၈. ၅. ၂၀၂၄
Written by Pan Ei
ကမ္ဘောဒီးယားနိုင်ငံရဲ့ ဝန်ကြီးချုပ်ဟောင်း ဟွန်ဆန်က အကျဉ်းကျနေတဲ့ မြန်မာနိုင်ငံက အရပ်သားခေါင်းဆောင် ဒေါ်အောင်ဆန်းစုကြည်နဲ့ ဗီဒီယိုခေါ်ဆိုမှုနဲ့တစ်ဆင့် တွေ့ဆုံမှု ပြုလုပ်ဖို့ မြန်မာအစိုးရကို တောင်းဆိုထားတယ်လို့ မေလ ၇ ရက်နေ့က ပြောကြားလိုက်ပါတယ်။
ကမ္ဘောဒီးယားကို ဆယ်စုနှစ် လေးစုနီးပါး အုပ်ချုပ်ခဲ့ပြီး ပြီးခဲ့တဲ့နှစ်မှာ ဝန်ကြီးချုပ်ရာထူးကို သားဖြစ်သူလွှဲပေးခဲ့တဲ့ ဟွန်ဆန်ဟာ အင်္ဂါနေ့က ဗိုလ်ချုပ်မှူးကြီး မင်းအောင်လှိုင်နဲ့လည်း ဗီဒီယို ဆွေးနွေးပွဲ ပြုလုပ်ခဲ့တယ်လို့ သိရသလို အဲ့ဒီ ဆွေးနွေးပွဲမှာ ဒေါ်အောင်ဆန်းစုကြည်နဲ့ပါ ဗီဒီယိုဆက်သွယ်မှုကတစ်ဆင့် တွေ့ဆုံဆွေးနွေးနိုင်ဖို့ တောင်းဆိုခဲ့တာဖြစ်တယ်လို့ ဟွန်ဆန်က သူ့ရဲ့ ဖေ့စ်ဘွတ်စာမျက်နှာမှာ ဖော်ပြခဲ့တာပါ။
အသက် ၇၈ နှစ်ရှိပြီဖြစ်တဲ့ ဒေါ်အောင်ဆန်းစုကြည်ဟာ နိုင်ငံမှာ ၂၀၂၁ ခုနှစ်က အာဏာအငြင်းပွားမှု ဖြစ်စဉ်ဖြစ်ပွားပြီးနောက်ပိုင်း အထိန်းသိမ်းခံခဲ့ရပြီးကတည်းက မြင်ကွင်းကနေ ပျောက်ကွယ်နေခဲ့ပြီး ဟွန်ဆန်နဲ့ ဘယ်လိုတွေ့ဆုံမှုမျိုးမဆိုဟာ သိသာထင်ရှားတဲ့ ခြေလှမ်းတစ်ခု ဖြစ်လာနိုင်ပါတယ်။
သူမကို ၂၀၂၁ ခုနှစ် ဖေဖော်ဝါရီလက ဖမ်းဆီးထိန်းသိမ်းခံရပြီးကတည်းက သူမဟာ နိုင်ငံခြားသံတမန်တစ်ဦးနဲ့သာ တွေ့ဆုံခဲ့ပြီး ပြီးခဲ့တဲ့နှစ် ဇူလိုင်လက သူမနဲ့ တစ်နာရီကျော်ကြာ တွေ့ဆုံခဲ့ကြောင်း ထိုင်းနိုင်ငံခြားရေးဝန်ကြီးဖြစ်ခဲ့သူ Don Pramudwinai က ပြောကြားခဲ့တာဖြစ်ပါတယ်။
အခုအခါ ဟွန်ဆန်က ကမ္ဘောဒီးယား အထက်လွှတ်တော် အကြီးအကဲအဖြစ် တာဝန်ထမ်းဆောင်နေပြီး အာဏာအငြင်းပွားမှုဖြစ်စဉ်ဖြစ်ပွားပြီးနောက် ၂၀၂၂ ခုနှစ်က မြန်မာနိုင်ငံကို ပထမဆုံးလာရောက်ခဲ့တဲ့ နိုင်ငံခြားခေါင်းဆောင်တစ်ဦးလည်း ဖြစ်ပါတယ်။
ဗိုလ်ချုပ်မှူးကြီး မင်းအောင်လှိုင်က ဒေါ်အောင်ဆန်းစုကြည်နဲ့ စကားပြောဆိုဖို့ တောင်းဆိုချက်ကို အလေးအနက်ထား စဉ်းစားပေးမယ်လို့လည်း ဟွန်ဆန်ရဲ့ဖေ့စ်ဘွတ်ခ်မှာ ရေးသားဖော်ပြထားပါတယ်။
အခုအချိန်အထိ တပ်မတော်ဟာ အရှေ့တောင်အာရှနိုင်ငံများအဖွဲ့ (အာဆီယံ) ဒေသဆိုင်ရာ အစုအဖွဲ့အပါအဝင် ပြည်ပခေါင်းဆောင်တွေနဲ့ သံတမန်တွေ တွေ့ဆုံဖို့ တောင်းဆိုချက်အများအပြားကို ပယ်ချခဲ့ပါတယ်။
အာဆီယံဟာ မြန်မာနိုင်ငံမှာ ပြင်းထန်နေတဲ့ ပဋိပက္ခတွေအတွက် သံတမန်နည်းလမ်းနဲ့ ဖြေရှင်းဖို့ ကြိုးပမ်းခဲ့ပေမဲ့ အောင်မြင်မှု အနည်းငယ်သာ ရရှိခဲ့ပါတယ်။
Ref; AFP
