၁.၂.၂၀၂၄
Written By Thandar
ဒရမ်မာဇာတ်လမ်းပုံစံ ” တသသလွမ်း ” ဇာတ်လမ်းတွဲမှာ ဘဝရဲ့လောကဓံကို ရင်ဆိုင်ကြီးပြင်းခဲ့ရတဲ့ ဂျစ်ကန်ကန်ကောင်မလေး ဆုလာဘ်ဆိုတဲ့နေရာက မြင်တွေ့ရမှာလို့ သရုပ်ဆောင် မေတိုးခိုင်က ဆိုပါတယ်။
“ညီမက ဒီဇာတ်ကားမှာ ဘဝရဲ့လောကဓံကို ရင်ဆိုင်ကြီးပြင်းခဲ့ရတဲ့ ဂျစ်ကန်ကန်ကောင်မလေး ဆုလာဘ်ဆိုတဲ့နေရာက မြင်တွေ့ရမှာပါ။ ကိုယ့်ရဲ့ မိဘတွေရဲ့ ဒုတိယအိမ်ထောင်ရေးကြောင့် ညီအစ်မဖြစ်လာတဲ့ ယွန်းလဲ့ (ခ) သီရိကျော်နဲ့ မတည့်ကြ အမြင်မကြည်ကြဘူးပေါ့နော်။ ယွန်းလဲ့အပေါ်အမြင်မကြည်တော့ အရွဲ့တိုက်ပြီးမထင်မှတ်ဘဲ အလုပ်တစ်ခုမှာ ကုမ္ပဏီပိုင်ရှင် ရောင်စဉ် (အောင်မင်းခန့်)နဲ့ဆုံတွေ့ခဲ့ကြတယ်။ ဆုလာဘ်နဲ့ လူတိုင်းအပေါ် နွေးထွေးကြင်နာစွာ ဆက်ဆံတတ်တဲ့ ရောင်စဉ်နဲ့တွေ့ပြီး အချစ်ရေးမှာ တသသလွမ်းလို့ကျန်နေတာကို ပရိသတ်မြင်ရမှာပါ”လို့ သရုပ်ဆောင် မေတိုးခိုင်က ပြောပါတယ်။
အဆိုပါဇာတ်ကားကို ဇာတ်လမ်း ဇာတ်ညွှန်း ပိုင်စိုးသူမောင်က ရေးသားပြီး ဒါရိုက်တာ ဇီဇဝါက သရုပ်ဆောင်တွေဖြစ်တဲ့ အောင်မင်းခန့်၊ ဘုန်းမင်းနေလ၊ မေတိုးခိုင်၊ သီရိကျော်၊ အကယ်ဒမီမင်းဦး၊ မင်းသူ၊ ဖူးစုံတို့အပြင် အနုပညာရှင်များစွာနဲ့ ရိုက်ကူးထားတဲ့ ဒရာမာ ဇာတ်လမ်းတွဲလေးပဲဖြစ်ပါတယ်။ Channel K ရုပ်သံလိုင်းနဲ့ Mee Mee Mway Production တို့က ထုတ်လုပ်ပြီး Silver Moon Studio က တသသလွမ်း ဇာတ်လမ်းတွဲကို တာဝန်ယူစီစဉ် ရိုက်ကူးပေးခဲ့တာလည်းဖြစ်ပါတယ်။
“တသသ လွမ်း” ဇာတ်လမ်းတွဲကို လာမယ့် ဖေဖော်ဝါရီ ၄ ရက် ည ၇ နာရီက စတင်ပြီး အပတ်စဉ်စနေနေ့ နဲ့ တနင်္ဂနွေနေ့တွေမှာ Channel K ရုပ်သံလိုင်းက ထုတ်လွှင့်ပြသမှာဖြစ်ပါတယ်။
