ရွှေမန်းသူယာဥ် တိမ်းမှောက်မှုမြင်ကွင်း(ဓာတ်ပုံ- အမြန်လမ်းမီးသတ်တပ်ဖွဲ့ ၊ သုခဝေစည်လူမှုကူညီရေးအသင်း၊ CJ)
၈. ၉. ၂၀၂၃
Written by Tha Doe
ရန်ကုန်-မန္တလေး အမြန်လမ်းတွင် ယနေ့နေ့လယ်ခင်းက ရွှေမန်းသူအဝေးပြေးယာဥ်တိမ်းမှောက်မှုကြောင့် ခရီးသည်အမျိုးသမီးတစ်ဦးသေဆုံးကာ ၁၅ ဦး ဒဏ်ရာရမှုဖြစ်ပွားခဲ့သည်ဟု အမြန်လမ်းမီးသတ်တပ်ဖွဲ့မှ သိရှိရသည်။
ယနေ့ စက်တင်ဘာ ၈ ရက် နေ့လယ် ၂ နာရီအချိန်က ရန်ကုန်-မန္တလေးအမြန်လမ်းမကြီးမိုင်တိုင်အမှတ်(၉၂/၁-၂) ဖာလုံကြားတွင် ယာဉ်မတော်တဆမှုဖြစ်ပွားကြောင်း သတင်းရရှိ၍ မြို့ချောင်းအမြန်လမ်းမီးသတ်စခန်းမှ တပ်ဖွဲ့ဝင် ၆ ဦး၊ မြို့ချောင်းအမြန်လမ်းရဲစခန်းမှ စခန်းမှူး အပါအဝင် တပ်ဖွဲ့ဝင် ၇ ဦးနှင့်အတူ၊ကယ်ဆယ်ရေးလုပ်ငန်းများသွား ရောက်ဆောင်ရွက်ခဲ့သည်ဟု သိရသည်။
ဖြစ်စဉ်မှာ ရန်ကုန်ဘက်မှ နေပြည်တော်ဘက်သို့ မောင်းနှင်လာသော YUTONG အမျိုးစား(ခရမ်းရောင်) EXPRESS ခရီးသည်တင်ယာဉ်မှာ အခင်းဖြစ်နေရာအရောက် ယာဉ်မောင်းအိပ်ငိုက်၍ ယာဘက်မြေသားလမ်းပေါ်သို့ရောက်ကာ အရှိန်မထိမ်းနိုင်ဘဲ လမ်းလယ်ကျွန်းပေါ်သို့ ရောက်ရှိကာ ရေနုတ်မြောင်းပေါ်တွင် အလျားလိုက် လဲကျတိမ်းမှောက်ရပ်တန့်သွားခဲ့သည်ဟု အမြန်လမ်းမီးသတ်တပ်ဖွဲ့က ပြောသည်။
ထို ယာဥ်တိမ်းမှောက်မှုကြောင့် ယာဥ်ပေါ်တွင် လိုက်ပါလာသည့် ယာဥ်မောင်းအပါအဝင် အမျိုးသား ၁၂ ဦး၊ အမျိုးသမီး ၁၁ ဦး စုစုပေါင်း၂၃ ဦးအနက် အမျိုးသမီးတစ်ဦးမှာ အခင်းဖြစ်နေရာတွင်သေဆုံးခဲ့ပြီး အမျိုးသား ၄ ဦး၊ အမျိုးသမီး ၁၁ တို့မှာ ထိခိုက်ဒဏ်ရာအသီးသီးရရှိသဖြင့် မြို့ချောင်းတိုက် နယ်ဆေးရုံသို့ပို့ဆောင်ကူညီပေးခဲ့သည်ဟု သိရသည်။
“ခရီးသည်အများစုက ဒဏ်ရာမပြင်းထန်ပေမဲ့ အမျိုးသမီးတစ်ဦးကတော့ စိုးရိမ်ဒဏ်ရာရလို့ ထိခိုက်မှုပြင်းထန်တာကြောင့် နေပြည်တော်ကုတင်(၁၀၀၀) ဆေးရုံကြီးဆီကို ပရဟိတအသင်းတွေက ကူညီပို့ဆောင်ခဲ့ပါတယ်” ဟု ယာဥ်တိမ်းမှောက်မှုကို ပါဝင်ကူညီခဲ့သူတစ်ဦးကပြောသည်။
