၄.၂.၂၀၂၃
Written By Myo Khine
ရန်ကုန်တိုင်းဒေသကြီး၊ မင်္ဂလာဒုံမြို့နယ်တွင် ဖေဖော်ဝါရီ ၃ရက် ည ၉နာရီအချိန်ခန့်က ကား ၃ စီးဆင့်တိုက်မှုဖြစ်ပွားပြီး အသက် ၉ နှစ်အရွယ် မိန်းကလေးငယ်တစ်ဦးသေဆုံးခဲ့ကြောင်း ပုလဲအရန်မီးသတ်တပ်ဖွဲ့က သိရသည်။
ယင်းမှာ အမှတ် ၃ လမ်းမ (၃၃၃) မှတ်တိုင်အနီးတွင် ဖြစ်ပွားခဲ့ခြင်းဖြစ်ပြီး သေဆုံးသည့် အသက် ၉ နှစ်အရွယ် မိန်းကလေးငယ် ၁ ဦးနှင့် ဒဏ်ရာရခဲ့သော အမျိုးသား ၄ ဦးတို့အား ပုလဲအရန်မီးသတ်တပ်ဖွဲ့၏ လူနာတင်ယာဉ် ၃ စီးဖြင့် မြောက်ဥက္ကလာပမြို့နယ် မေဓာဝတီဆေးရုံသို့ ပို့ဆောင်ပေးခဲ့သည်ဟု သိရသည်။
“ကောင်မလေးရယ်၊ သူ့အဖေရယ်၊ ဆိုင်က ဝန်ထမ်းရယ်က တရုတ်ကားတစ်စီးနဲ့ ၃၃၃ မှတ်တိုင်နားလေးက လမ်းသွယ်က လမ်းမပေါ်ကိုထွက်လာတယ်။ ကားပေါ်မှာ အမှိုက်ပုံးတွေပါတယ်။ အမှိုက်သွားပစ်တာ။ တစ်ဖက်ယာဉ်ကြောက ဒိုင်နာက သူတို့ကားကို ဝင်တိုက်တယ်။အဲဒီတော့ သူတို့ကားက လည်ထွက်သွားပြီးတော့ ခွေးဘီလူးကို ထပ်တိုက်တယ်။ ဒဏ်ရာရတာက သေသွားတဲ့ ကောင်မလေးရဲ့ အဖေရယ်။ သူတို့ဝန်ထမ်းရယ်။ ဒိုင်နာကားပေါ်က တစ်ယောက်။ ခွေးဘီလူးပေါ်က ဝန်ထမ်းတစ်ယောက်။ စုစုပေါင်း ၄ ယောက် ဒဏ်ရာရတယ်”ဟု ပုလဲအရန်မီးသတ်တပ်ဖွဲ့ ၏ တာဝန်ရှိသူက MT News သို့ ပြောသည်။
