၁၀.၅.၂၀၂၄
Written by KL
ဧရာဝတီတိုင်းဒေသကြီး၊ မအူပင်မြို့နယ်၊ မအူပင်-ဆားမလောက်ကားလမ်းတွင် မေလ ၉ ရက် မွန်းလွဲ ၃ နာရီ ၁၅ မိနစ်ခန့်က ကျေးရွာအတွက် အသုံးပြုရန် အအေးခန်းအခေါင်းသယ်ယူပြီး ပြန်လာသော ကားတစ်စီးမှာ ဘရိတ်ပေါက်၍ တိမ်းမှောက်ရာမှ လိုက်ပါလာသူ ၃ ဦးသေဆုံးခဲ့ပြီး ၃ ဦးဒဏ်ရာရရှိခဲ့ကြောင်း ဒေသခံများထံမှ သိရသည်။
“ရန်ကုန်ကနေမှာတဲ့ အဲယားကွန်းအခေါင်းကို ညောင်ဝိုင်းရွာအတွက် သွားသယ်ပြီး အပြန်မှာ ဘရိတ်ပေါက်ရင်း လမ်းဘေးမြောင်းထဲ မှောက်သွားတာ ကိုယ့်ရွာသားနှစ်ယောက်ပါတော့ စိတ်မကောင်းဘူး”ဟု ဒေသခံတစ်ဦးက ပြောသည်။
တိမ်းမှောက်သော မော်တော်ယာဥ်မှာ လိုက်ထရပ်ယာဥ်အမျိုးအစားဖြစ်ပြီး သေဆုံးသူများမှာ မအူပင်မြို့နယ် အမှတ်(၁၂) ရပ်ကွက်တွင် နေထိုင်သော ဦးကျော်နှင့် ညောင်ဝိုင်းကျေးရွာတွင် နေထိုင်သော ဦးထွန်းထွန်းနှင့် ဦးဌေးလွင်တို့ဖြစ်ကြောင်း သိရသည်။
ယာဥ်တိမ်းမှောက်မှုကြောင့်သေဆုံးသူများကို ဒေသခံပရဟိတအဖွဲ့ဝင်များ၏ အကူအညီဖြင့် နေအိမ်သို့ ပြန်လည်ပို့ဆောင်ပေးခဲ့ကြောင်း သိရသည်။
