၇. ၇. ၂၀၂၃
Written by Nay Moe
နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဦးသန်းဆွေသည် မြန်မာနိုင်ငံ၏ လက်ရှိ ပြည်တွင်းနိုင်ငံရေးဖြစ်ပေါ်တိုးတက်မှု အခြေအနေများနှင့်ပတ်သက်၍ ရန်ကုန်မြို့ အခြေစိုက် သံတမန်များနှင့် ကုလသမဂ္ဂဌာနေ ကိုယ်စားလှယ်တို့အား ရှင်းလင်းပြောကြားမှုအစီအစဉ်ကို ရန်ကုန်မြို့ရှိ နိုင်ငံခြားရေးဝန်ကြီးဌာန၊ ဝန်ဇင်းမင်းရာဇာခန်းမ၌ ဇူလိုင် ၆ ရက်က ပြုလုပ်ခဲ့ပြီး PDF များ သ-တ်ဖြတ်မှုကြောင့် ပြည်သူ ၅၉၃၈ ဦး သတ်ဖြတ်ခံခဲ့ရပြီးဖြစ်ကြောင်း သံတမန်များကို အသိပေးခဲ့သည်။
အဆိုပါ အစီအစဉ်တွင် ပြည်ထောင်စုဝန်ကြီးက မြန်မာအစိုးရ၏ ရှေ့လုပ်ငန်းစဉ်(၅) ရပ်နှင့်အညီ တရားဥပဒေစိုးမိုးရေးနှင့် ငြိမ်းချမ်းရေးအပါအဝင် ဒီမိုကရေစီဖော်ဆောင်ရေးတို့အတွက် ကြိုးပမ်း ဆောင်ရွက်မှုများကို ရှင်းလင်းပြောကြားသည်။ လက်ရှိ မြန်မာနိုင်ငံသည် ကိုဗစ်-၁၉ ကပ်ရောဂါ၊ ရွေးကောက်ပွဲမသမာမှုနှင့်ဆက်စပ်သည့် မတည်ငြိမ်မှုများ၊ ဆိုင်ကလုန်း မုန်တိုင်းမိုခါကဲ့သို့သော သဘာဝဘေးအန္တရာယ်နှင့် ပထဝီဝင်နိုင်ငံရေးအရ သက်ရောက်မှုများနှင့် သတင်းမီဒီယာစစ်ပွဲဆိုင်ရာ စိန်ခေါ်မှုများကိုရင်ဆိုင်နေရသော်လည်း တရားဥပဒေစိုးမိုးရေး ဆောင်ရွက်ခြင်း၊ ငြိမ်းချမ်း၍ အများပါဝင်နိုင်သော နိုင်ငံရေးလုပ်ငန်းစဉ် ဖော်ဆောင်ခြင်းတို့ဖြင့် ကြိုးပမ်းလျက်ရှိသည်ကို ရှင်းလင်းပြောကြားခဲ့သည်။
ထို့ပြင် အာဆီယံတူညီဆန္ဒ(၅)ချက်ဖော်ဆောင်ရာတွင် အရေးကြီးဆုံးအချက်များဖြစ်သည့် အကြမ်းဖက်မှုများရပ်တန့်ရေး၊ အားလုံးပါဝင်သည့် ဆွေးနွေးပွဲများ ကျင်းပရေးနှင့် လူသားချင်း စာနာထောက်ထားမှုဆိုင်ရာကူညီထောက်ပံ့မှုများ ပေးအပ်ရေးတို့ကိုလည်း ဆောင်ရွက်လျက်ရှိကြောင်း ရှင်းလင်းခဲ့သည်။
ယင်းအပြင် ပြည်ထောင်စုဝန်ကြီးက မြန်မာနိုင်ငံတွင်ငြိမ်းချမ်းရေးဆွေးနွေးပွဲများကို အကြိမ် (၅၀၀၀) ကျော် ကျင်းပခဲ့ပြီးဖြစ်ကြောင်း၊ တိုင်းရင်းသား လက်နက်ကိုင်အဖွဲ့အစည်းများနှင့် အပစ်အခတ် ရပ်စဲမှုစတင်ခဲ့သည်မှာ (၃၃)နှစ်တိုင်ရှိပြီး အပြီးသတ်ငြိမ်းချမ်းရေးအတွက် မြန်မာအစိုးရအဆက် ဆက်မှကြိုးပမ်းအားထုတ်ခဲ့ကြောင်းတို့ကို အသေးစိတ်ရှင်းလင်းပြောကြားခဲ့သည်။ ထို့အတွက် တပ်မတော်အနေဖြင့် တစ်နိုင်ငံလုံးဆိုင်ရာ အပစ်အခတ်ရပ်စဲရေး သဘောတူစာချုပ်အရ စတင်တိုက်ခိုက်မှုမပြုခြင်း၊ ပြည်သူများအားအကာအကွယ်ပေးရန် ထိန်းထိန်းသိမ်းသိမ်းနှင့် ထိခိုက်မှုအနည်းဆုံးဖြစ်စေရန် ဂျီနီဗာကွန်ဗင်းရှင်းပါ စည်းမျဉ်းများနှင့် အညီဆောင်ရွက်ခဲ့သည်များကိုလည်းအသိပေးခဲ့သည်။
