၁. ၁၂. ၂၀၂၃
Written by Nay Moe
အမျိုးသားဒီမိုကရေစီသစ်ပါတီ ဥက္ကဋ္ဌ ဦးသန်းထွန်းဟာ ဒီနေ့မနက်က သင်္ဃန်းကျွန်းမြို့နယ်မှာ PDF တွေရဲ့ လုပ်ကြံမှုခံရပြီး ဆေးရုံတင်ပို့ကုသချိန် ကွယ်လွန်ခဲ့တယ်လို့ သိရပါတယ်။
ဦးသန်းထွန်းကို ဒီနေ့မနက်အစောပိုင်းက သင်္ဃန်းကျွန်းမြို့နယ် ငမိုးရိပ်ရပ်ကွက်မှာ PDF တွေက လုပ်ကြံပစ်ခတ်ခဲ့တာကြောင့် ကျည်လေးချက်ထိမှန်ပြီး မြောက်ဥက္ကလာပ ဆေးရုံတင်ပို့ကုသစဥ်မှာ ကွယ်လွန်ခဲ့တာလို့ သိရပါတယ်။
ဦးသန်းထွန်းဟာ ကွယ်လွန်ချိန်မှာ အသက် ၅၄ နှစ်အရွယ်သာရှိသေးပြီး ၁၉၈၈ အရေးအခင်းမှာ ကျောင်းသားအဖြစ် နိုင်ငံရေးမှာပါဝင်ခဲ့သလို NLD စဖွဲ့ကတည်းက သင်္ဃန်းကျွန်းရဲ့လူငယ်အဖွဲ့ဝင်အဖြစ် ထဲထဲဝင်ဝင်ပါဝင်ခဲ့သူဖြစ်ပါတယ်။ ၂၀၁၀ ပြည့်နှစ်မှာတော့ ရွေးကောက်ပွဲလမ်းစဥ်ကိုယုံကြည်သူဖြစ်လို့ ဦးသိန်းညွန့်နဲ့အတူ NDFပါတီအနေနဲ့ သင်္ဃန်းကျွန်းမြို့နယ်ရဲ့ရွေးကောက်ပွဲမှာ တက်တက်ကြွကြွလှုပ်ရှားခဲ့ပြီး ၂၀၁၀ ရွေးကောက်ပွဲအပြီးမှာ ဦးသိန်းညွန့်နဲ့အတူ အမျိုးသားဒီမိုကရေစီပါတီသစ်ကိုတည်ထောင်ပြီး ဒုဥက္ကဋ္ဌအဖြစ်တာဝန်ယူခဲ့ပါတယ်။ ၂၀၂၁ ခုနှစ်မှာ ဦးသိန်းညွန့်နိုင်ငံတော်တာဝန်ထမ်းဆောင်ချိန်မှာ ဦးသန်းထွန်းဟာ NNDP ပါတီရဲ့ဥက္ကဋ္ဌတာဝန်ကို လွှဲပြောင်းထမ်းဆောင်ခဲ့သူဖြစ်ပါတယ်။
“ရွေးကောက်ပွဲလမ်းစဥ်နဲ့ ငြိမ်းချမ်းတဲ့ဒီမိုကရေစီအပြောင်းအလဲကို ယုံကြည်သူတစ်ဦးကို အခုလို အကြမ်းဖက်လုပ်ကြံတာဟာ သူရဲဘောကြောင်သူတွေရဲ့လုပ်ရပ်လို့ပြောချင်ပါတယ်။ ပါတီအတွက်တင်မကဘူး တိုင်းပြည်အတွက်ငြိမ်းချမ်းတဲ့အသွင်ကူးပေါင်းမှုကို ယုံကြည်သူတစ်ဦးကိုဆုံးရှုံးလိုက်ရတာပါ”လို့ NNDP ပါတီရဲ့ ဒုဥက္ကဋ္ဌက MT News ကို ပြောပါတယ်။
