၂၀. ၆. ၂၀၂၃
Written by Pan Ei
တောင်ကိုရီးနိုင်ငံက နာမည်ကြီး မင်းသားတစ်လက်ဖြစ်တဲ့အပြင် မြန်မာနိုင်ငံမှာရော နိုင်ငံတကာမှာပါ ပရိသတ်သန်းပေါင်းများစွာရှိတဲ့ အသက် ၃၄ နှစ်အရွယ် မင်းသား Park Seo Joon ဟာ ဒီနေ့မှာတော့ သူ့ထက် ၅ နှစ်လောက်ငယ်တဲ့ အဆိုတော်၊ ယူကျူ့ဘာ xooos ( အမည်ရင်း Kim Soo Yeon) နဲ့ တွဲနေကြတယ်လို့ သတင်းတွေထွက်ပေါ်နေခဲ့ပါတယ်။
သတင်းတွေအရတော့ သူတို့နှစ်ဦးဟာ အချင်းချင်း ရင်းနှီးတဲ့သူငယ်ချင်းတွေနဲ့ပါ မိတ်ဆက်ပေးထားပြီး တခြားစုံတွဲတွေလိုပဲ ချိန်းတွေ့လေ့ရှိတယ်လို့ သိရပါတယ်။
အဆိုပါကောလဟာလသတင်းတွေအပေါ် မင်းသား Park Seo Joon ရဲ့ အေဂျင်စီ Awesome အင်တာတိန်းမန့်ကရော xooos ရဲ့ အေဂျင်စီ WAVY ကပါ ငြင်းဆိုခဲ့ခြင်းမရှိဘဲ “အနုပညာရှင်တွေရဲ့ ကိုယ်ရေးကိုယ်တာဘဝနဲ့ ပတ်သက်တဲ့ အချက်အလက်တွေဖြစ်လို့ အတည်ပြုဖို့ ခက်ခဲပါတယ်” လို့သာ ထုတ်ပြန်ခဲ့ကြပါတယ်။
Figh for My Way၊ What’s Wrong with Secretary Kim၊ Itaewon Class စတဲ့ နာမည်ကြီး ဇာတ်ကားများစွာရဲ့ ဇာတ်ဆောင်မင်းသားဖြစ်တဲ့ Park Seo Joon ရဲ့ IU နဲ့ တွဲဖက်သရုပ်ဆောင်ထားတဲ့ Dream ရုပ်ရှင်ဟာ မကြာသေးမီက ထွက်ရှိခဲ့ပြီး အခုနှစ်ထဲမှာပဲ သူ့ရဲ့ “Concrete Utopia” နဲ့ “The Marvels” ရုပ်ရှင်တို့လည်း ရုံတင်ဖို့ရှိနေပါတယ်။
၁၉၉၄ ခုနှစ်က မွေးဖွားခဲ့တဲ့ xooos ဟာ subscriber ၁ ဒသမ ၅ သန်းကျော်ရှိတဲ့ ယူကျူ့ဘာနဲ့ အဆိုတော်တစ်ဦးဖြစ်ပါတယ်။ သူမဟာ ၂၀၁၅ ခုနှစ်က ထွက်ရှိခဲ့တဲ့ “The Producers” မှာ ပထမဆုံးသရုပ်ဆောင်ခဲ့ပြီး ၂၀၁၇ ခုနှစ်က idol survival show “MIXNINE” မှာလည်း ပါဝင်ခဲ့ဖူးပါတယ်။
Ref; Soompi
