“ဒေါက်ဒေါက်ဒေါက် ဒေါက်ဒေါက်” ရုပ်ရှင်ဇာတ်ကား မနက်ဖြန်မှစ မြန်မာတစ်ပြည်လုံးရုံတင်ပြသမည်

၂. ၂. ၂၀၂၃
Written By Thandar

ဟာသဇာတ်လမ်းပုံစံ “ဒေါက်ဒေါက်ဒေါက် ဒေါက်ဒေါက်” ရုပ်ရှင်ဇာတ်ကားကို မနက်ဖြန် ဖေဖော်ဝါရီ ၃ ရက်ကစ တစ်ပြည်လုံးမှာ ရုံတင်ပြသသွားမယ်လို့ သိရပါတယ်။

ကိုနိုင်အဖြစ် သရုပ်ဆောင်သူ ကျော်ကျော်ဗိုက သူငယ်ချင်းဖြစ်သူ ကိုထွန်းရဲ့ ကုမ္ပဏီမှာ မန်နေဂျာတစ်ဦးဖြစ်ပြီး ဘဝကို အေးဆေးတည်ငြိမ်စွာနဲ့ ဖြတ်သန်းနေသူပါ။ အလုပ်မှာရော ပတ်ဝန်းကျင်မှာပါ လူချစ်လူခင် ပေါများတဲ့ ကိုနိုင်အဖြစ် ဘဝကို ရိုးရှင်းစွာဖြတ်သန်းနေပါတယ်။

အဲဒီကုမ္ပဏီရဲ့ အတွင်းရေးမှူးမလေး သီရိကိုအဖြစ် သရုပ်ဆောင်တဲ့ ရွှေပိုးအိမ်က အလုပ်မှာမျက်နှာ အပွင့်ဆုံးဖြစ်ပြီး သီရိကို ကြိတ် ကြိုက် နေတဲ့သူကတော့ မန်နေဂျာကြီး ကိုနိုင်ပါ။ တစ်ရက်မှာတော့ ကိုနိုင်ရဲ့ ဘဝ ထဲကို Sugar အဖြစ် ခင်လှိုင်ဆိုသူဝင်ရောက်လာခဲ့ပါတယ်။ Sugar ကတော့ အပျော်တမ်း ဓာတ်ပုံဆရာ လုပ်ကိုင်နေပြီး ပျော်ပျော်နေတတ်သူပါ။

Sugar ရဲ့အကြံပေးမှုအတိုင်း ကိုနိုင်က သီရိကို ရင်ဖွင့်ဖို့ စီစဥ်ခဲ့ပေမယ့် အကြံမအောင်မြင်ခဲ့ဘူးပေါ့။ ဆရာကြီး Sugar နဲ့တွေ့ပြီးမှ ဘယ်လိုမျိုး အလွဲလွဲ အချော်ချော်ဖြစ်ပြီး ရယ်မောရမလဲဆိုတာကို ပရိသတ်တွေ ပိတ်ကားပေါ်မှာ တွေ့ရမှာ ဖြစ်ပါတယ်။

Triple Six ရုပ်ရှင်ထုတ်လုပ်ရေးရဲ့ “ဒေါက်ဒေါက်ဒေါက် ဒေါက်ဒေါက်” ရုပ်ရှင်ဇာတ်ကားကို ဇာတ်လမ်း၊ ဇာတ်ညွှန်းနဲ့ ဒါရိုက်တာအဖြစ် ခင်လှိုင် (ဉာဏ်ကြီးရှင်)က ရိုက်ကူးထားပြီး သရုပ်ဆောင်တွေဖြစ်တဲ့ အကယ်ဒမီ ကျော်ကျော်ဗို၊ ရွှေပိုးအိမ် ၊ ခင်လှိုင်၊ ညီနန္ဒ၊ ဘုန်းလျှံ၊ အောင်ဇော်မင်း၊ Kညီ၊ တက္ကသိုလ်ဂွမ်းပုံ၊ မျိုးမျိုးခိုင်၊ အေးသီတာ နဲ့ အနုပညာရှင်များစွာက ပါဝင်သရုပ်ဆောင်ထားကြပါတယ်။

ဒီဇာတ်ကားကို ဖေဖော်ဝါရီ ၃ ရက်ကနေ ၉ ရက်နေ့အထိ မြန်မာပြည်တွင်းရှိတဲ့ မင်္ဂလာရုံအုပ်စုတွေ ၊ Junction Cinema အုပ်စု ၊ Mega Ace အုပ်စု ၊ Paradiso အုပ်စု စတဲ့ မြန်မာပြည်တွင်းရှိ အဆင့်မြင့်ရုပ်ရှင်ရုံ (၄၁) ရုံမှာ တစ်ပြိုင်နက်ရုံတင်ပြသမှာဖြစ်ပါတယ်။