၂၁.၆.၂၀၂၃
Written By Thanda
Miss Universe Yangon 2023 ပြိုင်ပွဲ ပါဝင်ယှဉ်ပြိုင်ခဲ့တဲ့ ပြိုင်ပွဲဝင်အလှမယ်တွေထဲက ရန်ကုန်တိုင်းကိုယ်စားပြု Miss Universe Yangon 2023 ပြိုင်ပွဲမှာ အလှမယ်လေးဦး ထွက်ပေါ်လာခဲ့ပါတယ်။
ဒီ Miss Universe Yangon 2023 ပြိုင်ပွဲကို ဇွန်လ၂၀ ညပိုင်းက ရန်ကုန်မြို့ Wyndham Grand Hotel မှာကျင်းပခဲ့ပြီး ပြိုင်ပွဲဝင် အလှမယ် ၂၂ ဦး ဝင်ရောက်ယှဉ်ပြိုင်ခဲ့ရာ ရန်ကုန်တိုင်းကိုယ်စားပြုအလှမယ် ၄ ဦးကို ရွေးချယ်ခဲ့တာဖြစ်ပါတယ်။
“ညီမဆုရတဲ့အပေါ် ပြောမပြတတ်အောင် အရမ်းကိုဝမ်းသာပီတိဖြစ်ရပါတယ်။ ရန်ကုန် ၄ မြို့ထဲမှာ အလိုချင်ဆုံးဖြစ်တဲ့ Yangon East ရတဲ့အတွက်လည်း ပိုပြီး ကျေနပ်ပီတိဖြစ်ရပါတယ်။ Crown ကလည်း ကိုယ်အကြိုက်ဆုံး Crown လေးဆောင်းခွင့်ရတော့ အတိုင်းထက်အလွန်ပါပဲ။ ဝတ်စုံဆိုရင်လည်း ဒီဇိုင်နာ ကိုကျော်စွာက ဒီဇိုင်းဆွဲပေးတဲ့ ဝတ်စုံတွေထဲကမှ မြွေပုံပါတဲ့ ဒီဇိုင်းလေးရွေးလိုက်တာ။ ကိုယ့်ဝတ်စုံက ပွဲမှာသူများနဲ့ မတူတော့ Best In Evening Gown ဆုလေးပါရသွားတယ်”လို့ Miss Universe Yangon East 2023 ဆုကိုရတဲ့ အလှမယ် Pandra က MT News ကို ပြောပါတယ်။
အဆိုပါ ပြိုင်ပွဲကနေ Miss Universe Yangon East 2023 ဆုကို အလှမယ် Pandra ၊ Miss Universe Yangon West 2023 ဆုကို အလှမယ် ယွန်းသီရိနိုင်၊ Miss Universe Yangon South 2023 ဆုကို အလှမယ် အယ်လင်း ၊ Miss Universe Yangon North ဆုကို အလှမယ် ဖြူစင်သန့်တို့က ရရှိခဲ့ကြပါတယ်။
ဒါ့အပြင် ဇွန် ၂၀ က ကျင်းပခဲ့တဲ့ပြိုင်ပွဲမှာ Miss Universe Taunggyi 2023 ဆုကို အလှမယ် ဆုမြတ်သူနဲ့ Miss Universe Aungpan ဆုကို အလှမယ် ဇင်အိနွယ်တို့က ဆက်လက်ဆွတ်ခူးရရှိခဲ့ပါတယ်။
“Miss Hiruscar ဆုလေးဆိုရင်လည်း ကိုယ်အရင်က ဝယ်သုံးနေကျ Product လေးတွေ။ ဝယ်စရာမလိုဘဲ လက်ဆောင်တွေရတယ်။ ကိုယ်သုံးနေကျထဲ အကြိုက်ဆုံးဆိုတော့ ဆုကြေညာလိုက်တော့ အရမ်းကို Surprise ဖြစ်သွားတယ်။ ခုလို Title ဆု နှစ်ခုရလို့လည်း ကျေနပ်မိပါတယ်။ ညီမကို ဆရာတွေက ကိုယ့်အားနည်းချက်၊ အားသာချက်တွေကို သိတဲ့သူဖြစ်လို့ ဆရာတွေရဲ့ လမ်းညွှန်ချက်အတိုင်း တသွေမတိမ်းလိုက်နာပြီး ပြင်ဆင်ကြိုးစားသွားပါမယ်။ နောက်တစ်ဆင့်ယှဉ်ပြိုင်မဲ့ MUM ပွဲကြီးအတွက်လည်း ဆရာတွေနဲ့ Organization ရဲ့ လမ်းညွှန်မှုအတိုင်း အကောင်းဆုံးကြိုးစားသွားပါမယ်” လို့ သူမက ဆက်ပြောပါတယ်။
၂၀၂၃ ခုနှစ်မှာတော့ Miss Universe ပြိုင်ပွဲကို အပျိုစင် အလှမယ်တွေသာမက အိမ်ထောင်သည်အလှမယ်တွေ ယှဥ်ပြိုင်ခွင့်ပြုထားတာလည်း ဖြစ်ပါတယ်။ ရန်ကုန်တိုင်းကိုယ်စားပြု ရွေးချယ်ခံရတဲ့ အလှမယ်တွေနဲ့ တခြားပြည်နယ်နဲ့တိုင်း ကိုယ်စားပြုအလှမယ်တွေကလည်း မကြာမီ ကျင်းပမယ့် Miss Universe Myanmar 2023 ပြိုင်ပွဲကြီးမှာ ဆက်လက်ယှဉ်ပြိုင်သွားမှာဖြစ်ပါတယ်။
