၂၂. ၆. ၂၀၂၃
Written by Nay Moe
လယ်ဝေးရဲစခန်းနှင့် MICC-2 ဂိတ်ဝင်ပေါက် ဗုံးခွဲတရားခံတစ်ဦးထပ်မံဖမ်းမိရာမှ ဖောက်ခွဲမှုခုနစ်ကြိမ်ကျုးလွန်ထားမှု ဆက်လက်ပေါ်ပေါက်ခဲ့သည်ဟု ယခုသိရသည်ဓ
ဖြစ်စဥ်မှာ ၂၀၂၃ ခုနှစ်၊ ဇွန်လ ၁၂ ရက် ညနေပိုင်းတွင် လယ်ဝေးမြို့မရဲစခန်းအား လူ၂ ဦးကလက်ပစ်ဗုံးဖြင့် ချောင်းမြောင်းပစ်ခတ်ခဲ့ပြီး ယင်းနေ့ညပိုင်းတွင် နေပြည်တော်ကောင်စီနယ်မြေ၊ ဇမ္ဗူသီရိမြို့နယ်၊ ဘောဂသိဒ္ဓိရပ်ကွက်၊ MICC-II ဂိတ်(၂)ဝင်ပေါက်အား လူ ၃ ဦးတို့မှ လက်ပစ်ဗုံးဖြင့် ပစ်ပေါက်ဖောက်ခွဲခဲ့သည့် ဖြစ်စဉ်များဖြစ်ပွားခဲ့ရာ လုံခြုံရေးတပ်ဖွဲ့ဝင်များ၏ ကြိုးပမ်းမှုနှင့် ပြည်သူများ၏ ပူးပေါင်းပါဝင်မှုများကြောင့် ပြစ်မှုကျူးလွန်သူ ၂ ဦးနှင့် ဆက်စပ်တရားခံ ကျား ၂ ဦးတို့အား ဖြစ်စဉ်ဖြစ်ပွားပြီး ၁၀ နာရီအတွင်း ဖော်ထုတ် ဖမ်းဆီးရမိခဲ့ကြောင်းအား ဇွန်လ ၁၃ ရက်တွင် သတင်းထုတ်ပြန်ခဲ့သည်။
ဖမ်းဆီးရမိတရားခံများ၏ ထွက်ဆိုချက်အရ ဖောက်ခွဲမှုများ ကျူးလွန်ရာတွင် အဓိကပါဝင်သူ မြင့်ကျော်သည် ဒက္ခိဏသီရိမြို့နယ်၊ ရွှေခဲအင်းအုပ်စု၊ သီရိမင်္ဂလာကျေးရွာတွင် နေထိုင်ကြောင်း သိရှိရသဖြင့် ဇွန်လ ၁၈ ရက် နံနက်ပိုင်းတွင် လုံခြုံရေးတပ်ဖွဲ့ဝင်များမှ သွားရောက်ရှာဖွေခဲ့ရာ မြင့်ကျော်သည် လောက်ကိုင်မြို့သို့ ထွက်ပြေးတိမ်းရှောင်သွားခဲ့ပြီး ၎င်း၏နေအိမ်အတွင်းမှ လက်ပစ်ဗုံး ၁ လုံး၊ ပြစ်မှုကျူးလွန်စဉ် အသုံးပြုခဲ့သည့် Turbo 110 အမျိုးအစား ဆိုင်ကယ်နှင့် ဆိုင်ကယ်စီးဦးထုပ်တို့အား သိမ်းဆည်းရမိခဲ့သည်။
သို့ဖြစ်၍ မြင့်ကျော်အား ဖမ်းဆီးရမိရေး ဆောင်ရွက်ခဲ့ရာ ဇွန်လ ၁၉ ရက် ညပိုင်းတွင် မြင့်ကျော်အား လောက်ကိုင်မြို့၊ အမှတ်(၂) ရပ်ကွက်၌ ဖမ်းဆီးရမိခဲ့ပြီး နေပြည်တော်သို့ ပြန်လည်ခေါ်ဆောင်၍ စစ်ဆေးမှုများ ဆောင်ရွက်ခဲ့သည်။
