နအဖခေတ် ဗိုလ်ချုပ်သာအေးတည်ခဲ့သည့် ဟုမ္မလင်းမြို့နယ်ရှိ ရွှေပြည်အေးမြို့အား PDF များ သိမ်းပိုက်ပြီးနောက် တပ်မတော်က ပြန်လည်သိမ်းယူရန် ကြိုးပမ်း

၂. ၂. ၂၀၂၃
Written by Nay Moe

နအဖခေတ် ဗိုလ်ချုပ်သာအေးတည်ခဲ့သည့် ဟုမ္မလင်းမြို့နယ်ရှိ ရွှေပြည်အေးမြို့အား ဟုမ္မလင်း PDF များ သိမ်းပိုက်ပြီးနောက် တပ်မတော်က ပြန်လည်သိမ်းယူရန် ကြိုးပမ်းသည့် ထိုးစစ်ဆင်မှုများပြုလုပ်နေသည်ဟု သိရသည်။

ရွှေပြည်အေးမြို့ကို ဖေဖော်ဝါရီ ၁ ရက်တွင် ခန္တီးခရိုင်အမှတ်(၁)တပ်ရင်း-ဟုမ္မလင်း ၊ HPDF-124 ၊ HPDF ၊ HPDF- မိုးကြိုး စသည့်မဟာမိတ်တပ်ပေါင်းစုများအဖွဲ့မှ စီးနင်းသိမ်းပိုက်ခဲ့သည်။

ထိုသို့ သိမ်းပိုက်ပြီးနောက် စစ်သုံးရဟတ်ယဉ်ဖြင့် ၃ ကြိမ်လာရောက်ပစ်ခတ်ခဲ့သော်လည်း မဟာမိတ်တပ်ပေါင်းစုဘက်မှ အထိအခိုက်အကျအရှုံးမရှိဘဲ ယခုထက်ထိ ရွှေပြည်အေးမြို့အား အောင်မြင်စွာသိမ်းပိုက်ထားဆဲဖြစ်ကြောင်း Homalin People Defence Force 124 က ယနေ့ သတင်းထုတ်ပြန်သည်။

ထို့အတူ SAC ၏ လုံခြုံရေးတပ်များကလည်း ရွှေပြည်အေးမြို့အား ပြန်လည်သိမ်းယူရန် ဖေဖော်ဝါရီ ၁ ရက်နေ့မှ စတင်ကာ ကုန်းကြောင်း၊ ရေကြောင်းနှင့် လေကြောင်းပစ်ကူများဖြင့် တန်ပြန်ထိုးစစ် လုပ်ဆောင်နေသဖြင့် တိုက်ပွဲပြင်းထန်နေ၍ ဟုမ္မလင်း-ဖောင်းပြင် ရေကြောင်းလမ်းနှင့် မြစ်ရိုးကုန်းကြောင်းလမ်းအား လက်ရှိ (လုံးဝ) အသုံးမပြုရန် Homalin People Defence Force က အသိပေးထားသည်။

ရွှေပြည်အေးမြို့သည် အိမ်ခြေ ၅၀၀ ခန့်နှင့် လူဦးရေ ၂၅၀၀ ခန့်သာ နေထိုင်သည့် မြို့ငယ်လေးဖြစ်ပြီး အကျယ်အဝန်းမှာလည်း စတုရန်းမိုင် လေးမိုင်ပင်မပြည့်သော မြို့ငယ်လေးဖြစ်သည်။