ပူတင်နှင့် ကင်ဂျုံအန်းတို့က ဘက်စုံမဟာဗျူဟာမြောက် မိတ်ဖက်ဆက်ဆံရေးသဘောတူညီချက် လက်မှတ်ရေးထိုး

◾ မြောက်ကိုရီးယားအနေဖြင့် အမျိုးသားလုံခြုံရေးနှင့်အချုပ်အခြာအာဏာကိုကာကွယ်ရန် ကိုယ်ပိုင် ကာကွယ်ရေးအင်အားခိုင်မာရေးကြိုးပမ်းဖို့ အခွင့်အရေးရှိဟု ပူတင်ပြောကြား

၁၉.၆.၂၀၂၄
Translated by Htwe Ko Tun

မြောက်ကိုရီးယားနိုင်ငံသို့ ချစ်ကြည်ရေးခရီးရောက်ရှိနေသော ရုရှားနိုင်ငံသမ္မတ ဗလာဒီမာ ပူတင်နှင့် မြောက်ကိုရီးယားနိုင်ငံသမ္မတ ကင်ဂျုံအန်းတို့က နှစ်နိုင်ငံအကြား ဘက်စုံမဟာဗျူဟာမြောက် မိတ်ဖက် ဆက်ဆံရေးသဘောတူညီချက်ကို ပြုံယမ်းမြို့တွင် ဇွန်လ ၁၉ ရက်က လက်မှတ်ရေးထိုးခဲ့ကြကြောင်း သိရသည်။

ရုရှားသမ္မတ ပူတင်က လက်မှတ်ရေးထိုးရန် ကြိုတင်ပြင်ဆင်ထားခဲ့သည့် အဆိုပါသဘောတူညီချက်က အခြေခံကျကြောင်းနှင့် နောင်လာမည့်နှစ်ပေါင်းများစွာအတွက် နှစ်နိုင်ငံအကြား ဆက်ဆံရေး၏အခြေခံကို ဖွဲ့စည်းတည်ဆောက်ပေးသွားနိုင်မည်ဖြစ်ကြောင်းလည်း ပြောကြားခဲ့သည်။

အဆိုပါသဘောတူညီချက်က နှစ်နိုင်ငံအကြားတည်ရှိသော ၁၉၆၁ ခုနှစ်တွင်လက်မှတ်ရေးထိုးခဲ့သည့် ချစ်ကြည်ရေးနှင့် အပြန်အလှန်အထောက်အကူပြုရေးစာချုပ်၊ ၂၀၀၀ ပြည့်နှစ်တွင်ရေးထိုးခဲ့သော ချစ်ကြည်ရေးစာချုပ်နှင့် အိမ်နီးချင်းကောင်းနှင့်ပူးပေါင်းဆောင်ရွက်ရေးစာချုပ်တို့အပြင် ၂၀၀၀ ပြည့်နှစ်နှင့်၂၀၀၁ ခုနှစ်တို့တွင်ထုတ်ပြန်ခဲ့သော မော်စကိုကြေညာစာတမ်းနှင့် ပြုံယမ်းကြေညာစာတမ်းနေရာများတွင် အစားထိုးခဲ့ခြင်းဟုလည်း ဆိုသည်။

သမ္မတပူတင်၏လက်ထောက်ဖြစ်သော ယူရီ ယူရှာကော့ဗ်က ပထဝီနိုင်ငံရေးဆိုင်ရာအခြေအနေများ ပြောင်းလဲမှုနှင့် မကြာသေးမီက နှစ်နိုင်ငံအကြား အရည်အချင်းပြည့်ဝသောအပြောင်းအလဲများကြောင့် ဤသဘောတူညီချက်အသစ်ကထွက်ပေါ်လာရခြင်းဖြစ်ကြောင်း ပြောကြားသွားခဲ့သည်။

သဘောတူညီချက်အား လက်မှတ်ရေးထိုးအပြီး ခေါင်းဆောင်နှစ်ဦးက မီဒီယာသို့ကြေညာချက်များ ထုတ်ပြန်ကြမည်ဖြစ်ပြီး နှစ်ဦးနှစ်ဖက်အကြား ဆက်လက်ဆက်သွယ်ဆောင်ရွက်ကြမည်ဟု မျှော်လင့်ရသည်။

