ရာသီဥတုပြောင်းလဲမှုနှင့် ရွှေ့ပြောင်းနေထိုင်မှုဆိုင်ရာသက်ရောက်မှုများမှ မြန်မာကလေးများနှင့် လူငယ်များကို ကာကွယ်ပေးရန် ကုလသမဂ္ဂ ပြော

၇. ၁၀. ၂၀၂၃
Written by Nay Aung

မြန်မာနိုင်ငံရှိလူ့အဖွဲ့အစည်းများသည် အပူချိန်လွန်ကဲခြင်း၊ ဆိုင်ကလုန်းမုန်တိုင်းများ၊ ရေကြီးခြင်း၊ မုန်တိုင်းဒီရေတက်ခြင်းနှင့် မိုးသည်းထန်စွာရွာသွန်းခြင်းတို့ အပါအဝင် သဘာဝဘေး အန္တရာယ်များ ကြုံတွေ့နေရပြီး ရာသီဥတုပြောင်းလဲမှုနှင့် ရွှေ့ပြောင်းနေထိုင်မှုဆိုင်ရာသက်ရောက်မှုများမှ ကလေးများနှင့် လူငယ်များကို ကာကွယ်ရမည်ဖြစ်ကြောင်း ကုလသမဂ္ဂလက်အောက်ခံအဖွဲ့အစည်းတစ်ခုဖြစ်သော UNICEF ၏ ကမ္ဘာလုံးဆိုင်ရာနောက်ဆုံးအစီရင်ခံစာတွင် ဖော်ပြထားသည်။

မြန်မာနိုင်ငံရှိ ကလေးသူငယ်များ ဘေးအန္တရာယ်မကျရောက်မီ၊ ကျရောက်ကာလအတွင်းနှင့် ဘေးအန္တရာယ်များအပြီးတွင် ၎င်းတို့၏ အားနည်းချက်များကို ဖြေရှင်းပေးနိုင်ရန် ခံနိုင်ရည်ရှိပြီး သယ်ဆောင်ရလွယ်ကူသော အထောက်အပံ့ပေးဝန်ဆောင်မှုများကို ဒီဇိုင်းဖော်ထုတ်လုပ်ဆောင်လျက်ရှိနေကြောင်းလည်း UNICEF Myanmar က ဆိုသည်။

မြန်မာနိုင်ငံတွင် မိုးသည်းထန်စွာရွာသွန်းမှုနှင့် ရေကြီးခြင်းများကြောင့် ၂၀၁၆ ခုနှစ်မှ ၂၀၂၁ ခုနှစ်အတွင်း ကလေးငယ်ပေါင်းအားလုံး၏ ၂ ဒသမ ၇ ရာခိုင်နှုန်းဖြစ်သော ကလေးငယ်ပေါင်း ၄၃၀၀၀၀ ကျော် နေရပ်စွန့်ခွာနေထိုင်ခဲ့ရကြောင်း UNICEF ၏ ကမ္ဘာလုံးဆိုင်ရာနောက်ဆုံးအစီရင်ခံစာတွင် ဖော်ပြထားသည်။ ပြီးခဲ့သော ခြောက်နှစ်အတွင်း ကမ္ဘာတဝှမ်းတွင် ဖြစ်ပေါ်ခဲ့သော ရေကြီးမှု၊ မုန်တိုင်း၊ တောမီးလောင်မှုများ၊ အပူချိန်လွန်ကဲခြင်းများကြောင့် တစ်ရက်ကို ကလေးငယ်ပေါင်း ၂၀၀၀၀ ခန့်သေဆုံးခဲ့ရကြောင်း UNICEF အဖွဲ့ကပြောသည်။

မြန်မာနိုင်ငံရှိ ကလေးငယ်များသည် သဘာဝဘေး အန္တရာယ်ဒဏ်အပြင် အာဏာအငြင်းပွားမှုများကြောင့်ဖြစ်ပေါ်လျက်ရှိနေသည့် လက်နက်ကိုင်ပဋိပက္ခများကြောင့် နေရပ်စွန့်ခွာနေထိုင်ရမှုကို ရင်ဆိုင်နေရကြောင်း ကုလသမဂ္ဂအဖွဲ့က ဆိုသည်။ မြန်မာနိုင်ငံ၏ဒေသတွင်းအိမ်နီးချင်းနိုင်ငံများဖြစ်သော ဘင်္ဂလားဒေ့ရှ်၊ ထိုင်းနှင့် ဖိလစ်ပိုင်နိုင်ငံတို့ရှိ ကလေးငယ်များသည် အပူချိန်လွန်ကဲခြင်း၊ ဆိုင်ကလုန်းမုန်တိုင်းများ၊ ရေကြီးခြင်း၊ မုန်တိုင်းဒီရေတက်ခြင်းနှင့် မိုးသည်းထန်စွာရွာသွန်းခြင်းတို့ကြောင့် နေရပ်စွန့်ခွာရမှုအများဆုံးနိုင်ငံများထဲတွင် ပါဝင်နေကြောင်း သိရသည်။

Ref; UNICEF