက အဖွဲ့ဝင်နိုင်ငံဖြစ်လို့ ပြိုင်လို့မရပါဘူး။ ပြသခွင့်ပဲ ရခဲ့တာပါ၊ မြန်မာနိုင်ငံက ကား ၂ ကားပို့လိုက်ပါတယ်။ ကြိုက်လို့ ရွေးလိုက်တယ်။ တခြား အရှေ့တောင်အာရှမှာ မြန်မာနဲ့ ကမ္ဘာဒီးယားပဲပါလာတယ်။ ကျန်တဲ့နိုင်ငံက အဖွဲ့ဝင်နိုင်ငံမဟုတ်လို့ မပါဘူးလို့ထင်တယ်။ မြန်မာကတော့အဖွဲ့ဝင်နိုင်ငံမို ကျွန်မတို့ကားတွေ ပြသခွင့်ရခဲ့တယ်။ International SCO Film Festival တက်ရောက်လာသူတွေက ထူးချွန်ဂုဏ်ပြုဆု ဆွတ်ခူးရရှိခဲ့တယ် ”လို့ ဒါရိုက်တာကျော်နှင်းဆီက ပြောပါတယ်။
ဇန်နဝါရီ ၂၇ ရက်နေ့ကနေ ၃၁ ရက်နေ့အထိ ကျင်းပခဲ့တဲ့ နိုင်ငံတကာရုပ်ရှင်ပွဲတော် International Shanghai Co-operative Film India Festival မှာ မြန်မာနိုင်ငံက The Listening Eye (Short Flim) နဲ့ ဥပါဒါန်ရုပ်ရှင်ဇာတ်ကားတို့ကို ရွေးချယ်တင်ဆက်ပြသခဲ့ရာ ပရိသတ်အားပေးမှုများစွာရရှိခဲ့တယ်လို့ သိရပါတယ်။
နိုင်ငံပေါင်း ၂၅ နိုင်ငံ ဇာတ်ကားကို ပြသခွင့်ရတဲ့ ရုပ်ရှင်ပွဲတော်ကြီးမှာ အိန္ဒိယနိုင်ငံမှာ ဘောလိဝုဒ် ရုပ်ရှင်မင်းသား အရှေးကူးမား ၊ တိုက်ဂါး စတဲ့ နာမည်ကြီးရုပ်ရှင်အနုပညာရှင်များစွာ တက်ရောက်ခဲ့ကြပြီး မြန်မာပြည်က ထုတ်လုပ်သူ ဒေါက်တာ ချစ်ထိုက်၊ ဒါရိုက်တာကျော်နှင်းဆီနဲ့ သရုပ်ဆောင် မင်းခန့်ထည်တို့က တက်ရောက်ခဲ့ကြတာဖြစ်ပါတယ်။
International SCO Film Festival ကနေ အိန္ဒိယနိုင်ငံမှာ ဘောလိဝုဒ် အနုပညာရှင်တွေဖြစ်ကြတဲ့ ရုပ်ရှင်မင်းသား အရှေးကူးမား ၊ တိုက်ဂါးစတဲ့ အနုပညာရှင်တွေ အတတ်ပညာရှင်တွေကိုလည်း SCO က ဆုများချီးမြှင့်ပေးအပ်ခဲ့ရာ မြန်မာရုပ်ရှင်အဖွဲ့ကိုလည်း ဆုများ ပေးအပ်ချီးမြှင့်ခဲ့တယ်လို့ သိရပါတယ်။
“နိုင်ငံအလိုက်ကားတွေပြသခဲ့တယ်။ ပြသတဲ့အတိုင်းအတာအလိုက် အနုပညာရှင်၊ အတတ်ပညာရှင်တွေကို ဆုလက်ဆောင်တွေပေးတယ်။ ကျွန်မတို့ နိုင်ငံအတွက် လာရောက်ပြသတဲ့ကားတွေအတွက် ဆုချီးမြှင့်တာပါ။ ဘောလီးဝုဒ်တွေနဲ့အတူ ကိုယ့်နိုင်ငံဆုတွေရလို့လည်း အရမ်းကိုပျော်ပါတယ်။ ဂုဏ်လည်းယူပါတယ်။ ကျွန်မတို့ ဇာတ်ကားမပြခင်မှာ ရှေ့ထွက်ပြီး ပြောရတာတွေရှိတယ်။ ကိုယ့်ဇာတ်ကားကို အိန္ဒိယနိုင်ငံက ရုံကြီးမှာ မြန်မာနိုင်ငံက ကားတွေပြသခွင့်ရလို့ အရမ်းကိုဂုဏ်ယူမိပါတယ်။ ကျွန်မတို့ ဇာတ်ကားဖန်တီးမှူခြင်းမတူဘဲ ကွဲထွက်တာလေးရှိတယ်။ ရုံပြိုင်စနစ်တွေနဲ့ ပြသခဲ့တာပါ။ စိတ်ကြိုက်ရွေးချယ်ကြည့်ခွင့်ရှိတယ်လေ။ ပထမတော့ ကိုယ့်ကားကြည့်တဲ့သူ ရှိပါမလားစိုးရိမ်ခဲ့တယ်။ ကျွန်မကားကို ည ၁၂ နာရီမှာပြသဖို့ ကြေညာချိန်မှာ အများကြီးထိုင်စောင့်သူတွေလည်း များသလို ရုံထဲလည်း ကြည့်ရှုသူတွေများခဲ့လို့ ဝမ်းသာမိတယ်။ ဇာတ်ကားပြီးတော့ မြန်မာပြည်က ဇာတ်ကားတွေကောင်းလို့လာပြီး နှုတ်ဆက်ကြတယ်။ သူတို့နဲ့ ပူပေါင်းရိုက်ချင်ပါတယ်။ ဘယ်လို ဆက်သွယ်ရမလဲ လာချိတ်ဆက်ကြပါတယ်”လို့ သူမက ဆက်ပြောပါတယ်။
မြန်မာရုပ်ရှင်ဇာတ်ကားတွေကို အိန္ဒိယနိုင်ငံ ရုပ်ရှင်ဈေးကွက်ကို ပြသဖို့ အခွင်အလမ်းကောင်းတွေ ရရှိခဲ့တဲ့အတွက် နှစ်နိုင်ငံ အနုပညာရှင် အတတ်ပညာရှင်တွေပေါင်းစပ်ပြီးတော့ ဇာတ်ကားကောင်းတွေ ဖန်တီးထုတ်လုပ်နိုင်ဖို့ ကမ်းလှမ်းမှုတွေ ရရှိခဲ့တယ်လို့လည်း သိရပါတယ်။
မြန်မာနိုင်ငံက ဇာတ်ကားတွေကိုလည်း ဘာသာစကားနားလည်အောင် စာတန်းထိုးပြီးပြသရင် ပိုကောင်းတယ်ဆိုတဲ့အကြောင်းနဲ့ ဇာတ်ကားတွေကို ပူးပေါင်းလုပ်ဆောင်မယ်လို့လည်း ရုပ်ရှင်ပွဲတော် အတွေ့အကြုံတွေများစွာရရှိခဲ့တယ်လို့ သိရပါတယ်။ ဒါရိုက်တာ ကျော်နှင်းဆီ၊ ထုတ်လုပ်သူ ဒေါက်တာ ချစ်ထိုက်နဲ့ သရုပ်ဆောင် မင်းခန့်ထည်တို့က ဖေဖော်ဝါရီ ၁ ရက်နေ့ ညပိုင်းက မြန်မာပြည်ကိုပြန်လည်ရောက်ရှိခဲ့ကြတာဖြစ်ပါတယ်။
