MT News
Written By Thandar
ရုပ်ရှင်ရုံကို ကိုယ်တိုင်သွားရောက်ကြည့်ရှုဖို့ မလိုဘဲ မိုဘိုင်းဖုန်း ရုပ်ရှင်ရုံက ရုပ်ရှင်ဇာတ်ကားတွေကို အချိန်မရွေး အလွယ်တကူ ကြည့်ရှုနိုင်မယ့် “ငွေဥအွန်လိုင်းရုပ်ရှင်ရုံ” (Silver Egg Online Cinema Application) မိတ်ဆက်ပွဲကို ဇွန် ၁၉ ရက် မွန်းလွဲ ၃ နာရီက Novotel Hotel မှာ ကျင်းပခဲ့ပါတယ်။
“အမတို့ Silver Egg Application မိတ်ဆက်တဲ့ပွဲလေးပါ။ ဒီနေ့ကစပြီး ရုပ်ရှင်ဇာတ်ကားတွေ ကြည့်လို့ရပါပြီ။ ပထမဦးဆုံး ဇာတ်ကားက ကျိန်စာသင့်နတ်သဒ္ဓါ ဇာတ်ကားကို စကြည့်လို့ရမှာဖြစ်ပါတယ်။ Application ကို အကောင်အထည်ဖော်ဖို့ တစ်နှစ်ကျော်ကျော်လောက် ကြာသွားခဲ့တယ်။ ခက်ခဲပါတယ်လေ ။ Aya Pay ကနေ ငွေချေလို့ရခဲ့ပါတယ်။ တခြား Pay တွေနဲ့လည်း ပေးချေနိုင်အောင် လုပ်ထားပါတယ်။ အမ သူငယ်ချင်းတွေ ငယ်ငယ်ထဲက ငွေဥလို့ Nick Name ဖြစ်လို့ ဒီနာမည်လေးပေးဖြစ်တာပါ “လို့ ငွေဥအွန်လိုင်း ရုပ်ရှင်ရုံတည်ထောင်သူ ဒေါက်တာငွေတီဦးက ပြောပါတယ်။
ဒေါက်တာငွေတီဦးဟာ အကယ်ဒမီအိန္ဒြကျော်ဇင်ရဲ့ အမျိုးသား အကယ်ဒမီပြေတီဦးရဲ့ ညီမအရင်းလည်းဖြစ်ပါတယ်။
အဆိုပါ ရုပ်ရှင်ရုံ မိတ်ဆက်ပွဲကို နိုင်ငံကျော် အနုပညာရှင်တွေဖြစ်တဲ့ အကယ်ဒမီ စိုးသူ၊ အကယ်ဒမီ ရန်အောင်၊ ဘုန်းလျှံ၊ အောင်ရေချမ်း ၊ နေထက်လင်း၊ ညီနန္ဒ ၊ ကျော်ထက်အောင်၊ ကျော်ထက်ဇော်၊ အကယ်ဒမီစိုးမြတ်သူဇာ၊ အကယ်ဒမီ စိုးမြတ်နန္ဒာ၊ အကယ်ဒမီ မေသန်းနု ၊ အကယ်ဒမီ အေးမြတ်သူ၊ ခိုင်နှင်းဝေ၊ မျိုးစန္ဒီကျော်၊ ရွှေသမီး၊ နန်းဆုရတီစိုး၊ နန်းဆုဦး ၊ယုသန္တာတင် ၊ အကယ်ဒမီ စိုးပြည့်သဇင်၊ ခြူးလေး ၊Mrs. Universe ဟန်နီချို ၊ နန်းမြတ်ဖြိုးသင်း စတဲ့ အနုပညာရှင်များစွာ တက်ရောက်ခဲ့ပါတယ်။
အခမ်းအနားမှာ Silver Egg Application Logo ကို ပြသခဲ့ပြီး ငွေဥအွန်လိုင်း ရုပ်ရှင်ရုံတည်ထောင်သူ ငွေတီဦးက အက်ပလီကေးရှင်းအကြောင်း ပြောခဲ့ပါတယ်။ Silver Egg Online Cinema Application ရဲ့ ပထမဆုံးရုပ်ရှင်ဇာတ်ကားကို ရိုက်ကူးတဲ့ ဒါရိုက်တာစတီးလ်ကလည်း အမှာစကားပြောခဲ့ပါတယ်။
အဲ့နောက် Silver Egg Application ကို Download ပြုလုပ်ပြီး ကံစမ်းထားတဲ့ သူတွေထဲက ပထမဆု (၁၀) သိန်းကျပ် ၊ ဒုတိယဆု (၃) သိန်းကျပ်နဲ့ တတိယဆု(၂) သိန်းကျပ်ဆု ရရှိတဲ့ ကံထူးရှင်တွေကို AYA Pay Couple Award ဆုတွေကို ပေးအပ် ချီးမြှင့်ခဲ့ပါတယ်။
ငွေဥ အွန်လိုင်းရုပ်ရှင်ရုံက ရုပ်ရှင်ဇာတ်ကားတွေကို ကြည့်ရှုဖို့အတွက် Application ကို Download ပြုလုပ်ပြီး ရုပ်ရှင်ကြည့်ရှုလိုသူတွေက လက်မှတ်ကို AYA Pay ၊ KBZ Pay ၊ MPU ၊ Wave Money အစရှိတာနဲ့ ဝယ်ယူငွေပေးချေကာ ကြည့်ရှုနိုင်ပြီ ဖြစ်ပါတယ်။