အဆိုပါ ဖောက်ခွဲမှုဖြစ်စဉ်များမှ တရားခံများအား စစ်ဆေးဖော်ထုတ်ချက်အရ ဇွန်လ ၂၁ ရက် နံနက်ပိုင်းတွင် ဇဗ္ဗူသီရိမြို့နယ်၊ ရှားတောကျေးရွာနှင့် အလျင်လိုကျေးရွာကြား လမ်းဘေးသစ်ပင်အောက်၌ သိုဝှက်မြှုပ်နှံထားသော CZ-2075 RAMI ပစ္စတို ၁ လက်၊ ၎င်းကျည် ၇ တောင့်တို့အားလည်းကောင်း၊ ဒက္ခိဏသီရိမြို့နယ်၊ ရွှေခဲအင်းအုပ်စု၊ သီရိမင်္ဂလာကျေးရွာရှိ မြင့်ကျော်၏ နေအိမ်မီးဖိုချောင်အတွင်း၌ သိုဝှက်ထားသော Beretta ပစ္စတို ၁ လက်၊ ၎င်းကျည် ၁၅ တောင့်တို့အားလည်းကောင်း သိမ်းဆည်းရမိခဲ့သည်။
ဖြစ်စဉ်တွင် တရားခံ ကျား ၅ ဦးတို့အား ပစ္စတို ၂ လက်၊ ၉ မမကျည် ၂၂ တောင့်၊ လက်ပစ်ဗုံး ၁ လုံး၊ ပြစ်မှုကျူးလွန်စဉ် အသုံးပြုခဲ့သည့် ဆိုင်ကယ် ၁ စီးတို့နှင့်အတူ ဖမ်းဆီးရမိခဲ့သည်။
ဖမ်းဆီးရမိတရားခံများ၏ ထွက်ဆိုချက်အရ မြင့်ကျော်သည် နေပြည်တော်ကောင်စီနယ်မြေအတွင်း အကြမ်းဖက်လုပ်ငန်းများ ဆောင်ရွက်ရန်အတွက် ၂၀၂၃ ခုနှစ်၊ ဖေဖော်ဝါရီလ ၂၆ ရက်တွင် စစ်တောင်းမြို့ပြပြောက်ကျားအဖွဲ့ခေါင်းဆောင် ဖမ်းဆီးရန်ကျန်တရားခံ ဇင်ယော်ထံမှ ပစ္စတို ၂ လက်၊ ၉ မမကျည် ၃၀ တောင့်နှင့် လက်ပစ်ဗုံး ၈ လုံးတို့အား ရန်ကုန်-မန္တလေးအမြန်လမ်း၌ ၂ ကြိမ်ခွဲ၍ သွားရောက်ယူဆောင်ခဲ့ပြီး နေအိမ်၌ သိမ်းဆည်းထားခဲ့ကြောင်း သိရှိရသည်။
ဖမ်းဆီးရမိတရားခံများ၏ ထွက်ဆိုချက်အရ စစ်တောင်းမြို့ပြပြောက်ကျားအဖွဲ့ခေါင်းဆောင် ဖမ်းဆီးရန်ကျန်တရားခံ ဇင်ယော်၏ ခိုင်းစေမှုဖြင့် နေပြည်တော်ကောင်စီနယ်အတွင်း အကြမ်းဖက်ဖောက်ခွဲမှု ၇ ကြိမ် ဆောင်ရွက်ခဲ့ကြောင်း သိရပြီး ထိုပြစ်မှုများမှာ
