တရုတ်နှင့် ထိုင်းနိုင်ငံတို့ ကြည်း၊ ရေ၊ လေ စစ်ရေးလေ့ကျင့်မှုများပြုလုပ်နေပြီး စက်တင်ဘာလအထိ လေ့ကျင့်မည်

၁၇.၇.၂၀၂၃
Translated by Htwe Ko Tun

တရုတ်ပြည်သူ့သမ္မတနိုင်ငံနှင့် ထိုင်းနိုင်ငံတို့က ၎င်းတို့၏ လေတပ်၊ ရေတပ်နှင့် ကြည်းတပ်များ ပူးပေါင်းပါဝင်သော စစ်ရေးလေ့ကျင့်မှုများကို ဇူလိုင်လမှ စက်တင်ဘာလအထိ ပြုလုပ်လျက်ရှိကြကြောင်း ထိုင်းစစ်ဖက်အရင်းအမြစ်တစ်ခုမှ သိရသည်။

Falcon Strike 2023 ဟုခေါ်သော နှစ်စဉ်ပူးတွဲစစ်ရေးလေ့ကျင့်မှုကို ဇူလိုင်လ ၉ ရက်မှ ဇူလိုင်လ ၂၁ ရက်အထိ ပြုလုပ်မည်ဖြစ်သည်။ ဒေသ‌ငြိမ်းချမ်းရေးနှင့် တည်ငြိမ်အေးချမ်းရေးကိုထိန်းသိမ်းနိုင်ရန် တရုတ်နှင့် ထိုင်း လေတပ်ဖွဲ့များ ပူးပေါင်းဆောင်ရွက်မှု ခိုင်မာစေရေးအတွက် ရည်ရွယ်ပြုလုပ်ခဲ့ခြင်းဖြစ်၍ စစ်ရေးလေ့ကျင့်မှု၏ ဖွင့်ပွဲအခမ်းအနားကို ထိုင်းနိုင်ငံ၊ ယူဒုံသာနီပြည်နယ်ရှိ လေတပ်စခန်းတွင် ပြုလုပ်ခဲ့သည်။

Falcon Strike စစ်ရေးလေ့ကျင့်မှုကို ၂၀၁၅ ခုနှစ်တွင် စတင်ခဲ့ကာ ကိုဗစ်-၁၉ မဖြစ်ပွားမီ ၂၀၁၇ ခုနှစ်၊ ၂၀၁၈ ခုနှစ်နှင့် ၂၀၁၉ ခုနှစ်တို့တွင် ဆက်လက်ပြုလုပ်ခဲ့သည်။ Falcon Strike စစ်ရေးလေ့ကျင့်မှုတွင် နှစ်နိုင်ငံစလုံးမှ တိုက်လေယာဉ်များ ပါဝင်ခဲ့ကြသည်။ သို့ရာတွင် ထိုင်းနှင့်အမေရိကန်ပြည်ထောင်စုတို့အကြား သဘောတူညီချက်အရ ထိုင်းလေတပ်က အမေရိကန်မှရရှိထားသော အက်ဖ်-၁၆ နှင့် အက်ဖ်-၅ လေယာဉ်များမှာမူ စစ်ရေးလေ့ကျင့်မှုတွင် ပါဝင်ရန်ခွင့်မပြုကြောင်း သိရသည်။

ဩဂုတ်လ ၁၆ ရက်မှ စက်တင်ဘာလ ၂ ရက်အထိ နှစ်နိုင်ငံလက်နက်ကိုင်တပ်ဖွဲ့များမှ အထူးစစ်ဆင်ရေးတပ်ဖွဲ့များကလည်း ထိုင်းနိုင်ငံ လော့ပ်ဘူရီပြည်နယ်အတွင်း Joint Stake 2023 ကို ဆက်လက်ပြုလုပ်ကြမည်ဖြစ်သည်။

နှစ်နိုင်ငံရေတပ်များ၏ Blue Strike ခေါ် စစ်ရေးလေ့ကျင့်မှုကိုမူ ထိုင်းနိုင်ငံအရှေ့ပိုင်း ချောင်ဘူရီ ရာယွန်ပြည်နယ်နှင့် ချန်သာဘူရီပြည်နယ်တို့တွင် စက်တင်ဘာ ၃ ရက်မှ စက်တင်ဘာလ ၁၀ ရက်အထိ ပြုလုပ်သွားမည်ဟု သိရသည်။ ထိုစစ်ရေးလေ့ကျင့်မှုကို နှစ်နှစ်တစ်ကြိမ်ပြုလုပ်ပြီး နှစ်နိုင်ငံ အိမ်ရှင်အဖြစ် အလှည့်ကျတာဝန်ယူကြသည်။

ဩဂုတ်လ ၃၁ ရက်တွင် တရုတ်စစ်သင်္ဘောများနှင့် ကုန်းရေနှစ်သွယ်သွား ကမ်းတက်ရေယာဉ်များက ချောင်ဘူရီပြည်နယ်၊ ဆတ်တာရှစ်မြို့သို့ စစ်ရေးလေ့ကျင့်မှုတွင် ပါဝင်ရန် ရောက်လာကြမည် ဖြစ်သည်။ ထိုင်းရေတပ်သတင်းအရင်းအမြစ်တစ်ခုအရ တောင်တရုတ်ပင်လယ်တွင် တရုတ်နှင့်အမေရိကန်ကြားတင်းမာမှုများကြောင့် ယခုနှစ် ရေတပ်စစ်ရေးလေ့ကျင့်မှုကိုတိတ်တဆိတ်ကျင်းပသွားမည်ဟု ဆိုသည်။

Ref—- Bangkok Post