အဆိုပါအချက်များအပြင် ပြည်ထောင်စုဝန်ကြီးက PDF များ၏ အကြမ်းဖက် တိုက်ခိုက်မှုကြောင့် အပြစ်မဲ့ပြည်သူ ၅,၉၃၈( အရပ်သား ၄,၈၇၈ ဦး နှင့် အစိုးရဝန်ထမ်း ၁,၀၆၀ ဦး) ကျော် ထိခိုက်သေဆုံးခဲ့ခြင်း၊ PDF များ၏ အဖျက်အမှောင့်လုပ်ငန်းကျူးလွန်မှုများ၊ ဒီမိုကရေစီဖော်ဆောင်ရေးလုပ်ငန်းစဉ်များအား အဟန့်အတားဖြစ်အောင် လုပ်ဆောင်နေမှုများ၊ ၎င်းတို့၏ဥပဒေပြင်ပလုပ်ရပ်များမှ ပြည်သူ များအား ကာကွယ်ရန် အစိုးရအနေဖြင့် PDF များကို တုံ့ပြန်ဆောင်ရွက်ရခြင်း ဖြစ်ကြောင်းအသိပေးပြောကြားခဲ့သည်။
ဆက်လက်၍ ပြည်ထောင်စုဝန်ကြီးက ရခိုင်ပြည်နယ်ရှိ လူမှုအသိုက်အဝန်းများအကြား ငြိမ်းချမ်းရေးနှင့်သဟဇာတရှိစေရေး ကြိုးပမ်းဆောင်ရွက်မှုများ၊၂၀၁၇နှင့် ၂၀၁၈ ခုနှစ်များတွင် မြန်မာ-ဘင်္ဂလားဒေ့ရှ်နှစ်နိုင်ငံအကြားချုပ်ဆိုထားသည့် သဘောတူစာချုပ်အကောင်အထည်ဖော် ဆောင်မှုအခြေအနေများနှင့် နိုင်ငံသားစိစစ်ပြီးသည့် နေရပ်စွန့်ခွာသူများအား ပြန်လည် လက်ခံ ရေး လုပ်ငန်းစဉ်ကို ဆောလျင်စွာ စတင်နိုင်ရေး ဆောင်ရွက်နေမှုများကို ရှင်းလင်းပြောကြားခဲ့သည်။
ထို့ပြင် မိုခါဆိုင်ကလုန်းဘေးဒဏ်ထိခိုက်ခံစားခဲ့ရသည့် ဒေသများနှင့် ပြည်သူများအား ကူညီကယ်ဆယ်မှုများနှင့်ပြန်လည်ထူထောင်ရေးလုပ်ငန်းများအတွက် အစိုးရ၏ ကြိုးပမ်းဆောင်ရွက်မှုများ၊ ဒေသတွင်းနှင့် နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်မှုများကိုလည်း ရှင်းလင်းပြောကြားခဲ့သည်။
ထို့နောက် အမေးအဖြေကဏ္ဍတွင် တက်ရောက်လာသည့် သံတမန်များမှသိရှိလိုသည်များကိုမေးမြန်းခဲ့ပြီး၊ တာဝန်ရှိသူများက ရှင်းလင်းပြောကြားမှုအပြီး တက်ရောက်သူများမှ ခင်းကျင်း ပြသထားသည့် မှတ်တမ်းဓာတ်ပုံများ၊ အချက်အလက်များကို ကြည့်ရှုကြကြောင်း သိရှိရသည်။
နွေဦးတော်လှန်ရေးစတင်ချိန်မှ တပ်မတော်သားများ၊ ရဲတပ်ဖွဲ့ဝင်များ၊ နိုင်ငံ့ဝန်ထမ်းများအပါအဝင် SAC အစိုးရနှင့် ဆက်နွှယ်သူ ၃၀၀၀၀ ကျော်ကို သတ််ဖြတ်ထားပြီးဖြစ်သည်ဟုလည်း NUG ယာယီသမ္မတဒူဝါလရှီးလက ဝန်ခံထားပြီး ထိုပမာဏမှာ SAC ကြောင့် သေဆုံးရသည်ဟု AAPP စွပ်စွဲသည့် ၃၄၅၀ ကျော်ထက် ဆယ်ဆခန့်ဖြစ်နေပြီး NUG က ပိုမိုသတ်ဖြတ်ထားသည်ကို တွေ့ရကာ ထိုသတ်ဖြတ်မှုများအတွက် တာဝန်ယူမှု၊ တာဝန်ခံမှုနှင့် နိုင်ငံတကာက ဖိအားပေးမှုလည်း မရှိချေ။
