MT News
Written By Thandar
အဆိုတော် ပိုပိုနဲ့ သူ့ရဲ့ ပရိသတ်တွေ တရင်းတနှီးတွေ့ဆုံတဲ့ Fan Meeting ပွဲကို ဇူလိုင်လ ၂ ရက် နေ့လည်ပိုင်းက Sky Star Hotel မှာ စည်ကားသိုက်မြိုက်စွာ ကျင်းပခဲ့ပါတယ်။
“ပိုပို ကိုယ့် Fan တွေနဲ့ တရင်းတနှီးတွေ့ဆုံချင်လို့ Fan Meeting လုပ်ဖြစ်တာပါ။ နောက်ပြီးတော့ ဒီပွဲက ရတဲ့ အကျိုးအမြတ်တချို့ကို လိုအပ်နေတဲ့သူတွေကို ဝေမျှကူညီဖို့အတွက် အစီအစဉ်ရှိလို့ Fan Meeting ပေါင်းလုပ်ဖြစ်တာပါ။ ခုလို Fan Meeting လုပ်ရတာအရမ်းပျော်တယ်။လက်မှတ်တွေပြန်ထိုးတဲ့အချိန်မှာ Album ထွက်တုန်းကလို ခံစားချက်တွေ ပြန်ရတယ်”လို့ ပိုပိုက ပြောပါတယ်။
အဆိုပါ Fan Meeting ပွဲမှာ Guest တွေအနေနဲ့ အဆိုတော် ဟိဏ်းသစ်နဲ့ DJ Kandi K က တီးခတ်သီဆို ဖျော်ဖြေပေးခဲ့ပါတယ်။ ပိုပိုက တေးသီချင်းတွေ သီဆိုဖျော်ဖြေတာ၊ ပျော်ရွှင်စရာ ဂိမ်းတွေဆော့ခဲ့တာ၊ ပိုပိုရဲ့ Music Videoနဲ့ ပတ်သက်ပြီး အမေးအဖြေ ကဏ္ဍလေးတွေ လုပ်ခဲ့တာလည်း ပါဝင်ခဲ့ပါတယ်။
သူမ Fan Meeting မလုပ်ဖြစ်တာ ကြာမြင့်ပြီဖြစ်ပြီး အခုလို ပထမဆုံး အကြိမ် Fan Meeting ပြန်လုပ်ဖြစ်ခဲ့တာ အရမ်းကို ပီတိဖြစ်ခဲ့ရတယ်လို့ ပိုပိုက ဆိုပါတယ်။
