၁၄.၅.၂၀၂၄
Written By Thandar
ပရိသတ်အချစ်တော် မင်းသမီးလေး ဝတ်မှုန်ရွှေရည်ရဲ့ ကျေးဇူးရှင်ဖခင်ကြီး ဦးဝင်းသိန်းနိုင် ကွယ်လွန်ခြင်း တစ်လပြည့်ရည်စူးကုသိုလ်အနေနဲ့ ဆရာတော် အရှင်ဆေကိန္ဒထံ စာသင်သံဃာတော်များ သီတင်းသုံးကျောင်းဆောက် လုပ်ဖို့အတွက် ငွေကျပ်သိန်း ၃၀၀ နဲ့ နိုင်ငံတော် ဓမ္မာစရိယနဲ့ ပထမပြန် စာမေးပွဲ စာစစ်သံဃာအပါး ၃၀၀ ကိုနေ့ဆွမ်းဆပ်ကပ်လှူဒါန်းခဲ့ပါတယ်။
“ဖခင်အတွက် ပြုသမျှကုသိုလ်အစုစုအတွက် ဖခင်ကြီးနဲ့တကွ (၃၁) ဘုံ၌ ကျင်လည်ကုန်သော ဝေနေယျသတ္တဝါအပေါင်း အားလုံးကို အမျှပေးဝေပါတယ်။ သာဓုမောဒနာ ခေါ်ဆိုနိုင်ကြပြီး ပြုသောကုသိုလ်များလည်း ထပ်တူရကြပါစေ” လို့ သရုပ်ဆောင်ဝတ်မှုန်ရွှေရည်က ပြောပါတယ်။
သူမ ဖခင် ဦးဝင်းသိန်းနိုင်ကတော့ အသက် ၅၉ နှစ်အရွယ် ပြီးခဲ့တဲ့ ဧပြီလ ၁၄ရက် နံနက် ၉ နာရီကျော်က ကျောက်ကပ်ရောဂါနဲ့ ကွယ်လွန်ခဲ့တာလည်းဖြစ်ပါတယ်။ မြန်မာနှစ်သစ်ကူး အတာသင်္ကြန်အချိန်ကာလဖြစ်တဲ့အတွက် နေ့ချင်းပဲ မီးသင်္ဂြိုဟ်ခဲ့ရတာဖြစ်ပါတယ်။