ထို့ပြင် ခေါင်းဆောင်နှစ်ဦးက လက်ဆောင်ပစ္စည်းများ အပြန်အလှန်ပေးအပ်ဖလှယ်မှုကိုလည်း ဆက်လက်ပြုလုပ်ခဲ့ကြသည်။ မြောက်ကိုရီးယားခေါင်းဆောင်အား သမ္မတပူတင်က Aurus အမျိုးအစားကားတစ်စီး၊ ရေတပ်ဗိုလ်ချုပ်ကြီးများကိုင်ဆောင်သော ဓားမြှောင်တစ်ချောင်းနှင့် လက်ဖက် ရည်ပန်းကန်လုံံးတစ်စုံတို့ လက်ဆောင်အဖြစ်ပေးအပ်ခဲ့သည်။အပြန်အလှန်အားဖြင့် ကင်ဂျုံအန်းကလည်း ၎င်း၏ပုံပါအနုပညာလက်ရာများကို ပြန်လည်ပေးအပ်ခဲ့ကြောင်း သိရသည်။ မြောက်ကိုရီးယား ခေါင်းဆောင်အနေဖြင့် ရုရှားနိုင်ငံလုပ် ကားနှစ်စီးကို လက်ဆောင်အဖြစ် လက်ခံရရှိပြီးဖြစ်သွားကြောင်းလည်း သိရသည်။

ထို့အတူ နှစ်ဖက်ကိုယ်စားလှယ်အဖွဲ့များပါဝင်လျက် နှစ်ဖက်ညှိနှိုင်းဆွေးနွေးပွဲကို တစ်နာရီခွဲကျော်ကြာ ပြုလုပ်ခဲ့ကြသလို ခေါင်းဆောင်နှစ်ဦး နှစ်ကိုယ်ကြားဆွေးနွေးမှုကိုလည်း နှစ်နာရီခန့် Kumsusan နန်းတော်တွင် ပြုလုပ်ခဲ့ကြသည်။

ဆွေးနွေးပွဲအပြီးတွင်လည်း သမ္မတပူတင်က ရုရှားအနေနှင့် မြောက်ကိုရီးယားနိုင်ငံအား ကမ္ဘာ့အခြေအနေကိုမတည်မငြိမ်ပျက်ပြားမှုများအတွက် အပြစ်တင်ပြောကြားရန်လုပ်ဆောင်မှုများကို ရုရှားအနေနှင့် လုံးဝလက်မခံကြောင်းလည်း ပြောခဲ့သည်။ ပူတင်က ထိုသို့လုပ်ဆောင်မှုများအား လက်ခံနိုင်ဖွယ်မရှိဟု ပြောခဲ့ပြီး မြောက်ကိုရီးယားအနေဖြင့် အမျိုးသားလုံခြုံရေးနှင့် အချုပ်အခြာအာဏာကိုကာကွယ်ရန် ၎င်း ၏ကိုယ်ပိုင်ကာကွယ်ရေးအင်အား ခိုင်မာရေးကြိုးပန်းရန် အခွင့်အရေးရှိကြောင်းလည်း ပြောခဲ့သည်။

ထို့ပြင် ပူတင်က ကိုရီးယားကျွန်းဆွယ်တွင် လက်နက်ကိုင်စစ်ပွဲကဲ့သို့ ဒုံရင်းအခြေအနေဆိုးသို့ပြန်ရောက်အောင်ခြိမ်းခြောက်မှုများကို အဆုံးသတ်စေရေးအတွက် နိုင်ငံရေးနှင့် သံတမန်ရေးနည်းလမ်းများဖြင့် ဆက်လက်အားထုတ်သွားရန်နှင့် ပူးပေါင်းစည်းလုံးသည့် လုံခြုံမှုပေါ်အခြေခံကာရေရှည်ငြိမ်းချမ်းရေးနှင့်တည်ငြိမ်ရေးတို့အတွက် ပုံစံဖန်တီးသွားရန် ရုရှားနိုင်ငံက အဆင်သင့်ရှိပါကြောင်း ပြောခဲ့သည်။

ရုရှားသမ္မတပူတင်က မြောက်ကိုရီးယားသမ္မတ ကင်ဂျုံအန်း၏ ဖိတ်ကြားချက်အရ ဇွန်လ ၁၈ ရက်နှင့် ၁၉ ရက်များတွင် မြောက်ကိုရီးယားသို့ ချစ်ကြည်ရေးခရီးလာရောက်ခဲ့ခြင်းဖြစ်သည်။

Ref-RIA Novosti, Tass