၁၄.၅.၂၀၂၄
Written By Thandar
Horror Comedy သရဲဟာသဇာတ်လမ်းပုံစံ “သရဲဆိုတာ တကယ်ရှိတယ်” ဇာတ်ကားမှာ ပေါ့ပေါ့ပါးပါးလူငယ်ကောင်မလေး ဂူးဂူးဆိုတဲ့ နေရာက ပါဝင်သရုပ်ဆောင်ထားပါတယ်လို့ မာဂျမ်ခေးက ပြောပါတယ်။
“ညီမက ဒီကားထဲမှာ ဂူးဂူးဆိုတဲ့စိတ်ကသာကောင်မလေးဆိုပေမယ့် သူ့ရဲ့နေပုံထိုင်ပုံဝတ်ပုံစားပုံတွေက ယောက်ျားလေးဆန်တယ်။ ဂူးဂူးမှာက မောင်တစ်ယောက်ရှိတယ်။ သူငယ်ချင်းတွေနဲ့ခရီးလေးတစ်ခုသွားဖြစ်ခဲ့ကြတယ်။ ဟာသ သရဲကားဆိုတော့ပေါ့ပေါ့ပါးပါး ဖန်စီပုံစံလေးပါပဲ” လို့ သရုပ်ဆောင် မာဂျမ်ခေးက ပြောပါတယ်။
မီးမီးမွှေးထုတ်လုပ်ရေးက အဆိုပါ ဇာတ်ကားကို ဇာတ်ညွှန်းနဲ့ ဇာတ်လမ်းကိုတော့ ပိုင်စိုးသူမောင်ကရေးသားပြီးတော့ ဒါရိုက်တာ Sliver Moon က သရုပ်ဆောင်တွေဖြစ်တဲ့ အောင်ရဲထိုက် ၊ နေရှိုင်း ၊ သွန်းသက်ထူးစံ@မာဂျမ်ခေး ၊ ခင်ရတီသင်း ၊ ဟိန်းသံလွင်၊ သီဟမင်းထွဋ် ၊ ဇွဲဇင် တို့အပြင် ဧည့်သည်သရုပ်ဆောင် သိန်းလင်းစိုး (မေတ္တာဖြင့်ကူညီသည် )က ပါဝင်ထားကြပါတယ်။ သူမကတော့ ယခင် သွန်းသက်ထူးစံ နာမည်နဲ့ အနုပညာအလုပ်လုပ်တွေလုပ်ကိုင်ခဲ့ပြီးတော့ လက်ရှိမှာတော့ ကချင်နာမည် မာဂျမ်ခေးနဲ့ အနုပညာအလုပ်တွေဆက်လုပ်သွားမယ်လို့ဆိုပါတယ်။
မာဂျမ်ခေးဟာ စိမ့်စမ်းခ ၊ ညဝှက်ပန်း ၊ ဆည်းဆာ ၊ ရန်ကုန်ညများ ၊ အဇ္ဈတ္တမီးအိမ် ၊ နင့် စတဲ့ ဇာတ်လမ်းတွဲတွေမှာ ပါဝင်သရုပ်ဆောင်ထားသူလည်းဖြစ်ပါတယ်။
“ကိုယ်တိုင်ကတော့ သရဲကြောက်တဲ့အထဲတော့မပါဘူး။ အရင်ထဲက ထိတ်လန့်စရာ စိတ်လှုပ်ရှားစရာ သရဲကားတွေ လူသတ်ကားတွေလည်း ကြိုက်တယ် အရမ်းလည်း ကြည့်တဲ့သူပေါ့။ ငယ်ငယ်တုန်းကတော့ သရဲဆိုရင် တွေးတွေးပြီး ကြောက်တာပေါ့နော်။ ကြီးလာတော့ သရဲထက်စာရင် လူတွေရှိန်ပြီး ပိုကြိုက်လာတယ်”လို့ သူမကဆက်ပြောပါတယ်။
“သရဲဆိုတာ တကယ်ရှိတယ်” ဇာတ်လမ်းတွဲကို မကြာခင် Mee Mee Mway Entertainment Channel နဲ့ Facebook Page မှာ ပြသသွားမှာဖြစ်ပါတယ်။
