MT News
တင်ဆက်- ပန်းအိ
ငယ်ဘဝကကြည့်ခဲ့ဖူးတဲ့ မမ်မီရုပ်ရှင်တွေထဲကနဲ့ မတူဘဲ ချစ်စရာပုံစံလေးတွေနဲ့ မမ်မီတွေကိုကြည့်ရှုနိုင်မယ့် Warner Bros. Pictures ကနေ နောက်ဆုံးထွက် ကာတွန်း ရုပ်ရှင် “Mummies” ကို ဇန်နဝါရီလထဲမှာ ရုံတင်ပြသတော့မှာပဲ ဖြစ်ပါတယ်။
ဒီဇာတ်ကားကို စပိန် ဒါရိုက်တာ Galo က ရိုက်ကူးထားပြီး ဇာတ်ညွှန်းကိုတော့ Jordi Gasull နှင့် Javier Barreira တို့က ပူးတွဲရေးသားထားပါတယ်။
ဒီဇာတ်ကားမှာ “I Am Today”၊ “New Song” နဲ့ “Ring Song” စတဲ့ မူရင်းသီချင်း (၃)ပုဒ် ပါဝင်ပြီး အသံသရုပ်ဆောင်တွေအနေနဲ့ Joe Thomas, Eleanor Tomlinson, Santiago Winder အစရှိတဲ့သူတွေက ပါဝင်ထားကြပါတယ်။
“Mummies” ဇာတ်ကားထဲမှာတော့ မြေအောက်မှာရှိတဲ့ ရှေးခေတ် အီဂျစ် လျှို့ဝှက်မြို့တော်တစ်ခုမှာ နေထိုင်တဲ့ အီဂျစ်မမ်မီ သုံးယောက်ရဲ့ ပျော်ရွှင်စရာ စွန့်စားခန်းတွေကို ရိုက်ကူးထားတာဖြစ်ပြီး သူတို့သုံးဦးမှာ ဘုရင့် သမီးတော် မင်းသမီးလေးတစ်ဦး၊ ရထားစီးသူဟောင်းတစ်ဦးနဲ့ သူ့ရဲ့ ညီငယ်တို့ဖြစ်ပြီး သူတို့နဲ့အတူ အိမ်မွေးတိရစ္ဆာန်မိကျောင်းလေးတစ်ကောင်လည်း ပါဝင်ပါတယ်။
တစ်နေ့မှာတော့ မမ်မီတွေဟာ တန်ဖိုးထားရတဲ့ ရတနာ တစ်ခု ပျောက်ဆုံးသွားလို့ လိုက်ရှာကြရာကနေ ဒီဘက်ခေတ် လူသားတွေဆီ ရောက်လာပြီး အခက်အခဲတွေ ရင်ဆိုင်ရကာ စွန့်စားခန်းတွေကို ပျော်စရာလေးတွေ ရောပြီး ကြည့်ရှုနိုင်ဖို့ ဇန်နဝါရီလ ၂၇ ရက်နေ့မှာ ပြည်တွင်းမှာရှိတဲ့ ရုပ်ရှင်ရုံတွေမှာ ရုံတင်တော့မှာ ဖြစ်တဲ့ Mummies ကို MT News ပရိသတ်တွေအတွက် တင်ဆက်ပေးလိုက်ပါတယ်။
