၃. ၂. ၂၀၂၃
Written By Thandar
ပရိသတ်အားပေးမူရရှိထားတဲ့ သရုပ်ဆောင်နေဒွေးကတော့ သူ့အချစ်ရေးပတ်သက်ပြီး နှစ်ယောက်သားအဆင်မပြေတာ သိရဲ့သားနဲ့ အားလုံးအဆဲခံရမှာစိုးရိမ်လို့ ယူရတာမျိုး မလုပ်ဖူးလို့ ဖွင့်ဟလာပါတယ်။
“ကိုယ့်ထက်အသက်ငယ်တဲ့ ချစ်သူဖြစ်ပေမယ့် အရာရာအားလုံးနဲ့အဆင်ပြေပါတယ်။ ကျွန်တော်နဲ့လည်း အဆင်ပြေသလို ကျွန်တော့်အမေနဲ့လည်း အဆင်ပြေပါတယ်။ အဓိက အသက်ငယ်တာ ကြီးတာတွေနဲ့ မဆိုင်ပါဘူး။ သူရဲ့စိတ်နေစိတ်ထားနဲ့ပဲ ဆိုင်ပါတယ်။ ချမ်းသာတာ ဆင်းရဲတာလည်း ကျွန်တော်မကြည့်ပါဘူး။ ဘာပဲဖြစ်နေနေမကြည့်ပါဘူး။ ချစ်သူက ကျွန်တော့်အပေါ်ထားတဲ့ စိတ်နေစိတ်ထားရယ်။ အဓိကကျွန်တော့် အမေပေါ် မှာထားတဲ့ စိတ်ထားက ပိုအရေးကြီးတာပါ။ ကျွန်တော်က အမေအရမ်းချစ်တယ်လေ။ ဒီတစ်ခုနဲ့ပဲ ချစ်သူကို ဆုံးဖြတ်ပါတယ်”လို့ နေဒွေးကပြောပါတယ်။
ချစ်သူကောင်မလေးဖြစ်သူက သူ့ထက်အသက် ၁၀ နှစ်ငယ်ပေမယ့်လည်း အရမ်းချစ်လို့ တတ်တူးလေးပါ ထိုး၊ ဖုန်းဆင်တူ ကာဗာဆင်တူ ကိုင်တယ်လို့ သိရပါတယ်။ လာမယ့် Valentine Day မှာတော့ The Love Boat က LGBT Crown Myanmar 2023 & King of Gay Myanmar 2023 ပြိုင်ပွဲမှာ နေဒွေးက ဒိုင်အဖြစ်နဲ့ လုပ်ဆောင်ပေးသွားမယ်လို့ သိရပါတယ်။
“Relationship တစ်ခုမှာ ကျွန်တော်ပဲယူရမှာ။ ကျွန်တော်ပဲရင်ဆိုင်ရမှာ ဘယ်သူကမှတ်ချက်ပေးပေး ကျွန်တော်ဂရုမစိုက်ဘူး။ အဲဒါ ကျွန်တော့်ရဲ့ခံယူချက်ပဲ။ ကျွန်တော်တို့ မြန်မာလူမျိုးက ဘယ်လိုပဲနေနေ အားရင်ဆဲနေတာဆိုတော့ ကျွန်တော်က ခေါင်းထဲ မထည့်တော့ဘူး။ ဘာပဲဖြစ်ဖြစ် ခဏတာ အဆဲခံမလား။ ငါတစ်သက်လုံး ရင်ဆိုင်မလား။ ကျွန်တော်အဲဒါပဲတွေးတယ်။ ကျွန်တော်အဆင်မပြေရင် Break မယ်။ အဆင်ပြေရင်ဆက်တွဲမယ်။ နှစ်ယောက်သား အဆင်မပြေတာ သိရဲ့သားနဲ့အားလုံးအဆဲခံရမှာစိုးလို့ ယူရတာမျိုး ကျွန်တော်မလုပ်ဘူး။ Valentine Day နေ့အတွက် အစီအစဥ်တော့ မလုပ်ရသေးပါဘူး။ ကျွန်တော်တို့ နှစ်ယောက်လုံးက အလုပ်ကို ပိုဦးစားပေးဖြစ်တယ်။ သူက အသက်လေးငယ်ပေမယ့် နွဲ့ဆိုးဆိုးတာတော့ မရှိပါဘူး။ လူကြီးဆန်ပါတယ်”လို့ သူက ဆက်ပြောပါတယ်။
နေဒွေးက လက်ရှိ အသက် ၃၅ နှစ်ကျော်လာပြီးဖြစ်တဲ့အတွက် လာမယ့် တစ်နှစ်ကျော်ကာလမှာတော့ အိမ်ထောင်ပြုဖို့ စိတ်ကူးထားတယ်လို့ သိရပါတယ်။ စီးပွားရေးအနေနဲ့ မိခင်ဖြစ်သူရဲ့ ‘လင်းရောင်ခြည်’ ဆန်ပွဲရုံမှာ ပါဝင်လုပ်ကိုင်နေလျှက်ရှိတယ်လို့ သိရပါတယ်။
