၁၅.၈.၂၀၂၃
Written By Thandar
အိမ်ထောင်ကျပြီး ရင်သွေးလေးလွယ်ထားရပေမယ့် ပရိသတ်အားပေးမှုကို ဆက်လက်ရရှိနေတဲ့ သရုပ်ဆောင် ပိုးကြာဖြူခင်ကတော့ လူပေါင်း အယောက် ၄,၀၀၀ ကျော်စာ နေ့လည်စာ စတုဒီသာ ကျွေးမွေးလှူဒါန်းခဲ့ပါတယ်။
သူမကတော့ မန္တလေးမြို့ရှိ ရတနာ PK Htun မိသားစုအနေနဲ့ နံနက် ၉ နာရီကနေ နေ့လည် ၁၂ နာရီအထိ ထမင်း၊ ဝက်သားနှပ်၊ ကြက်ခြောက်စပ်ကြော်၊ ငါးဆုပ်ပဲသီးကြော်၊ ဘာလချောင်ကြော်၊ ဖရုံသီးနှပ်၊ ပဲသီးအစပ်ချက်၊ ဟင်းရည်၊ အစိမ်းကြော်၊ တို့စရာအစုံ၊ အအေး စတာတွေကို လူအယောက် ပေါင်း ၄,၀၀၀ ကျော်စာကို စတုဒီသာအလှူပြုလုပ်ခဲ့တာလည်း ဖြစ်ပါတယ်။
“လူပေါင်း ၄,၀၀၀ ကျော်ကို နေ့လည်စာ လှူဒါန်းကျွေးမွေးနိုင်ခဲ့တာပါ။ ကျွန်မတို့မိသားစုရဲ့ အလှူလေးကို ဝမ်းသာပီတိဖြစ်မိသလို ပရိသတ်တွေလည်း ထပ်တူပီတိရရှိစေမယ်လို့ မျှော်လင့်ပါတယ်။ နောက်လတွေမှာလဲ အခုလိုပဲ အများကြီးထပ်မံလှူဒါန်းနိုင်ဖို့ ကြိုးစားပါဦးမယ်ရှင့်။ အခုလိုလှူနိုင်တယ်ဆိုတာဟာလည်း ချစ်ရတဲ့ရတနာဝယ်ယူအားပေးသူတွေ ဆိုင်လေးကိုဝန်းရံပေးသူများ အားလုံးကြောင့်ပါ။ အားပေးကြသူ ရတနာချစ်သူတွေကိုလည်း အစဉ်ချစ်ခင်လေးစားလျှက်ပါနော်”လို့ သရုပ်ဆောင်ပိုးကြာဖြူခင်က ပြောပါတယ်။
အဆိုပါ အလှူလေးဖြစ်မြောက်ဖို့အတွက် အဖက်ဖက်က မေတ္တာဖြင့်ကူညီပေးခဲ့တဲ့ မဏိစလလူမှုနာမှုကူညီရေးအသင်းသူအသင်းသားအားလုံးနဲ့တကွ မိုးထိအောင်စည်ကျောက်မြတ်ကုမ္ပဏီကိုလည်း ကျေးဇူးတင်တယ်လို့ ဆိုပါတယ်။ မကြာခင် လပိုင်းကလည်း သရုပ်ဆောင် ပိုးကြာဖြူခင်နဲ့ Jay တို့ရဲ့သီဆိုထားတဲ့ “Without Me” သီချင်းသစ်ကို ထွက်ရှိထားပြီး ပရိသတ်အားပေးမှုများစွာ ရရှိခဲ့တာလည်း ဖြစ်ပါတယ်။