◾ ၂၀၂၃ ခုနှစ်၊ ဖေဖော်ဝါရီလ ၂၈ ရက်တွင် မြင့်ကျော်နှင့် သက်နိုင်တို့ ၂ ဦးသည် ဇဗ္ဗူသီရိမြို့နယ်၊ ရွှေကြာပင်ရပ်ကွက်ရှိ ဦးမြငြိမ်း၏ နေအိမ်အား လက်ပစ်ဗုံးဖြင့် ပစ်ခတ်ဖောက်ခွဲခဲ့ကြောင်း။
◾ မတ်လ ၂ ရက်တွင် မြင့်ကျော်၊ သက်နိုင်နှင့် ရဲနိုင်တို့ ၃ ဦး သည် ဇဗ္ဗူသီရိမြို့နယ်၊ ချိုင်းရွာလမ်းဆုံရှိ ရဲကင်းစခန်းအား လက်ပစ်ဗုံးဖြင့် ပစ်ခတ်ဖောက်ခွဲခဲ့ကြောင်း။
◾ ဧပြီလ ၁၃ ရက်တွင် သက်နိုင်နှင့် ရဲနိုင်တို့ ၂ ဦးမှ ဒက္ခိဏသီရိမြို့နယ်ရှိ လျှပ်စစ်ဓာတ်အားခွဲရုံအား လက်ပစ်ဗုံးဖြင့် ပစ်ခတ်ဖောက်ခွဲခဲ့ရာတွင် မြင့်ကျော်မှ အခြေအနေကြည့်ရှုပေးခဲ့ကြောင်း။
◾ ဧပြီလ ၁၆ ရက်တွင် သက်နိုင်နှင့် ရဲနိုင်တို့ ၂ ဦးမှ ဇဗ္ဗူသီရိမြို့နယ်၊ အဆင့်မြင့်ဈေး အနောက်ဘက်ရှိ ရဲကင်းစခန်းအား လက်ပစ်ဗုံးဖြင့် ပစ်ခတ်ဖောက်ခွဲခဲ့ရာတွင် မြင့်ကျော်မှ အခြေအနေ ကြည့်ရှုပေးခဲ့ကြောင်း။
◾ မေလ ၃ ရက်တွင် သက်နိုင်နှင့် ရဲနိုင်တို့ ၂ ဦးသည် ဥတ္တရသီရိမြို့နယ်၊ ရာဇသင်္ဂဟလမ်းနှင့် သီရိမဏ္ဍိုင်လမ်းထောင့်ရှိ ရဲကင်းစခန်းအား ပစ္စတိုဖြင့်ပစ်ခတ်၍ လက်ပစ်ဗုံးဖြင့် ပစ်ခတ်ဖောက်ခွဲခဲ့ကြောင်း။
◾ ဇွန်လ ၁၂ ရက်တွင် သက်နိုင်နှင့် ရဲနိုင်တို့ ၂ ဦးမှ လယ်ဝေးမြို့မရဲစခန်းရှေ့တွင် လုံခြုံရေးတပ်ဖွဲ့ဝင်များအား လက်ပစ်ဗုံးဖြင့် ချောင်းမြောင်း ပစ်ခတ်ရာတွင် မြင့်ကျော်မှ အခြေအနေ ကြည့်ရှုပေးခဲ့ကြောင်း။
◾ အလားတူ ဇွန်လ ၁၂ ရက်တွင် မြင့်ကျော်နှင့် သက်နိုင်တို့ ၂ ဦးမှ ဇမ္ဗူသီရိမြို့နယ်၊ ဘောဂသိဒ္ဓိရပ်ကွက်၊ ဉာဏအောင်မြေလမ်း၊ MICC-II ဂိတ်(၂)ဝင်ပေါက်အား လက်ပစ်ဗုံးဖြင့် ပစ်ခတ်ဖောက်ခွဲခဲ့ရာတွင် ရဲနိုင်မှ အခြေအနေကြည့်ရှုပေးခဲ့ကြောင်း သိရပြီး ဖမ်းမိတရားခံများအား ထိရောက်စွာ အရေးယူနိုင်ရန်နှင့် ကျန်ရှိတရားခံများဖမ်းမိရေးကြိုးပမ်းနေကြောင်း သိရသည်။
