MT News
Written by Min Mahar
ယာခင်းမှအလုပ်လုပ်ပြီးပြန်လာသော အမျိုးသားတစ်ဦး PDF များထောင်ထားသည့် မိုင်းပေါက်ကွဲမှုကြောင့် ဒဏ်ရာရရှိမှု မတ္တရာမြို့နယ်တွင် ဩဂုတ် ၂ ရက် ညဦးပိုင်းကဖြစ်ပွားခဲ့ကြောင်း ဒေသခံလူမှုကူညီရေးအသင်းအဖွဲ့များထံမှ သိရသည်။
ဖြစ်စဉ်မှာ ဩဂုတ် ၂ ရက် ည ၆ နာရီ ၄၅ မိနစ်ခန့်က မန္တလေးတိုင်းဒေသကြီး၊ မတ္တရာမြို့နယ်၊ ညောင်ပင်သာကျေးရွာတွင် နေထိုင်ပြီး တောင်သူလုပ်ကိုင်နေသည့် အသက် ၃၀ ဝန်းကျင်ခန့်ရှိသော အမျိုးသားတစ်ဦးသည် ကျေးရွာအနီးရှိ ၎င်း၏ယာခင်းမှ ပြန်လာစဉ် လမ်းခုလတ်၌ PDF များထောင်ထားသည့် လက်လုပ်မိုင်းတစ်လုံးပေါက်ကွဲမှုကြောင့် ဒဏ်ရာများရရှိခဲ့ကြောင်း သိရသည်။
အဆိုပါပေါက်ကွဲမှုကြောင့် ၎င်းအမျိုးသားသည် ရင်အုံ၊ လည်ပင်း၊ ဆီးခုံ၊ ယာပေါင်ရင်း၊ ယာတံတောင်ဆစ်တို့တွင် မိုင်းစဖောက်ဝင်သွားသည့်ဒဏ်ရာများ(မစိုးရိမ်ရ)အသီးသီး ရရှိခဲ့သဖြင့် ဒေသခံလူမှုကူညီရေးယာဉ်ဖြင့် မတ္တရာမြို့ပြည်သူ့ဆေးရုံကြီးသို့ပို့ဆောင်ကာ ဆေးကုသမှုခံယူနေကြောင်း ၎င်းနှင့်ဆွေမျိုးတာ်စပ်သူတစ်ဦးက MT News သတင်းဌာနသို့ ပြောသည်။
